E rile ge a le gare a dutše a le noši ka moo morago ga khaontara, a itshorela cider ya gagwe, monagano wa Mathabo wa fofela morago tšatšing lela a kopanago le mogale yoo wa gagwe, Peter. O be a ituletše ka tlase ga mohlare wa gagwe wa mmamoratwa thoko ga noka – lefelo leo a bego a hwetša khutšo gona ka dinako ka moka ge batswadi ba gagwe ba be ba thoma go lwa.

Go be go bonala eke ga o sana lerato magareng ga bona, gobane ba be ba ngangišana ka sengwe le sengwe: se se nnyane, se segolo goba sa botlaela fela go no swana le ge eba dijo di apeilwe ka nako goba fela ge eba ba šomišitše lentšu la maleba ge ba boledišana.

Esego gore dilo di be di le bjale bjalo go tloga kgale. Aowa. Tšohle di thomile ngwaga wa go feta ge tatagwe a tla thoma go robala dithabeneng mafelelong a beke ye nngwe le ye nngwe, seo ke se a bego a se bolela. Ga nnyane, ga nnyane, hlompho yeo mmagwe a bego a šetše ka yona e ile ya fokotšega. Metlae ya fela magareng a bona gomme le poledišano ya sesefala. Mmagwe o ile a thoma go fetša bontši bja mašego a gagwe ka phapošing ya baeng, kudu ka Lamorena le Mošupologo, ge tatagwe a satšo boa gae.

“Mathabo, botša tatago gore a gona dijo ka foritšing,” mmagwe o be a tla realo, a bolelela godimo go kgonthišiša gore tatagwe o a mo kwa.

Mathabo o be atla utswa tatagwe ka leihlo mola ba tekile tafola ba e ja motepa. Seo ke sona ba bego ba se ja go tloga ka di 15 go fihla ka di 27 tša kgwedi ye nngwe le ye nngwe, ge tatagwe a tlabe a gola. Eupša ge e le matšatšing a, ba be ba šetše ba no ja motogo woo go fihla kgwedi e fela gobane mmagwe o be a swanetše go lwela sente ye nngwe le ye nngwe pele tatagwe a ka mo fa yona.

“Mathabo, botša mmago wa sebodu gore basadi ba bangwe ba a itšhomela. Ga ba no hlwa ba pšarame mo gae ba letile gore banna ba bona ba ba fe tšhelete. Ye ke 20^th century. Basadi ba thuša banna ba bona go fepa malapa a bona,” tatagwe o be a tla fetola, le yena a bolelela godimo.

E be e tla re pele Mathabo a ka bolela, mmagwe a lahlela ya gagwe phetolo: Ge nkabe ke ile ka tseba kgale! Ka se dumelele ngame ya monna e ntshepiša legodimo le lefase go fihla a nkimiša mola ke sale sekolong. Mohlongwe ke be ke tla be ke ile ka ya yunibesithi gomme ka šoma bjale ka basadi ba bangwe. Ka fao ke maikarabelo a yena monnanyana yoo wa gona go ntlhokomela. Ke nyaka tšhelete ya korotsari. Tlogela go hlwa o mpotša ditšie badimo ka gore ka moka re tseba mo tšhelete ya gago e felelago gona.”

“O nyaka go reng, mosadi towe wa setlaela?” tatagwe o be a tla fetola thwii, a ntšha muši ka dinko.

“Nnete e a baba, akere?”

“Ke nnete ya selo mang? Which truth?” tatagwe o be a tla botšiša, gabjale a eme le ka dinao, matsogo a gagwe a fofa moyeng. “Tlogela go hlwa o nratharathela ka dilo tšeo o senago nnete ya tšona, mosadi towe.”

“Mpsst! O nagana gore ke setlaela? Ke tseba tšohle, papa. Efela tšatši le lengwe le tla go hlabela. Ke tla o hwetša. Ke tla o tsentšha mahlo a batho, gammogo le lona letlakala lela la gago. Jezebel!”

“Homola, mosadi towe! O se ke wa nyaka go ntiriša diphošo!”

“Diphošo tša selo mang? Batho ba a bolela ka mo ntle, Papa. Ke tseba dilo ka moka. O ipitša monna? Monna wa selo mang?”

Seo e tla ba e le gona ge maroga ao Mathabo a bego a sa nyake go a kwa a thomile. Mantšu ao a bego a sa tshepe gore a ka a kwa go tšwa melomong ya batswadi ba gagwe – gobane ba be ba hlwela ba mo soba molomo wo, ge a be a ka a botša ngwana yo mongwe mola a be a sa le yo mo nnyane.

