Boitumelo le Lethabo ba ile ba duma ge nkabe ba na le tšhelete e ntšinyana. Ba ile ba kwana ka gore ba swanetše go nwa gannyane gore R200 yeo ba bego ba e swere e kgone go dula sebakanyana. Boitumelo o ile a ba a tla ka kgopolo ya go rekiša sešupanako sa gagwe, eupša Lethabo a ba kgahlanong le mogopolo woo.

“Ye ke mpho ya gago ya matswalo, monna. O ka se e rekiše. Ke duma ge nkabe le nna go na le motho yo a ka nthekelago mpho ya go swana le ye. Hai! Go ba tšhiwana ruri… Ke ipotšiša gore ke tla ba ka kgona le go ya Unibesithi na. Ke duma ge nkabe batswadi ba ka be ba sa phela, wa tseba…” Lentšu la Lethabo le be le le fase.

“O se ke wa wara, bra. A re kgolwe gore tšohle di tla sepela sharp.”

Boitumelo ga se a rata go tšwetša kgang yeo pele. Go be go tla diregang ge a be a ka bolela selo se sempe gomme a kgopiša mogwera wa gagwe? Tšhelete e be e se bothata ka gabo. Tatagwe e be e le moentšinere ebile e le rakgwebo mola mmagwe e be e le Hlogo ya sekolo. Go molaleng gore ba be ba ka kgona go mo lefelela Yunibesiti ye nngwe le ye nngwe yeo a e kgethago, lefaseng ka bophara. O ile a kwela Lethabo bohloko ka gobane a tseba gore o be a itshepetše mphiwafela wa makgoloa’gwe.

E rile ka 5. 30pm ba goroga thabeneng yeo e bego e tshotshoma. Go be go tletše makgarebjana ka moo, ba setše ba swere mahlo a tšhipa. Boitumelo le Lethabo ba ile ba leba khaontareng go yo reka dino, gomme ya ba gona a mmonago. O ile a kwa eke o a lora. A sefahlegwana sa botsana sa boreledi. Mahlo ona! Pelo ya gagwe ya rothotha ka lebelo e le ge e eme tse! Kgarebjana yeo le mogwera wa yona ba be ba dutše khaonthareng, bobedi ba swere dinotagi tša swikiri ka matsogong, ba ipolelela ebile ba sega. Kgarebjana ya senakangwedi e ile ya myemyela le yena gomme le yena a bušetša myemyelo yeo morago, a le gare a šišinya seatla sa gagwe ga nnyane. Napile gwa direga semaka. Lekgarebe la emelela gomme la gogela maoto mo ba lego, mahlo a lona a tsepeletše yena fela. Eupša la fihla la no mo tabola gomme la tšwela ka ntle.

“O letile eng? Mo late. Follow her, bra. Ke tla hlakantšha dino nyana. Wena mphe fela tšhelete yeo.” Lethabo o be a myemyela.

Boitumelo o ile a šušumetša makgolo a mabedi a diranta ka seatleng sa Lethabo gomme a retologela lebating. O ile a thuthumela e le ge a latela kgarebe yeo bophakelong bja difatanaga. Kgarebe e be e ithekgile ka kota, e phuthile matsogo.

Pelo ya Boitumelo e ile ya tlola ge a kopana le mahlwana a gagwe a go nyedima.

Mafelelong o ile a kgona go gapeletša lentšu go tšwa mogolong wa gagwe wo o bego o thibane. “Hi! Leina la ka ke nna Boitumelo… Ke kgopela gore o mpotše gore ga se wena morongwa, hle… Gape nka se kgone go otswa le lengeloi.”

Kgarebe e ile ya myemyela, dikotimarameng di tšwelela sefahlegong sa gagwe sa boreletšana sa go taga.

“Ah! Smile sa gago, sesi, se bjale ka go hlaba ga letšatši morago ga bošego bjo bosoboso bja marega. O sebabola, princess! Mpotše fela leina la gago gomme nna ke tla go hlankela bophelo bjaka ka moka.”

Boitumelo ga se a kgolwa mantšu ao a tšwelego leganong la gagwe. Kgarebjana ye e be e mo dira se sengwe. Se sengwe seo a bego a šitwa go se hlaloša.

“Leina la ka ke Tshidiso,” o ile a fetola, a mo tsemile ka mahlo a makoto a go hlweka.

“OK! Tshidiso… The Princess. Na wena le mogwera wa gago le ka ntšoena? Ke na le mogwera wa ka, Lethabo. Re tla le rekela dino.”

Mantšu ao a bofelo a ile a no thunya go tšwa molomong wa Boitumelo. O be a tloga a ikemišeditše go dira se sengwe le se sengwe ka maatla a gagwe go thopa pelo ya lekgarebe le.

Tshidiso a dumela ka hlogo.

“Yes! Ke a leboga, moratiwa! Thank you!” o be a thabile la go makatša.

Ba ile ba boelela ka thabeneng, mehlamo ya bona eke ya bagwera ba kgale. Boitumelo o ile a ipotšiša ge eba seo ke sona se batho ba se šupago ge ba bolela ka leratorato, ka go hwetša mokapelo.

Sa go ba makatša ebile gore Lethabo o be a dutše tafoleng le mogwera wa Tshidiso. Go be go šetše go ena le pakete yeo e bego e tletše ka dinotagi tša swikitšhana gona moo tafoleng.

Boitumelo le Tshidiso ba ile ba dula le bona. E rile ge ba dula fase, Boitumelo a obelela gomme a topa letsogo la Tshidiso. Ka boleta!

“Ahh! Baratani ba go ratega ruri. You look good together, man!” Lethabo o ile a realo. Ka moka ba rutlumolla sesego.

“Lethabo, yo ke Tshidiso. Re sa tšo kopana ka mola ntle. Bjale naletšana ye o nago le yona ke mang? Na o ka se re tsebantšhe? O motho wa mohuta mang kganthe, man? O bjang na wena?” Boitumelo o ile a realo ka myemyelo.

“Oh! Tshwarelo, monna. Yo ke Leticia. Leticia, yo ke mogwera wa ka, Boitumelo.”

Leticia o ile a šišinya hlogo ka dihlong a le gare a dumediša Boitumelo ka letsogo.

“Ke thabela go go tseba, Leticia,” Boitumelo a realo.

“Go lokile. Mo tlogele pele kgarebe ya gago e thoma go nagana ka mokgwa o mongwe, mošaa. Ga re nyake go bona dihlase tša mollo, goba bjang?” Lethabo o ile a realo ka myemyelo a le gare a bula kotikoti ya madila.

Ka moka ba hwa ka disego.

Ka fase ga tafola, Lethabo o ile a šušumetša diranta tše masomepedi tša go momagana ka letsogong la Boitumelo.

***

Re botše: Naa o nagana gore “Mokapelo” ke eng?