Emthonjeni wabobamkhulu.
Lapho batapa wabo wobutjha.
Batapa kwanga batapa iluju leenyosi.
Kanti batapa isiko nobudoda.
Batjho bathabela ilwazi labokhokho.
Indaba ayitjelwana .
Ngeginywa burele njengomratha otjhisako.
Ifuna onesifuba, ongakararhwa ngudumbana.
Zakwa Ndzundza azimfuni umuntu
Ongakavuthwa kwanga lizambana elinomuru.
Itlabhatlabha into ehlaza ihlobokiwe.
Ihlama ayidliwa kwaNdzundza
Kanti nisihlubuliselani isikhethu na?
Nisivunulisa ngehlazo nokuthunana ye! masokana.
Indoda enjani enganasifuna.
Ngubani owanikela ngesungulo lokuyithumbusa?
Nibadembeleleni abodlhamagana kungakafaneli.
Alo! Seyindaba ezokuthiwani Njengombana kungabuyelwa kabili emthonjeni okhethekileko.
Alibulungwe, alikhoselwe begodu livikeleke Ndebele.
Umtloli: Themba Emanuel Mashobane