Ngisabathe ngiyaqalaza enhla nasezansi kweleNgabadi,kuze kuyofinyelela nase mazwen’ eziny’ izinhlanga imbala,ngizwa isililo.

Esivel’ ezinhliziyweni zabesilis’ ezichichim’ izinkinga esezaze zaphenduk’ amagquma egameni lokuth’ INDOD’ AYIKHALI.

Ngibon’ izimpophoma zezi nyembezi zehla,zigobhoz’ ezinhliziyweni.

Ngibon’ izintaba zemibuzo abazibuza yona ubusuku nemini ngaba besab’ ukuthi kuzothiw’ amadojiyana.

Ngibon’ ishayw’ indiva eyokuthi BAYAHLUKUNYEZWA.

Bahlukunyezw’ abant’ abababiza ngemindeni nom’ abathandiweyo kubo.

Kungaba ngokwamazwi okanye ngezesnzo.

Abanye babekw’ isandla,kant’ abanye badlisw’ inkwayindane nopondo spuni.

Ngalokhu kuhlukumezeka eminye yemihambuma,iziyoyoyo nondingasithebeni kwazalwa.

Izinkamba zikaFaro sezazitholel’ ikhaya kubo ngoba bethi bazam’ ukufihl’ ubuhlungu abaphila ngabo.

Isifo sokhwantalala siyabhebhetheka.

Omalugaju,izinswelaboya nabadl’ izidakamizwa bayadlondlobala.

Abasab’ ukubizwa ngamavaka bona baqom’ ukwendela koyisemkhulu babo,ngoba sebekhathel’ ukwahlulelwa ngokwehluleka uma kungazamekanga,okanye ngobuqotho babo uma bezamile.

Bakhathele ngokwahlulelwa ngempil’ abangazi celalanga.

Ngibon’ amalangab’ entukuthelo ebuswen’ asamenza waba nenzondo eyenza kuthiwe unesithunzi.

Ulak’ asenalo selwakhela umulwe!

Akasahleki nje akazenz’ iminjunju akayizwa ngaphakathi kuye.

Ath’ angafika ngalaph’ ahlala ngakhon’ ababe.

Ith’ iyamubuk’ ingan’ ebuswen’ ibaleke,ngob’ usuk’ esengu BABA uqobo!

Usuk’ engasazeni,ematasatas’ eqolotha ngengqondo ezam’ ukudiliz’ eminye yalemibuzo esaze yab’ igquma ngaphakathi kuye.

Igqebhuke,isakazeke phans’ eminye.

Kazi namuhla ngizophathwa kanjani?

Kazi kuzofunwani okanye kuzothiwani?

Sizwe sika Phunga noMageba,um’ abantu benamalungelo,kungan’ indod’ iphucw’ ilungelo layo lokukhala lemvelo?

Akusona yin’ isidalwa sika MFIHLAKALO esadlwa sinemizwa?

Athule kuze kube nin’ umubangel’ ingcindezi?

Aqinisele kuze kube nini nom’ ebuzwa ubuhlungu?

Kungan’ ufun’ ukuphil’ iphupho lakho ngaye?

Awuzikhandeli ngan’ owakh’ ozib’ ilento efunwa uwe?

Phela njengoba singabantu asdalelw’ izinto ngokufana nesikhath’ esozithola ngaso,ngish’ ungabuk’ iminwe yakho izokufakazela lokho ngob’ ingalingani.

Ungathanda yini kwenzeke kuwe noma kweyakh’ ingane?

Uwubulalelan’ umoya wakhe?

Usidicilelelani phans’ isithunzi sakhe sokub’ umuntu wesilisa nom’ engenalutho?

Uke wamcabangela yin’ ukuthi nay’ ungumuntu uyahlangabezana nezingqinamba nezinselelo ezithiy’ impumelelo yakhe,ngoba phela zona azikhethi fumuka nasilaza.

Abadl’ imbuya ngothi nazimpunyela?

Uma benezinkinga sehlulwa yin’ ukuthi sibeseke,sibabekezelele,sibemukele futhi sibakhombise uthand’ olungenamibandela?

NABO BAYAKUDINGA LOKHO NJENGAMI NAWE!

Ibhalwe ngu Thandeka ka Fabian Dlomo no Sheila Graives.