Ngindlule amagquma
Namagqumakazi.
Ngandlula izintaba
Nezintabakazi.
Kodwa lutho ukufika!
Ngandlula amahlathi
Namahlathikazi.
Ngandlula imifula nemifulakazi.
Kodwa lutho ukufika!
Kukude phambili,kukude emuva!
Abanye nabaya sebewelile,
Kimina kufike ukukhathala.
Kimina kufike usizi olunzulu.
Ngithi ngiyahamba akuhambeki.
Kubuhlungu izinyawo
Kugexa namadolo.
Uthi ngizowelela ngaphesheya nje?
Ngithi ngiya emuva
Kukude futhi kuyesabeka,
Phambili kuyakhanya
Kodwa kuyenyukela.
Hhayi phambili ngiyaya!
Nabaya ozakithi sebewelile.
Sebewutholile lomthombo!
Umthombo ogobhozayo,
Ogobhoza ingunaphakade.
Sebephumule sebephumule!
Yebo sebejabule impela,
Sebekufumene ukuphumula
Ukuphumula kwaphakade.
Kimina kungumqansa.
Kukude phambili kukude emuva!