Hhawu! Bengith’ Uyangithanda
Uyintonkazi enhle ngesizotha
Umuhle vele ngokwemvelo
Ngokwemvelo ugcwele ukukhalipha
Lezi zinto zayikhanga inhliziyo yami zay’thatha
Kudala ngidibana nezimbila zithutha
La kuwe bengithi ngizokwakha ikhaya
Bengithi ngizohlala angisoze ngathutha
Ngakh’uthando oluqinile libe ikhaya
Uthand’ oluzomelana nenamandla imimoya
Uthando olubheka lokho esiyikho
Ngisho uthando oluhlayo
Uthando olubekezelayo
Uthando olucabangelayo
Uthando olubonelelayo
Uthando oluxolelayo noma izono zingabomvu
Uthando oludlulisayo lishiye amaphutha ngemuva
Uthando olunamathelayo entweni
Noma kungathiwa isiphetho sivela kamuva
Uthando oluthanda ngeqiniso
Ngifikile kuwe ngobumsulwa bami
Phambi kwakho ngazibika njensizwa nami
Ngichaza ubumina ngangadla ngamabala
OkweNgwe yona edla ngawo amabala
Isifiso sami ngawe besisihle sijulile
Ukuba ngithathe le mbali enhle enguwe
Hhayi ukuzoshanela kodwa ukuhlobisa awakithi amabala
Angikuthembisanga izulu nomhlaba
Ngoba okwalelizwe kuyashabalala
Uthando lweqiniso lunjemanzi okuphila
Nembala wavumelana nami wangaphika
Njengembali udinga uthando olunjalo
Mina uqobo lwami anginabo ubukhazikhazi
Obukhazimula bukude le okwezinkanyezi
Obuthi bunganyamalala bushiye izibazi
Mina angishalazi iqiniso ngiyalazi
Uthando olusheshayo alumnandi
Lubuhlungu lubaba njengamashashazi
Luphela kalula njengomdlalo weshashalazi
Ngisho nezazi ziyavuma othandweni akulula
Bengithi uyazi ungesazi esidinga ukwazi
Othandweni kunezosizi nezokujabula izinyembezi
Uthando luyaziswa luphathwa njengengilazi
Lwaphihlika yeka usizi olungenamnikazi
Kwenzekile kuMsizi Shezi, nakuNokwazi wakwaMashazi
Njengami bengithi ukubonile lokhu usuyakwazi
Usuyazazi awunyakazi ntokazi ndoni yamanzi
Ukuthi yini oyifunayo uthando hhayi ubukhazikhazi
Ngoba isango lokungena nokuphuma othandweni libanzi
Wangininka isikhathi sakho ngiyavuma
Wangilalela wangilalelisisa ngiyavuma
Wanginakisisa ngesisa esinokwazisa ngasazisa
Angizange ngibe mude ngamazwi okuzazisa kuwe
Ngathi kuwe: ntokazi ngicela uthande uqobo lwami
Namuhla uthando selubiza amanani
Ngingumuntukazane nje anginabani
Ngithande ngaphezu kokuthi anginani
Noma ngingenani kodwa ukuba nawe
Empilweni yami ziyongikhanyela nami izibani
Kwazi bani mhlawumbe nguwe isibuko sami
Ukuba nawe ngizokubheka njengesibusiso sami
Nami kuwe ngibe isibusiso hhayi isiqalekiso
Sikhumbula ukuthi lixhoshwa libhekile iso
Ngala mazwi ngangithi ankeneneza kamnandi
Kwezakho izindlebe anjengomculo omnandi
Ngafinyelela isiphetho sokuthi uyangithanda
Wathi ungezwa ukuthi ngingubani
Ngihlala kuphi ngizalwa kwabani
Ngokwemvelaphi yami ngivela…
Ukusuka nokuhlala ngakuchazela
Lokho engiyikho nalokho engikufisayo
Nobunzima engibhekene nabo kodwa ngisengophokophelayo
Okwamanje yizo izinto ezenqabayo ezingiphikayo
Waba umuntu onodlebe noqondayo
Ngasho ukuthi ngaze ngamthola ongiqondayo
Umaqonda wami ongithandayo
Kwenzeka lokhu nesikhathi siyahamba
Nezinsuku ziyandlula azikwazi ukuzibamba
Ekugcineni ngahluleka ukuzibamba
Ngakutshela ukuthi ngiyakuthanda
Ngezwa ukuthi uyathamba
Angizange ngilokhu ngibhambatha
Kweyami inhliziyo uyathandeka ngempela
Ngizokwembatha olwakho uthando unomphela
Ngoba la kuwe angizange ngithatheke
Komunye nomunye sizothembeka
Ngothando lweqiniso hhayi lokuthatheka
Ngoba kwelokuthatheka lukholisana ngokukhohliseka
Ekugcineni lugcine selunengeka
Bengithi ufuna uthando lweqiniso
Olungenayo nakancane inkohliso
Hhayi olukudaka okwesikhana okwemilaliso
Kodwa uthando olumsulwa olungenayo indibaniso
Uthando olumi njalo ngengxa yezimiso
Hhawu yajika inyama oqokweni!
