Ke mabaka a mantši a go befediša. Nolitha o ile a thekga hlogo ka setulo sa ka morago ga gagwe gomme a tswalela mahlo. Ditiragalo tša letšatši tša bopa kholatše ya go hlakahlakana ka kgopolong ya gagwe. Lentšu la Mna Mahlangu, la go gwaša le go gatelela. “Mohumagatšana Solani moratiwa wa ka, itshware hle.” Baithuti ba masomehlano ba pitlagane ka phapošing ya borutelo ya go hlomesetšwa ye nnyane, ba tlabegile, gomme ba befetšwe. Mothaladi wa maphodisa, ba emišitše melangwana. Buti wa gagwe Vuyani, sefahlego sa gagwe se maketše. Nolitha a šikinya hlogo ya gagwe go sebopego sa mafelelo. O be a lapile kudu go nagana ka buti wa gagwe, go tshwenyega ka seo a ka bego a se bolela go mmagwe gona bjale.
Efela dibopego tša tswela go tla, di mo tlaletše. A ikwa a fiša kudu, a hwibitši, a tshotshoma ka pefelo.
Pefelo ye kaaka, e agelela. Go nyakega selonyana se se nnyane, go tsošološa pefelo yeo e tletšego ka gare ga gagwe. Go nyakega hlasenyana e tee feela.
Labobedi, 9 Febereware 2016
8.30 p.m.
Beteri ya ka. Nolitha texted Jama. Ga go sa šetše ye ntši.
O mokae, Nols? Ke kgale re eme mosegare ka moka.
Re išwa kua le kua, a tlanya ka potlako. Re gohle, mo gohle. Go otlela go kaone gabjale. Go ya fase. E sego tšela tša bogaswi. Ke nagana gore re ka no ema e se kgale.
Diriša GPS ya gago, Nols, ka pela ka mo o kgonago.
Ka nnete! Botlaela bjo bokaaka. Seo se tla ba botša gore ba gokae. O ile a gaša mahlo go mo dikologa. Baithuti ba be ba homotše gabjale. Ba lapile ebile ba tšhogile. Fugile o robaditše hlogo ya gagwe diropeng tša Bonelwa, mahlo a gagwe a tswaletšwe, mohemo wa gagwe o le tlase. Hlogo ya Babalwa e tsene gare ga dikhuru tša gagwe gomme Nolitha o be a bona gore mosetsana o sa lla. A lebelela sešupanako sa gagwe. 8.30 p.m. gomme go be go šetse go swifala. Ba swanetše go ba ba ema e se kgale.
A bula Mebepe ya Google gomme melokoloko ya mebila ya tšwelela. Gomme kua – sekhutlwaneng – setiši sa maphodisa. Nolitha o be a sa tsebe gore a thabe goba a tšhoge. Ruri leeto le la sekatapowana le swanetše go ba le fela, efela ke eng sa go latela seo se tla hlagago?
O ile a romela molaetša ka potlako wa WhatsApp go Jama a mo fa ditaetšo. 13% mogala wa gagwe o ngwadilwe, molaetša o fetišitšwe.
Karabo ya gagwe e boile ka pejana.
Re tseleng, Noli. O se ba dumelele go latofatša motho go fihlela re fihla fao.
Gabotse!
Ka pejana ge Nolitha a se no kgotla Romela bene ya ema.
Molaetša wa mafelelo wa gadima wa go tšwa go Jama.
Itshware, ngwana.
Nolitha a hwibila.
“Ngwana, Mohumagatšana?” Bonelwa o bone molaetša.
Dihlogo di emišitswe. Myemyelo ya tagafatša difahlego tša go lapa la mathomo letšatšing leo.
Sefahlego sa Nolitha se be se fiša ka go swaba. “Aowa, aowa, e no ba mmolelwana. O bolela seo go mongwe le mongwe.”
“Jooo jooo,” Fungile a tswinya. Nolitha o ile a lemoga go šweufala ga gagwe makga a mmalwa letšatšing leo, ka tlase ga mahlo a gagwe go le didiko tša go tsenelela. O be a myemyela ka lethabo. “Ke go boditše eng? Benditheni kuwe? Ke go boditše eng? Mohumagatšana wa go loka, wa botse, kudu, kudu go ka hloka monna wa go loka ka lehlakoreng la gagwe.”
Molaetša o mongwe o ile wa tsena.
Tshwarelo! Tshwarelo! Ga ke tsebe gore seo se tšwele bjang.
“O reng gabjale. Mohumagatšana?”
“Ayinamsebenzi. O se tshwenyege!” Nolitha a myemyela, gomme a gwagwalala ge a ekwa modumo wa go tingwa ga entšine ye nngwe. O ile a phakišetša go ema ka dinao tša gagwe gomme a hlodimela ka lefasetere la ditšhila. Bene ye nngwe ya maphodisa e eme kgauswi le ya bona. Ge a le gare a lebeleltše, ye nngwe ya goroga. E se kgale ka moka tše hlano di be di eme kgauswi le kgauswi.
“Cebo!” a goeletša ka leswiswing. “Cebo, naa o gona?”
“Ee, Mohumagatšana,” karabo ya kwagala go tšwa ka beneng ya kgauswi le ya bona.
“Ohhh.” Nolitha a boela pankeng, a thekgile dikeledi tšeo di bego di mo kgama mogolong. “Ga o tsebe ka mo ke thabilego ka gona go kwa lentšu la gago! Wonk’umnt’right? Naa bohle ba sa phetše gabotse?”
“Sefahlego sa Andi se rurugile kudu, Mohumagatšana.”
“Tšea diswantšho,” a bitša. “Fetišetša molaetša go ba bangwe. Tšea diswantšho tša dikgobalo dife goba dife. Botša ba bangwe gore ba ntsebiše ge eba ba phetše gabotse.”
A lebelela mogala wa gagwe. 7%. Akgaa! Ga go ka tsela yeo a ka diriša folaše. “Ke mang yo a swerego mogala fa?’
“Ya ka e fedile beteri, ke maswabi, Mohumagatšana .” Dalumuzi o be a swabile. “Ke lebetše go tšhatšiša ya ka mesong ye.”
“Ukhon’omye? Go na le yo mongwe?”
Babalwa a emiša hlogo ya gagwe. “Ya ka e lokile, Mohumagatšana.”
“’Naa o ka kgona go tšea seswantšho sa leoto la Wezi?”
Mogala o ile wa gadima gane.
“Mosetsana wa go loka! O šomile. O dirile seo ke go boditšego gomme wa boloka beteri! O re thušitše kudukudu ka moka, Babs! Kudukudu.”
***
Re botše gore o nagana eng: Ke ka lebaka la eng o nagana gore maphodisa a be a otlela gohle mo ka bona lebaka le le telele gakaaka?