Yakhala yanuka inkafulakufa kugenquka izihlahla kusifa imbuzi kukhala inkukhu kuthunqa intuthu indawana yonke. Kwakukhala amanina kunephuka amabele esiya le lale kuyisipune pune inkomo zigcwele iganga engekho engaziwa lomninizo.
Umhlaba wawuguquke waba ngesinye isimo esasingajayelekanga. Kwakukhala umdumo wenkafula kufa indawana yonke wawubona izihlahla ziqethuka okwemfe egecwa ngembemba.
Silokhe sisahleli ngaphansi kwesihlahla somkhuna sibopha inkubela eyayivadlake idolo, yakhala yanuka inkafula kufa bude buqamama lalapho esasikhona sasuka lapho satshiya inkubela ezimbili sidinga indawo ephephileyo. Zadlula zintwentweza emakhanda inhlamvu zivutha okwamalangabe ephane.
Sezwa ngokuklabalala kweNkubela esasizitshiye esihlahleni somkhuna ukuthi kube ngezithende zethu. Yakhala yabubula ibhazuka ukhwaza kuqaqambe izinanakazane imfuyo yayigcwelel umhlaba wonke. Sakhokhoba ngamadolo phansi siwela umfula uTshangani sithe sesizagulukudela,zawa zayelekana izihlahla ezimbili phezu kwenkokheli yebutho lethu bafa kabuhlungu kanjalo ke uNkaniyabo loNkethabetshabi.
Kwathulisa kwathi chwaka umhlaba waguquka waba ngconywana ngakho phela intuthu yaphunguka kancane. Ngakhokha umoya ongatshisisa ngitsho itiye imbala. Lapho ke sathola ithuba lokufihla amaQhawe ayegenqulwe yisihlahla.
Sadinga imihome emibili yehombela sabafihla abafowethu abasebeginywe yikufa. Lokhu sasikwenzela ukufihla umkhondo wethu emabhunwini lamasotsha awo.
Ilanga laselibantu bahle ngakho ke lomsinjana wezinyoni wawuzwakala kucwadlana lezinanga zomfula utshangane. Latotoba laze latshona elingayaliyo. Lokhu kwakulithuba elihle ngoba phela kwasekuyisikhathi sokudlwandlabula uhambo oluya eJibaJiba enkambeni yesitha eyayigxumekwe emalangeni adlulayo.
“Ziyabuya Gudlindlu usinde njani emihlathini yokufa?”
Kutsho umsekeli kaNdunankulu uDlinjayomlungu.
“Kusebenze oMzilankatha nduna yami lami ngizibone sengisindile kodwa ke uhlamvu lungicuthe inwele!”
Ngatsho ngibamba ebunzini forehead lapho engangidlettshwe khona luhlamvu lwe A.k 47.
“minake angithintwanga sibi sempukane imbala” kukloloda uMsilakandlegu eziphathaphatha umzimba wonke okukhombisa ukuthi akalangitsho inxeba lotshani.
“Madoda lapha sisempini hayi umdlalo ungalala ufile thina syahamba!” Kwatsho umsekeli wendunankulu.
“kunjaloke Nduna!”
Mazwi manye sesithabele okuyangasethunjini njengoba phela izisu zasezikhala amanzi.
Sadla sahlukana loTshangane sibhekise amabombo khona kanye eJibaJiba ukuyegenqula inkamba yesitha.
Uthini umbono wakho: ingabe bazayiGudluza yini iNkamba yamaBhunu eJibajiba?
Siyeza isahluko sesibili…