Ke ona mantšu ao a ilego a mo kgoromeletša lebopong la noka, lefelo leo go bego go rena khutšo fela, moo dinonyana di opelago ga monate, e lego tšona bagwera ba gagwe ba le noši.

Eupša tšeo ka moka di ile tša fela ge Peter a fihla, a ipethela molodi a le gare a ekišetša mmino wa kwaito sellathekeng sa gagwe, a itshepelela a le noši.

“Ao! Dumela ntwana. Kganthe o na le maoto? Gape se se ra gore o a phela, mos?” Peter o ile a myemyela, dikoti marameng di tšwelela sefahlegong sa gagwe. “Eish! O nyakile o ntahla fase ka pelo, wa tseba.”

Mathabo o ile a phumula meokgo ya gagwe, a retologa, a duma eke Peter a ka mo tlogela a le noši.

“Ke tšere lebakanyana ke nagana gore ke bona mmamogašwa, wa tseba. Ke ra yona kgošana ya meetse. O selo se sebotsebotse seo nkilego ka se bona mo lefaseng, girl. Na leina la gago o mang?”

Mathabo o ile a mo utswa ka ntlha ya leihlo. O be a eme ka dinao ebile a tiile. Letlalo la gagwe le bonala le le boreledi ebile a kutile le meriri. E be e le la mathomo a mmona. Go be go le molaleng gore ba be ba sa tsene sekolo se tee.

“Etla sweetheart. Ntshware ka letsogo. Ga ke lome. Nka nagana bjang go kweša lengeloi la botsana bjale bohloko? Etla. E no ntirela letšatši ka go kgoma letsogo le la ka. Nthabiše, hle,” Peter o ile a realo ka myemyelo, a mo lebeletše ka mahlo a mannyane. Mathabo o ile a bososela ga nnyane, ka dihlong. “Wow,” a tšwela pele, a lebeletše legodimong. “O bone? Gape le letšatši le ile la ba la binabina ge le bona smile seo.” Mathabo o ile a hwa ka disego, a mo lebeletše. “Ke nna Peter. Ke dula mola Block A. Wena o mang, letšobana la ka?”

O ile a tšokotša letsogo la gagwe ka boleta, a myemyela. “Mathabo. Ke tšwa Block F.”

“Oh! Block F, ne? Ke a bona. Gora gore o tšwa lapeng la bahumi, mos,” Peter o ile a realo, a dula bjanyeng thoko ga gagwe.

A mo lebelela ka phatla ya go rokagana. “Why?”

“Come on. Ka moka re a tseba gore ke bahumi fela bao ba ka kgonago dintlo tšela tše di kgolo tša moo,” Peter o ile a hlaloša, a le gare a lahlela maswikana ka nokeng. “Wow! Lefelo le le cool, mos. Theeletša dinonyana tše. Na ekaba o tla mo gantši?”

“Ee. Gabotsebotse, le ke lona lefelo le ke le etelago ge …” o ile a realo a fetša a homola, a sa tshepe gore o nyakile go botša mofeti wa tsela mathata a ka gabo.

“Ke a le rata lefelo le, man. Straight.” O ile a homola, mahlo a gagwe a tsemile mahlakanokeng ao a bego a le ka thoko ga noka. Mathabo o ile a mo lebelela ge a le gare a sepela a lebile meetseng. Kwankwetla ka nnete, o ile a ikwa bjale, a ipotšiša gore o nyakana le eng, ge a bona a kwatama.

Ya ba o a emelela, matsogo a gagwe a fihlile selotsoko ka morago, a le gare a mmatamela ka myemyelo. Ntle le lentšu, a hlaba khuru fase, letsogo la gagwe la mmagoja le dutše godimo ga ye nngwe, a mo fa letšoba le le serolwana.

A napa a re: “Go mmakgoši wa ka. Le yellow bone la ka. Na o ka thabela goba lekgarebe la ka? Ke a tshepiša gore ke tla go hlokomela goya go ile, wena lerapo la pelo ya ka. Ke tla o dira mmakgoši wa pelo ya ka, babes. Mmm?”

Re botše: Naa e kaba o rata ditiragalo tša marato tša go tsenelela bjale ka tše? Gona o ikwa bjang ka mantšu a ‘yellow bone’?