Lapeng ke nna seaparantepa le lebole
Ke nna moswaradipitša le mahudugo
Ke nna mothepana kgarebe ya dithangwana
Ke mogoroši wa dikgomo lapeng leso
Monyalwa ke kgoro ya kua mošola ga noka ya Mosehlabje
Nna ke kgadi ya masogana!
Le se ntepeletšeng nna ga ke na matepe
Ke sekgwari ka bjokong le matsogong
Ke latswitše tšohle letsweleng la Mmamontedi
O ntshwetše ka a gore ‘mosadi ke moswielo’
Mosadi ke go hlweka mmele, a hlwekiša bodulo
A aga lapa la gagwe la tanya šedi
Nna ke kgadi ya masogana!
Ka ntepa ya ka ke hlatha segagešo, sona Sepedi
Ke senakangwedi ke hlatswa mahlo a bafeti ka tsela
Ke tloša bodutu difahlegong tša babogedi
Ke seswanelwa ke dipheta le maseka
Ke kgarebe ya sebopego sa seAfrika
Ke kgadi ya masogana!