Kusemini ngeSonto. UNelisiwe uphaphama eyinto angayazi. Umzimba ubuhlungu kanti uphethwe ikhanda elimangalisayo.

“Usuze wavuka?” kubuza uZandile ehlezi phezu kombhede wakhe ecofa ifoni.

“Ngaze ngafa yikhanda. Ngifike kanjani lana?” kubuza uNelisiwe.

“Ubuthwelwe uSizwe ngoba kade uhlupha,” kusho uZandile.

“Ngaze ngaphoxeka. Ngiyaxolisa, ngeke ngiphinde ngibuthinte utshwala.”

“Uke wayivula ifoni yakho?” kubuza uZandile.

“Cha, yini ndaba kwenzenjani?”

“Njengoba ngichaza ukuthi izolo weqise kakhulu ngophuzo ngakho kunevidiyo yakho usina ekubeni kudlala ingoma yokudansa,” kusho uZandile emtshengisa.

“Imina lo obenza kanjena?”

“Okubuhlungu ngukuthi igcwele zonke izinkundla zokuxhumana. Nabazali bakho kungenzeka bayibone.”

“Hawu kodwa Jesu njengoba ubaba engumfundisi nje! Ibandla lizothini? Uzovele aphoxeke!”
“Ayikho into ongayenza ngoba okwenzekile sekwenzekile. Abazali bakho bayakuthanda futhi bazokuxolela uma bengathola. Wena thandaza ukuthi ingafiki kubona le ndaba.”

“Asithembe kanjalo kodwa uma ngikhuluma iqiniso amathuba mancane kakhulu.”

Usuku lonke uyagula uNelisiwe. Ngapha ubuye ahlanze. Nasemoyeni akekho kahle. Aphume aye esitolo efuna amaphilisi ekhanda. Uyawezwa amehlo abantu embuka njengoba ehamba.

“Uyena lona obesina ingoma kudlala igqomu!” Kusho amantombazane ehleka.

“Iqaba lasemakhaya,” kuphendula omunye.

“Asimshuthe sitshengise abantu ukuthi uvuke enjani namuhla,” kusho omunye emshutha.

“Ningishuthelani?” kusho uNelisiwe ngokudinwa.

Bavele bamhleke kakhulu. Asuke ngejubane ethi uphindela endlini. Izinyembezi ziyazehlela manje.

“Neli, ukhalelani?” kubuza uSizwe.

“Angifuni ukukhuluma,” kusho uNelisiwe.

“Asambe siye endlini yami ngizokunika into ezokudunga umqondo ukhohlwe izinsizi.”

Bafika endlini uSizwe abophe insangu.

“Angikwazi ukubhema mina,” kusho uNelisiwe.

“Ngizokufundisa. Uma usubhemile angeke usacabanga ngale vidiyo ekuphethe kabi.”

“Nawe uyibonile?”

“Wonke umuntu uyibonile lana esikoleni. Kodwa kuzodlula, ngesonto elizayo kuzobe sekuvele esinye isigigaba.”

“Bengingazi ukuthi le ndawo igcwele unya olungaka. Uma abazali bami bengathola ngale vidiyo ngizongena enkingeni.”

“Usukhulile manje nawe kumele uzenzele izinqumo. Uzenzele awakho amaphutha bese ufunda kuwona,” kusho uSizwe.

“Ngiyabahlonipha abazali bami futhi angizimisele ngokubadelela.”

“Nami angisho ukuthi iba ihlongandlebe. Ngithi kumele uphile impilo ngendlela oyifunayo ngoba uzoguga bese uyasikhalela isikhathi osimoshile ngokuphila impilo ethandwa yibo kunokuthi uphile impilo yakho.”

Ngesikade aqede ukushuka insangu uSizwe. Nebala amfundise ukubhema. Aqale akhwehlele uNelisiwe kodwa agcine esekwazi. Uhleka yedwa uNelisiwe ugqolozele udonga. Nakhuya sebeqabulana noSizwe. Insangu yavele yamzelisa emuva kwalokho walala ja. Uphaphama nje sekuphakathi kwamabili.

“Isikhathi sini manje?” ebuza kuSizwe.

“Kuphakathi kwamabili,” kuphendula uSizwe ehlezi esihlaweni.

“Sengilale isikhathi esingakanani?” kubuza uNelisiwe.

“Usulale amahora ambalwa nje. Kulungile, woza ngikuphelezele.”

Afike endlini ageze, angene engutsheni. Ufika nje uZandile usecime ngisho ugesi.
“Awusasho uma usuqomile,” kusho uZandile evusa ikhanda.

“Asithandani noSizwe singabangani,” kusho uNelisiwe ehleka.

“Ungahlala nomngani kuze kube yilesi sikhathi? Musa ukuqamba amanga.”

“Asithandani akaze asho ukuthi uyangithanda, Zandile.”

“Angisho lutho, bengibuza nje.”

Kuvele kubuye imicabango. Acabange ngoSizwe nangendlela amqabule ngayo.

Sitshele umbono wakho: Yini eyenza abantu babe nonya olukhulu kuma-social media?