Nalixhaphaza nilixhaxhathekisa
Nalihluba nalidlwengula nihlaz’ ubuzela balo
Ningxamele ukuwagqiba niwaqongqothe kungabikho namnye
Siyintoni kanti isono sebhinqa?
Bayatshutshiswa de batshiswe kungekho utshutshiseka sisazela
Yintlalayenzeka lomkhwa kwimizi ngemizi
Ziintsana zawo ziqamele ngeenyembezi
Inoba siyintoni isono sebhinqa?
Sikhalondini esikrakra utsho ngaphi
Sandlandini esirhabaxa kant’ uvela phi
Ndibizelen’ amadod’ enene hlez’ eze nempendulo
Siyintoni kanti isono sebhinqa?
Izibalo zokugwintwa zinyuka ngokunyuka
Babulaw’ okwempukane kuphel’ isazela
Zikrunek’ intliziyo zoluntu zide zizipholele
Sono sini kanti esi sebhinqa?
Ngelosindini yogonyamelo phind’ aph’ ubuvela
Ungen’ uphuma okomninizi kule mizi
Ugwint’ uginye ugigitheka gorha ndini lobudenge
Xa besiyintoni isono sebhinqa kuwe?
Bekani phantsi izikhali madoda
Ubudoda abubonakaliswa ngobundlobongela
Xhobisanani ngobulumko aphel’ amaxhoba
Belingenatyala kakade elo bhinqa