Khona kub’hlungu ukukhanjelwa
Ukulahlekelwa ngotjhidelene naye,
Loyo obekenza umehluko ngekhaya,
Ngitjho umehluko emphakathini, nephasini mazombe

Iye khona iinhliziyo zinzima
Ukukhanjelwa mumuntu, ongekhe usambona
Ongekhe usabona nokumomotheka kwakhe
Ongekhe usezwa nelizwi lakhe
Ngitjho nehleko lakhe elimnandi

Akusimnandi, matlhuwo begodu akwamukeli
Kwanga iphasi nalo litjhabalele
Kwanga yoke into ijamile
Kubudisi khulu kwanje kuyakhuphukela

Akunanto ethabisako,
Iye khona bakhona abaduduzako,
Ngibona ngemilomo ivuleka,
Kodwana Angizwa litho bona bathini

Kazi wenziwe ngubani Kufa?
Ngubani ovumelene nawe?
Awa awujwayeleki
Akekho othandwa nguwe
Ulinaba lethu soke

Uthatha iinthandwa zethu
Uthatha labo esibeke ithemba lethu Kibo
Awukhethi ugawula omthandako
Umncani, umdala kuyafana kuwe