Inhliziyo yakho imanxebanxeba.

Umoya wakho waphukile.

Udangele, inhliziyo iyopha.

Ithunzi lobunyama likusibekele,

Libalekisile ukukhanya kuwe.

Qinidolo!

Noma kuhlwe mini namhla,

Kusasa lizobalela nakuwe.

Lisekhona ithemba!

Namhla impilo yakho inesigagadu, iyihlane.

Izinyembezi zigeleza okwemithombo yamanzi.

Izinyembezi seziphenduke ukudla kwemihla.

Uzithola udunguza otwini.

Lapho ungaboni phambili.

Lapho ungaboni emuva.

Kepha konke kuyakukhawuka.

Okungapheli kuyahlola!

Yebo nokuba usizi nomunyu kuyakukhawuka.

Lisekhona ithemba!

Namhla uzibona ufana nenyoni eqhuthwe izimpiko.

Izimo zikunqund’ amandla zikudicilele phansi.

Izikhathi ziyafika, izikhathi ziyadlula.

Namhla intaba, kusasa Ithafa.

Namuhla indlala, kusasa inala.

Namuhla isahluko sosizi, kusasa ngesentokozo.

Kuzodlula nakuwe, qinidolo!

Lisekhona ithemba!

NguJesu umninimandla onke.

Ibhalwe ngu: Nokwazi Penelope Dube