Ke eng o hubaditše mahlo?
Mahlo a tsorotla meokgo?
O fela motsotso ka motsotso,
O šetše ka marapo le ditšhika,
O hloka lethabo le batho,
O phela o le modulathoko,
Molomo wa gago o ripegile,
Bophelo bja gago bo fetogile,
O ja ke eng?
Marokgo o tlengwa ka marala,
O sehlefala gannyane gannyane,
Ke a ipotšiša ke hloka karabo,
Ke hloka go tseba yeo e lego nnete,
Ke a jega ka gare ge wena o jewa,
Ke nyantše letswele le wena samma,
Bjalo ge o lla le nna ke a lla.
Molato ke eng ngwanešo?
Phula sekaku boladu bjo tšwe,
Khuporolla marama o bolele,
Ke bapile le wena o se tšhoge,
Sephiri se a bolaya,
Se bolaile ba mmalwa.