Koma ngisho nasozwaneni!
Angazi ukuthi zoniwe yini izinto zisuka nje
Lapho bengithi izinto zinje
Ngisajabulile izinto zajika zaba nje
Konje kwenziwa njani uma seku nje
Besengibheje ngalo lonke uthando lwami kuwe
Ngibheke omuhle umklomelo ngithi angeke ngigeje
Izinyangana nje ngisajabulile ngenamile
Ngisathi le ntonkazi ngiyithathile ingithandile
Ingabe enhliziyweni ngizidukisile ngizikhohlisile
Enhliziyweni yami ngawe bengizizwa ngiphilile
Wawelapha amanxeba abangelwa nguPhilile
Kanti amaphutha nezenzo zami kungiphikisile
Nginganakile kanti azogcina engikhiphile
Ngazehlisa ngawavuma ngaxolisa ngixolisile
Ngiyavuma njengomuntu ngikudumazile
Uthando lwami namaphutha ami kuziphikisile
Ekugcineni wavuma ukuthi uwesulile ungixolelile
Kanti washo ukuthi: “lala laza ngikwengulile”
Ngafela ukuthi izinto mazenzeke ngeqiniso ngendlela ehlelekile
Iqiniso othandweni lwenza izinto zishelele
Futhi alishalazeli izinto ezingalungile
Mina wangona ngathula ngabekezela
Kokunye bengikwazi ukukutshela
Angazi noma naloku kwaba nomthelela
Ngithi ngiyalungisa kanti ngiyazimoshela
Ngazama ukukuphaphamisa nakhu wozela
Uthando lwethu seluyalokozela
Masilikhwezele lungakacimi masiluvethele
Asikwazi ukuliyekelela lulothe
Kwafana nokuthi ngizithela ngabandayo
Ngazehlisa ngazibeka phansi kuwe
Ukuze izinto nobudlelwane bethu bulunge
Ngaxolisa ngixolisile ukuze izinto zilunge
Ngakubuza kaninginngi ukuthi uyangithanda na
Ngangibuza ngoba lolu thando luselusha sha
Wathi okwamanje awazi ukuthi uyangithanda noma
Noma kunjalo ngangiyidinga impendulo
Kimi lo mbuzo ubuzoba isixazululo
Ngempendulo yakho bengingadingi ukuthi ube mningi
Lo mbuzo wawubalulekile wawungakulingi
Khona ngizokwazi ukuthi selunciphile aluseluningi
Kwavele kwangihlwela emini
Othandweni lwethi usufake ungqi
Hhawu! Bengithi uyangithanda…!
Bengithi ungithanda nginjena
Bengithi siyohlale sithandana
Sobabili bengithi singomaqondana
Ngezinye izikhathi siyohlukana sihlakazeke
Kodwa ngothando soqoqana sinamathelane
Ngemibono besingeke savumelana
Kuyo yonke into besiyokhulumisana
Sisebasha othandweni siyokhulisana
Izinto zixazululwa ngokhulumisana
Hhayi ngokulumana nangokuqagulisana
Izingqinamba besizolwisana nazo ngokubambisana
Siqabulane ngamazwi amnandi sincokolisana
Hhawu! Bengithi uyangithanda…!
Bengithi ungithanda ngingelutho
Uzongithanda ngize ngibe utho
Lapho ngidangele unginike umfutho
Ngize ngibe namandla okwebutho
Bengithi awunendaba nokuthi ngidabuka eMaputo
Ngingenandaba nokuthi udabuka kuleli noma eLesotho
Sengisho noma ngingamile kahle nakwezomnotho
Bengithi selifezekile nelami iphupho
Hhawu! Bengithi uyangithanda ngempela
Komunye nomunye siyozibophezela
Kukuhle kunzima siyozidela
Uwa uvuka nami ubuyozibophezela
Kuze kube umhla wokuphela
Kweyami inhliziyo uze ngokuzohlala
Abaningi bayiphendule ithoyizi lokudlala
Bashiya bayikhohlwa kanjalo bayilahla
Bekungekho ukuthi ngelinye ilanga uzongilahla
Okwekati kuwe sengifake izidladla
Ibijabula inhliziyo yami ibinomdlandla
Hhawu! Bengithi ulubambo lwami
Bengithi uyisithandwa sami
Uzohlale ungumngane wami
Ngikufake indandatho ube ngumkami
Besengizibona ngingumnumzane nami
Ube ngumama wekhaya la kwami
Bengithi uyikusasa lami
Bengithi lez’ izibusiso zothando ezehla okwemana ziqeda ubumpufo bami
Kanti ubumpofu bami bungivimbela izibusiso zothando ezinjengemana
Hhawu! Wangishya nginkemile
Thando ungishiye ngisamangele
Kweyakho inhliziyo usungisulile
Ngisho nanamuhla ngisadumele
Hhawu! Bengith’uyangithanda…!
Ibhalwe ngu:
S’thembiso Sydney Msezane