Kulalela kuyintfo lebalulekile emphilweni yemuntfu. Kulalela kuyasisita kutsi sicwayiseke etintfweni letitsite futsi kubalulekile kutsi silalele. Kube ngangikwati loko ngalesikhatsi ngineminyaka lelishumi nesitfupha.

Langa limbe ngimncane ngingati lutfo ngatifaka enkingeni. Kwakungu-Mgcibelo lilanga libalele likhiphe umkhovu etjeni. Phela bekulilanga lelikhetsekile. Kwakungumhlaka 01 Inyoni emnyakeni wa-2015. Bengisekhaya ngihleli nebantfwana basekhaya uma ngikhutwa kutsi ngingayi kuyobona loya mfana lebengihlekisana naye ngoba phela ngangimncane kwaba nhlanga timuka nemoya. Batali bami bazama kungikhuta. Uma ngikhumbula kahle make wangitjela kutsi indlela ibutwa kulabasembili. Ngavele ngakhwebula lolunyanyisako luhleko ngabona make adzabuka sekahlengetela tinyembeti. Make nababe bazama kungincandza kutsi ngingayi kuloya mfana. Impela ngabavisa buhlungu batali bami ngoba phela bebakhala ngalesikhatsi sengiphuma emnyango. Make waphindze wangitjela kutsi bayawungibona labanemehlo.

Ngatsi uma ngifika kuleya ndzawo lebesivumelene kutsi sitawuhlangana khona ngamtfola asavele afikile. Wasondzela kimi wase ungibamba ngesandla. Ngativa ngihlanya ngoba phela lalilihle lelijaha kungusukasambe. Wabese ungikhomba lapho sitawuhlala khona ngahlala phasi. Sacoca imizuzu yaba lishumi. Lelijaha lacala kungisondzela ngacala kutiva ngingakaphephi. Langilalisa phasi lase licala kungicabuza. Kwatsi lapho lomfo afaka sandla sakhe ngaphasi ngeva ngifikelwa luvalo. Ngetama kumphusha kepha nani kukhwesha lelijaha. Kwatsi lapho ngetama kumemeta ngeva asangibamba ngabhongwane. Ngaphelelwa ngemandla ngeva kwangatsi ngibona tinkhanyeti. Kwatsi lapho asacedzile ngami washaya wacitsa. Ngetama kuvuka kepha kwakungavumi. Ngakhipha livi lami lekugcina ngamemeta. Ngemusa nangelutsandvo lwaNkulunkulu kwachamuka intfombatane lengatsi yayiyindzala kunami. Yangisita ngabuyela ekhaya. Make wakhala wate washaywa sibibitfwane. Lelijaha langishiya nginesifo sengculazi kanye nesisu. Ngabuva buhlungu ngate ngakhumbula emavi amake.

Imphilo yacala kuba matima. Ngalapha ngikhulelwe ngiphindze ngifundza sikolo. Ngacala lapho kusati lesaga lesitsi “sakubona sakubeleka”. Ngatama kufundza kepha kwakumatima ngaba bengikhulelwe. Kwatsi lapho sengibelekile luswane ngalushiya namake. Bekutsi uma ngibuya esikolweni ngilulandze. Tandla tindlula inhloko kubo bonkhe labangisita ngalesikhatsi ngidlula ebumatimeni. Nalabadzala bayasho kutsi kuhle kwephulana embiteni.

Ngiyatisola kakhulu ngekungalaleli kwami. Kube mane ngalalela uma ngikhutwa. Kepha sengiyati kutsi salakutjelwa sibona ngemopho. Lokunye lengakufundza kutsi live liyengcayelwa nekutsi kudlela emkhombeni wemphaka akusiyo intfo lenhle. Ngitiva ngikhululekile ngoba phela ngaphunyuka kulelagibe lebengiboshelwe kulo. Ngiyambonga Nkulunkulu kanye nemndeni wami naleya ntfombatane ngako konkhe labangentela kona. Phela bangentela umfelandzawonye. Tincane tibongo tami kuloko labangentela kona.