Ngeliny’ ilanga kuyophela ngami,
Izintuthwane ziyosala zizenelisa
Ngesidumbu somzimba wami,
Izihlobo nabangani bayosala nosizi
Oluyobe lubhalw’ emehlweni
Ngiyobe sengilele kobandayo.
Uthul’ othulwini,
Umloth’ emlotheni
Kuyobe sekush’ umfundisi
Ethandazel’ elam’ ibhokisi.
Elam’ ibanga ngiyobe sengiliqedile
Umbhal’ uyosala nabaphilayo
Okuyoba yiwon’ oyonilandisa ngempilo
Ebengiyiphila ngisadl’ anhlavana.
Izinkondlo zami,
Yizon’ eseniyongikhumbula ngazo
Mhla ngalifulathela leli lembazo
Ngicela ningisize nikhulum’ enikwaziyo ngami,
Ningangikhulumel’ engingakwazi
Ngoba niyongivimbel’ endleleni Yami,
Eyekhaya kobabamkhulu.
Mhla ngifulathela,
Aniyongibek’ endawen’ epholile
Lapho ngiyolala khona ngiphumule,
Ngoba sengikhathele vele
Nize ningakhali kakhulu
Ngoba nasethuneni ngiyobe ngingedwa.
Mhla ngifulathela nize ningakhali
Ngoba ukukhala kwenu
Kuyongifikisel’ usizi
Ngiyazi kwizihlobo nabangani kuyobe kubuhlungu
Kepha ningakhohlwa phela ukuthi
Izinyembezi zenu ziyophenduka umfula
Oyongixaka ukuwuwela kwelizayo
Yizona eziyongibishisa kumfula wase Huze
Uma sengithetha amavaka Ami, akwamhlaba.
Ngisho lamazwi nje ngoba ezami,
Ezam’ izinsuku sezibaliwe
Ezokuthi nginishiye kwamhlaba
Ngiyazi akekh’ olwaziy’ usuku lwakhe
Kepha elami selibekiwe,
Bonke abathandwa yimina babekhona
Ngisho phela ngosuku lomshado wami wokugcina.
Namanje ngisalokhu ngizibuze njalo
Ukuthi engabe lon’ izulu ngiyolingena Na?
Bafowethu ebengiphila nabo
Nisasalelwe yisikhathi nosuku olunzima
Lapho okuyothi kusemnandi nizithokozisa
Kungene ucingo noma nibone nge- post’ ethi
“Akasekh’ emhlaben’ ebenikade ninaye”
Ingabe niyolwazi yini ukulibhek’ ibhokisi
Engiyobe ngilele kulona okokugcina?
Ngosuku lomlindelo niyokwazi yin’ ukufakaza ngami?
Niyoyimela yin’ imicabang’ eyofika makufakazwa ngami?
Niyokwazi yini ukungibona sengithule u-du?
Kungasekho kumamatheka namahlaya wami?
Sengifana nesigubhu eainganyakazi.
Kunesikhathi esiyofika
Koth’ Uma kufika leso sikhathi
Yimi ngedwa oyobe ejabule
Mhla inyama yam’ ihlukana nomphefumulo wami
Mina ngiyobe ngiyobe ngijabulela ukuphumula
Ngiyobe ngijabulela ukuhlukana nosizi lomhlaba.
Babodwa abayobe bekhala
Abanye babo bayobe bezisola
Bese abanye bayobe bedliwa unembeza
Abanye bayobe sebesaba ngisho ukubhekana nomndeni wami
Izinhliziyo zabo ziyobe zikhala igazi.
Othandiweyo wam’ uyosala nemibuzo eyize leze
Imibuzo engena kuphendulwa
Uyobe ekhala ubusuku nemini
Njalo Uma ebuka izithombe zami
Noma elalel’ izingxoxo zeth’ eziqoshiweyo.
Uyabona mhla inyama yami ihlukana nomphefumulo
Yilapho abantu abayobona khona
Ukubaluleka kwami ezimpilweni zabo
Mhla ngifulathela
Yilapho eniyoqala khona niveze uthand’ eninalo ngami
Kulapho abanye beyofisa khona ukube ngisaphila
Khona oyodliwa unembeza aze afise ukube
Wangithanda ngendlela engangimthanda ngayo
Khona oyofisa bemlethele amanzi bethi uyaphupha
Ngiyofa futhi ngeke nikholwe.
Niyoqoqelan’ ekhaya notice kukhanya isiban’ emsamu
Izingubo zami nombhede sekuqoqiwe kwabekwa
Niyongena kanye namakholwa
Nani ngiyobe senibheme nakholwa.
Lapho mina ngiyobe sengithule
Ngiyobe sengilel’ obaphakad’ ubuthongo
Niyokhala nithi anginicabangeli
Niyobe senithi ngizicabangela ngedwa
Elokufa kalitsheli
Kepha umuf’ uyalizw’ Uma selifikile kuye
Nami mhla ngifulathela.
Angeke nginazise sengihamba
Angeke ngivalelise ngolwam’ uhambo
Kumanje ngimatasa ngilungisa umphako
U- ” please don’t cry for me” no “grave is my home now”
Bayosala beyimibhalo
Mhla ngifulathela.
Ningakhohlwa ukuthi ngike ngaphila nani,
Ningalibali phela ukungikhuphula nami
Ukuze ngizokwamukeleka emindenini Yami
Awu Nkosi yami sengikhumbul’ izingane zami
Ezandlulayo ngingakalitholi ithuba
Lokuzibamba ngizigone nami
Mhla ngifulathela ngeke nginikhohlwe
Nami ngizonivakashela.
Mhla ngifulathela.