Hhayi kuhlupheka mina sengikuzwile!
Hhayi kuhlupheka mina sengidelile!
Hhayi kuhlupheka inkani kimi isiphelile!
Wonke amaqhinga namaceb’ ami uwashafisile
Mina ngife ngiyphila le mpilo ngiyiphilile
Njengesosha ngiyilile kodwa amandl’ aphelile
Ukutinyela kodosi lwakho kuzwakele
Kwelincane ibhodwe wena ungiphek’ ungithulule
Sengize ngithambile, ngithambile lushรบ
Hhayi cha kuhlupheka sekwanele manje
Yingakho ngimemeza manje, ngithi:
“Kuhlupheka! kuhlupheka! sengivuthiwe!”
Njengenkosi phezu kwami ubusile
Ezweni lokuhlupheka wen’ ungithumbile
Kwelabahluphekayo mina ngiyisigqila sakho ungigqilazile
Sengiyacela,kuhlupheka sal’ usungikhulula manje
Nami ke ngikhombe ngophakathi kube kanye nje
Sekuyiminyaka ngidl’ imbuya ngothi
Ngibhodl’ indlala eseyingibangel’ ulaka isikhathi
Sal’ ungidedela ngihambe ngiy’ empumelelweni
Phel’ impilo yam’ uyiphendul’ inhlekisa ngish’ ihlaya
Mhlawumbe sengiyanhlanya ngish’ ukugula ngekhanda
Nami kule nkondlo ngibukisa ngawe ngiyakuchaya
Ngikwenek’ obala kule nkondlo ngihaya ngawe
Umhlaba mawazi ukuthi nginjena-nje kuhlupheka ndini nguwe!
Ngoba hlupheka ubukisile ngami, kuhlupheka mina ngivuthiwe!
Ibhalwe ngu:
S’thembiso Sydney Msezane