Mesong ya Labone ke ile ka tsošwa ke melaetša ya “Robala ka khutšo” go kgokaganyo ya marangrang a Facebook. Ke ile ka makala kudu gobane melaetša yeo e be e lebišitšwe go lesogana tsoko leo ke godilego le lona. Semaka ebile gore bontši bja bangwadi ba melaetša yeo ga ba bolele gore lesogana le le hlokofetše bjang.

Ka madimabe nnete e swana le mpa o ka se e fihle. Ge batho ba ntše ba ngwala melaetša yeo go ile gwa kwagala gore lesogana le le itšeetše bophelo ka sethunya sa tatagwe. Bontši re ile ra kgopišwa ke taba ye, ra ipotšiša gore ana go diragetše eng gore lesogana le le be le tšee sephetho se. O be a tshwentšwe ke eng bophelong gore a be a ipolae.

Go ile gwa iponagatša gore ge re le batho re mamenemene, ge dipšhešamare e le tša ka lapeng re leka go di dulela ka marago gore re se ke ra šupiwa ka menwana. Ya re bao ba llago ba utolla gore lesogana le tšere sethunya sa tatago lona la ya gabo lekgarebe leo le bego le ntšhanang sa inong le lona la mo thuntšha ga mmogo le batswadi ba lona. Ka mogau wa Modimo lekgarebe le batswadi ba lona ba sa phela eupša go kwagala gore yena o bakwa le badimo ka ge a thuntšhitšwe hlogong.

Lesogana le ile go lemoga dipšheša mare tšeo le di dirilego la bona bokaone e le go iphapantšha le maru.

Re botše: Naa lehu la lesogana le le swanetše go re kweša bohloko? Ge motho a re šiile ka mokgwa wo re a mo llela?