NguMgqibelo ekuseni. UFezile noLindani balele ubuthongo ubumnandi. ULindani naye akayanga emsebenzini namuhla. ULindani unebhizinisi lakhe. Esitolo sakhe kudayisa impahla yasendlini. Lelibhizinisi waliqala ngonyaka wakhe wokuqala eshadile. Kulelisonto ubematasa ngoba bekulungiswa ibhilidi lesitolo sakhe. UFezile ushaqekile uma ebona uLikho efika ehlanzekile esikoleni futhi ephethe nomphako. Kusho ukuthi unina walibona iphutha lakhe. Lokho kwamjabulisa kakhulu uFezile.
“Ngqo! Ngqo! Ngqo!” kumemeza umuntu emnyango ngolaka.
“Ubani manje lowo?” kubuza uFezile ngezwi eligcwele ubuthongo.
“Angazi. Kukhona yini umuntu omlindele?” kubuza uLindani esukuma egqoka.
“Cha akekho umuntu engimlindele.”
Wancede wavula unina wangena nezicabha.
“Nilala kuze kuphume ilanga?” kubuza uMaMfeka.
“Mama ubungasho ngani ukuthi uyeza sikulande. Futhi sikulungiselele nekamelo lakho lokulala ukuze unethezeke,” kubuza uLindani ecikica.
“Indlela yokubingelela umzali wakho leyo? Inhlonipho ayisekho?” kubuza uMaMfeka.
“Ngiyaxolisa mama ukuthi bengingakulindele. Uyaphila kodwa ntombi endala,”
“Uma ungibiza ngentombi endala phela uyangigugisa. Ngisemusha kabi mina engathi ukhohliwe ukuthi wena uzalwa intombi,” kuncokola unina.
“Mama wena uhlezi ukuthi ufuna abazukulu kodwa awufuni ukuguga,”
“Nabo abazukulu bazobona ukuthi banogogo osemusha,” kuhlela uMaMfeka.
Wavuka wenza isidlo sasekuseni uFezile. Walideka ngokudla okunhlobonhlobo itafula.
“Ukudla okungaka makoti!” kubabaza uMaMfeka.
“Ngifuna nidle nisuthe ma,” kuphendula uFezile eshalaza.
“Ngeke sikuqede ukudla okungaka. Kuyoze kusale siphinde sikudle emini.”
“Kulungile ma uzodla ushiye uma ususuthi.”
“Makoti, siyavuka njalo kusasa. Kumele sihambe ekuseni kakhulu kungaze kugcwale,” kusho uMaMfeka.
“Siyaphi ma?”
“Siya enyangeni ukuze uzale izingane zigcwale igceke. Phela umdala uma ungaka lomuzi kumele wande. Angithi uzokwakha umuzi awuzile ukuzowubulala?”
“Ngizowakha ma, kepha angithandi ukuya enyangeni,” kusho uFezile.
“Ucabanga ukuthi ngiyakucela?”
“Ma!” kusho uLindani.
“Thula wena Lindani, wayengathini uyihlo ukube usaphila ezwa kuthi washada inyumba?” kubuza unina ngolaka.
“Usungaze ungithuke kangaka ma?” kusho uFezile edikila ehamba.
“Usuyadikila njalo? Wena Lindani kusamelwe uganwe, akumfazi walutho lokhu,” kusho uMaMfeka.
“Ma, ngiyakuhlonipha impela ngicela uyeke ukukhuluma nomfazi wami kanjena.” Kusho uLindani esukuma elandela uFezile.
“Iqiniso liyababa kodwa!” kusho uMaMfeka.
Yize wayengafuni ukuya enyangeni uFezile kodwa wagcina evumile. Ushayela akuvumi nokuthi akhulume. Usekhathele ukuthukwa ngumamezala wakhe. Ubone kugcono aye enyangeni ukuze aqede ukukhuluma.
Nebala bafika Emlazi kwaD. Bafika ungemude ulayini. Lomuzi unendlu yesakhiwo bese kuba nolawondi wokusebenza abantu. Yathi inyanga akangene yedwa uFezile.
“Ngingakusiza ngani?” kubuza uNjeko inyanga.
“Ngifuna into ezongisiza ngithole abantwana. Kade ngizama ngiyehluleka,” kusho uFezile.
“Uzimisele ukuthola abantwana?” kubuza inyanga.
“Ngingenza noma yini baba,” kusho uFezile.
“Ungathini uma ngingathi buya usuhamba wedwa mina ngikunike umntwana,” kusho uNjeko.
“Cha baba ngifuna ukuba nengane nomnyeni wami,” kuphendula uFezile ngokwexwaya.
“Nami bengizidlelela. Ngizokunika umuthi wokuphalaza nowokuchatha. Uzovuka njalo ekuseni lingakaphumi ilanga,” kusho uNjeko ebopha imithi.
“Kumele ngiwusebenzise izinsuku ezingaki baba?”
“Izinsuku eziyisikhombisa. Mina eyami imithi iyasebenza akuyona imphuphe yemithi. Kuzophela izinyanga ezimbili usukhulelwe. Ushiye uR350 ecansini,” Kusho uNjeko emnika isijumbane esigcwele imithi.
“Ngiya-”
“Akubongwa!” kuphendula uNjeko enikina ikhanda.
Sitshele umbono wakho: Ucabanga ukuthi uNjeko uyazi ukuthi kungenzeka kube ukuthi inkinga yokungabatholi abantwana ilele kuLindani?