Tseleng ya go ya gae, ka molomo wo o tletšego dimonamonang, Phumlani o eta a binabina seetšeng sa ngwedi diterateng tša lerole tša Phomolong, a le gare a opela koša ya go tuma ya Mama Afrika. A hlahlamola sesego ge a gopola ka mo mosadi yola a beilego letagwa lela la go mo ferega madulong a lona ka gona. Leitšibolo la Doris le tloga le rata batho ba go tagwa kudu gobane ka mehla ba iphetoša ditlaela ebile ba kgahliša. Eupša go šošobanya sefahlego ga uMalume o be o sa tšwe kgopolong ya gagwe.

“O ja eng?” Lindokuhle a nyaka go tseba, e le ge a nkgelwa ke di toffee tša chocolate moyeng wa buti wa gagwe.

“Kahle wena!” mmagwe a kgalema. “En den?” Mmagwe a realo a itshwareletše dinoka. Go be go sa hlokege gore a feleletše lefoko leo gore Phumlani a kwešiše gore o nyaka go tseba moo Uncle Charles a lego, le maikemišetšo a gagwe a go boa gae.

“Mama, ke tla boela gape. Mohlomongwe o itukišeditše go ka boa gae bjale,”

E rile ka nako ye mošemane yoo a etšwa la bobedi ya ba nako e batamela goba 21:30. O šomiša monyetla wa ge mmagwe a sa palelwa ke go tšea sephetho (sebaka se sa le gona) mola ka go le lengwe a ipshina ka tatšo yeo e sa humanego bonolo ya bophelo bja bošego bja Phomolong. Eupša botengteng bja gagwe o be a bile a sa dudišege ka go tshwenyega moo o sa hlalošegego, maikutlo a go se kwešišege ao a bego a ka se a šikinye.

Doris, a letile gae, o tloga a na le thulano ka gare. Ka go le lengwe o be a dirile tshepišo go mogwera wa gagwe, Buhle, gore o tla hlokomela Charles, kudu ka bolwetši bja gagwe bja bjale. Buhle o bjalo ka sesi go yena ebile ba botšana dilo ka moka. Monna wa Doris o be a hlokofetše mengwaga e se mekae ka ge sebete sa gagwe se be se palelwa ke go kgotlelela boima bjoo bo hlotšwego ke go nwa kudu kgafetšakgafetša. Yeo ebile nako ye boima kudu bophelong bja gagwe. A gopola ge a nagana: Na ke ile go godiša bana ba bjang ke le noši? Ga a nyake go bona Buhle a le ka gare ga maima a go swana le ao.

Eupša ka go le lengwe a ikwa a itshola ka go roma mošemanyana wa gagwe yo mogolo ntle go yo nyakana le monna wa maledu. Ee, Sis’ Buhle ke mogwera wa gagwe wa hlogo ya kgomo. Ee, o leka go bontšha botho, eupša monna wa gagwe yo a šetšego a ithobaletše o be a ka se dumele gore yo mongwe wa bana ba gagwe ba gereme le mebila ka nako efe goba efe ya bošego go gopotšana le monna wa maledu ka maikarabelo a gagwe.

“Go lekane!” Doris a ipotša a le noši e le ge a betha tafola ya ka khwitšhing ka lesela la dibjana mola Phumlani a tsena.

“Mama umalume o rile…”

Ka letsogo la gagwe leo le emišeditšwego godimo mo ekego o be a le kgauswi le go hlatsela a tsena morwa wa gagwe ganong gare ga lefoko.

“Ga ke kgathale! Mošemane wa ka, o dirile go tlala seatla ebile ke maswabi go go tsentšha ka gare ga tše ka moka.”

Kgopolo ya go akanya leeto le lengwe ya bonala le semeetseng gore ke ya botlaela ge Phumlani a lemoga dintši tša mmagwe tšeo di emišitšwego, leswao la go bontšha gore o ka se sa ba le poledišano ye nngwe ka taba yeo.

“Go lokile Mama,” a realo a gokara mmagwe gomme a itukišetša go ya malaong, a sa ikwa a imetšwe.

***

Re botše: Naa o nagana gore Doris o dirile gabotse ka go roma morwa wa gagwe go nyakana le Charles?