“Ke a leboga, Groot Man. Thank you.” Lethabo o ile a emelela.

“Zane,” wa realo Zulu, “tsamaya le mfana yo.”

“Sure, Bra Zulu.”

“Ge a ka zama go founela maphodisa … o mo thuntšhe. Ke tla tšea setlaela se ka ya le sona kua sethokgweng ka le emela gona. Ge metsotso e masometharo e ka feta …” O ile a homola, a šišinya hlogo, meno a gagwe a lomagane.

“OK! Boza. Etla …A re vaye wena mpša.” Zane o ile a goga Lethabo ka hempe.

Boitumelo o ile a fošetša Lethabo dinotlelo tša sefatanaga.

O rile ge a hlaba senotlelo sa koloi, Lethabo a ipotšiša ge eba o tšere kakanyo e botse ka go aketša Zulu. O ile a bona Zulu a gogoiša Boitumelo go tšwa ka thabeneng gomme a mo kgoromeletša ka gare ga BMW.

“Hei! Drive wena man! Mpša!” Zane o ile a betha hlogo ya Lethabo ka mpama.

Difatanaga tšeo tše pedi di ile tša thakgoga ka lebelo, di lebile mathoko a go fapana.

“Hee wena, bari!” Zane o ile a goga sethunya gomme a se šupa go Lethabo. “O leka go dirang?”

Lethabo o ile a tšidifala. “Ke leka go lletša motho yo mongwe mabapi le tšhelete. Ke tla dira gore e bolele ka go hlaboša sepikareng. Ka kgopelo, hle monna!” o ile a rapeletša ka lentšu la makgwakgwa.

“O a hlanya, mfana! Seo se kotsi kudu. Wena otlela!” O ile a kiteletša sethunya hlogong ya Lethabo.

Lethabo o ile a kwa mala a gagwe a bofagana. O be a sa tsebe go ka a laelwa ka thoboro pele. Na o be a tla hwetša kae tšhelete? Gona Zane o be a ile go mo dira eng ge a lemoga gore ga gona tšhelete? O ile a ipotšiša ge e le gore o tla ba a tsoga a bone mogwera wa gagwe a phela gape. O ile a lakatša eke motho yo mongwe mola morago thabeneng a ka leletša maphodisa, eupša a gononwa ge seo se ka ba sa direga. Badudi ba motse wa gabo ba be ba tloga ba rata go itšeyela molao matsogong. Bontši bja batho go be go le molaleng gore ba dumelela gore seo Zulu a se dirago se be se lokile. Zulu o be a fediša mebetlwa e mebedi e menanana yeo e bego e sa tlile go hlakiša setšhaba tšatši le lengwe.

Sefahlego sa Lethabo se be se kolobile ka meokgo ge a emiša sefatanaga ka karatšheng.

“Ok. E re ke tsene ka gare ke yo tseya tšhelete. Ke a boa.” O ile a theoga koloing.

“Tlogela dinotlelo tša koloi,” gwa realo Zane. “Ge o hweditše tšhelete re boela sethokgweng ra yo efa Zulu. Ga o se nayo, Zulu o le thunya bobedi bja lena.”

Lethabo o ile a hwa bogašu. A ntšha dinotlelo tša ngwako wa ga boBoitumelo motšhokgong gomme a bušetša dinotlelo tša sefatanaga morago. O be a rapela gore Zane a se mo latele.

E rile mola a le ka ngwakong, a napa a kgotla dinomoro tša tatago Boitumelo. O be a thuthumela kudu mo a bego a šitwa le ke go kgoma dinomoro.

“Morena Lebelo. Ke Lethabo. Ke nyaka go o kgopela sengwenyana ka pela. O swanetše o transferele R5,000 ka akhaonteng ya ka gona bjale goba o ka se sa tsoga o bone morwa wa gago a phela gape. Re tla go hlalosetša ditaba ka moka ka morago. Boitumelo o dirile selo se se mpe, efeela ga a swanela go se lefela ka bophelo bja gagwe.”

“Oh, Modimo wa ka! Aowa! Tše ke ditaba tše di mpe! Mogatšaka ke kgale a nagana gore go na le bothata. Nka se go botšiše dipotšišo tše di ntši, Lethabo. Tšhelete e tla fihla gona bjale. Ke kgopela o nteletše gape o mpotše ge dilo di lokile.”

Lethabo o ile a hemela godimo ka go imologa. “Ke a leboga, Morena Lebelo.”

Ka morago ga metsotso e se mekae, sellathekeng sa tsenya molaetša. Tšhelete e be e tsene ka akhaontene ya gagwe. O ile a kitimela morago sefatanageng.

“Ke hloka fela go ema ATM mo tseleng,” a realo go Zane. “Re šomišitše ye nngwe ya tšhelete. Ke swanetše go ntšha ya go tlaleletša.”

“O tloge o kgonthišiša gore Zulu o hwetša tšhelete ya gagwe ka moka. Kgwele e ya dinong!”

Metsotso ye masometharo e be e šetše e fela ge Lethabo a emiša sefatanaga kgauswi le sethokgwa seo se bego se le kgauswi le sekolo se sephagamego seo se bego se omile. Boitumelo o be a kwatame fase lekgwareng. Zulu o be a mo šupile ka thoboro hlogong.

“Ke swere tšhelete!” Lethabo a goelela, a kitimela go Zulu. “O se ke wa bolay thuthumela a mogwera wa ka!”

Ganyenyane-ganyenyane, Zulu o ile a iša sethunya tlase.

“E tliše!” a realo.

Lethabo o ile a mo fa sehlopha sa tšhelete ya dipampiri gomme Zulu a e bala goba go fihla a kgotsofala ka moka ga yona.

“Le se sa leka la nthalokela gape!” gwa realo Zulu.

“Re ya go tshepiša, Groot Man! Re ka se sa tsoga!” gwa realo Boitumelo, a tšholla meokgo ya go imologa.

Zulu o ile a gwantela koloing yeo e bego e eme ka tlase ga mehlare wa Merula mafelelong a lešoka gomme sefatanaga sa ja fase ka gare ga leru la lerole. Ge e le Zane yena o ile a timelela ka gare ga mehlare.

“Ke swanetše go go iša sepetlela, bra,” gwa realo Lethabo. “Gape o tloga o papatlilwe.”

“Ga ke tsebe gore nka go leboga ka eng, monna? Gape o phološitše bophelo bja ka.”

Boitumelo le Lethabo ba ile ba gokarelana. Ba be ba sena mantšu.

***

Re botše: Naa o nagana gore Lethabo o phološitše bophelo bja Boitumelo?