Sefahlego sa Babalwa se be se phadima, gomme a sega – ka go thothomela, efela e be e le sesego. “Ke kgona go latela melao kudu, Mohumagatšana. Ke ka lebaka leo batswadi ba ka ba ka se kgolwego se.” O ile a lebelela Fungile gomme a šunyalala. “Ke tšeye gape Fungile, Mohumagatšana? O lebelelega gampe.”

“E loketše boitshepo bja ka, Babs.” Fungile a ntšhetša mantšu ka ntle.

“O nagana gore ke tla kgona go fihla dipampiring, Mohumagatšana?”

“O tla kgona ge eba go sa laola naa. E no tšwela pele ka go hema, Fungi, gabotse ka go nanya, gabotse ka go nanya.” O šetše a rometše Jama molaetša, gomme a romela o mongwe go no mo gopotša, a rapela gore o tla fetišwa.

O se lebale pompo le tša go pantetša.

Karabo ya Jama ya boa ge mabati a bene a bulega.

Dilo ka moka di lokile. Re a fihla e se kgale. Mo botlalokgolong bja metsotso ye 5.
Labobedi, 9 Febereware 2016
8.55 p.m.

“Mohumagatšana?” Dipara tša mahlo a šupa di be di mo lebeletše.

“Re phetše gabotse,” a realo go baithuti ba gagwe. “Ke a tshepiša. Re na le batho bao ba tlago fa gomme ba tseba molao. Ba tla šireletša ditokelo tša rena, le ge e le gore bontši bjo ga bo dire bjalo. Gabjale, le gopole, o fana ka leina la gago le aterese ya gago ya gae fela, e sego go feta fao. Ba ka no re latofatša, ba ka no se dire bjalo, efela mogwera wa ka Jama o tla swaragana le tšeo. O tseba tshepedišo ka botlalo. A ka se ba tlogele ba le hlalefetša.”

A lebelela lebating la setiši sa maphodisa. Vuyani o be a eme fao. A mmogetše ge ba mo utlautla.

“Go ka lekana diiri tše senyane re le ka beneng ya maphodisa,” a bitša. “Naa Mma o ile go reng ka seo?”

Buti wa gagwe a šikinya hlogo gomme a tloga.

“O palelwa le ke gore tshwarelo,” Nolitha a hebehebetša ka morago ga gagwe.

“Mohumagatšana!” Cebo o be a le kgauswi le yena. “Naa ke yena yola? Mogwera wa gago?”

Jama o be a eme lebating, ditrete tša gagwe di bonagala mo leseding la go kganya. “Ga ke na taba,” o be a bolela. “Ke ile go bolela le yena.” O ile a fohla tsela molokolokong wa baithuti, a bala dihlogo ge a sepela.

“Bana ba bannyane ba masometharo-šupa?” a realo, lentšu la gagwe le kwagala le maketše. “Lena mathaka le golegile bana ba bannyane ba masometharo-šupa? Banna, dikuranta di ile go rata ditaba tše.” O be a le kgauswi le Nolitha gabjale, gomme letsogo la gagwe le legolo le mo swere ka boleta. “Ka lebaka la eng ruri?” O ile a lebelela morago ka godimo ga legetla la gagwe, a bitša motho yo mongwe yo a bego a eme lebating. “Ngenani. Tsenang, mathaka.”

Monna wa maledu a tsena ka gare, khamera ye kgolo e le legetleng la gagwe.

“Etšwang!” Nolitha o ile a lemoga lephodisa leo le bego le goeletša ka mekafouneng. “Se ke thoto ya maphodisa. Phuma! Etšwang!”

“Mamela, maan. Theeletša, monna.” Jama a bolela ka bonolo. “Taba ye e swerwe gampe kudu ka mo go bego ka gona. Naa o nyaka e mpefala go ya pele?”

“Tšea khamera ya monna yola!” Mare a ile a gašagana ge lephodisa le goeletša. “E tšeye gona bjale.”

Efela go be go na le mmegi yo mongwe wa ditaba ka phapošing gabjale, le gape yo mongwe.

“Mohumagatšana, Mohumagatšana?” Yo mongwe wa bona a goga šedi ya gagwe. O ile a šukumetša maeke ka pele ga sefahlego sa gagwe. “Naa tše ka moka di thomile bjang?”

“Go thomile ka lekase la dipuku, Nolitha a bolelela tlase. “Seo re bego re se nyaka feela e be e le lekase la dipuku le dipukunyana.”

“Etšwa!” gwa goeletša lephodisa gape, gomme Jama a sega.

“Le hweditše tšohle, mathaka?”

“Joo, ee,” yo mongwe wa babegi ba ditaba a sega.

“Gona kitima!”

Babegi ba ditaba ba tšwa ka phapošing ka lebelo gomme ba kitima go selaganya jarata.

Gomme gwa fetša ka tsela ye:

  • Pego ya Ditaba tša Sehlweng tša baithuti ba masometharo-šupa ba dutše lebatong la setiši sa maphodisa ba homotše.
  • Dipotšišo go bahlankedi ba mmušo ba šitwa ke go hlaloša gore ke ka lebaka la eng sekolo se se na didirišwa tša maleba.
  • Dipotšišo ka go se be gona ga Hlogo ya Sekolo Mahlangu, la mathomo o bonwe a namela sefofane kua Boemafofaneng bja Boditšhabatšhaba bja Kapa Bodikela, la bobedi o bonwe a golegwa Boemafofaneng bja Boditšhabatšhaba bja Oliver Tambo, a lebile London.
  • Cebo ya ba yena mmoleledi wa mokgatlo o moswa wa baithuti.
  • Baithuti ba go tšwa dikolong tše dingwe ba botšišwa ka maemo a bona gona fao.
  • Dihlopha tša dikhamera mafelong, di ba latela ge ba ba šupetša ka maemo ao ba swanetšego go ithuta ka tlase ga ona.
  • Gomme, sa mafelelo, sefahlego sa Nolitha se tletše ditešing tša ditaba tšohle, tša selegae le tša mošetša, a lapile, lentšu la gagwe le le makgwakgwa, a re: “Go thomile ka lekase la dipuku le dipukunyana. Seo re bego re se nyaka feela ke lekase la dipuku le dipukunyana.”

    • Seo e be e le lentšu la mafelelo – goba ka be go bile bjalo ge nkabe Fungile a be a sa lebelela Nolitha le Jama ka bokgauswi. “Hei!” a ngunanguna. “Dubula, Faniswa, ke le boditše eng? Monna wa go hlalefa polokong, gomme ke ka nnete lesogana la gagwe. Ga go bjalo, Mohumagatšana?”

    Nolitha o no myemyela.

    ***

    Re botše gore o nagana eng: Ge o be o ngwala kanegelo ya kuranta ka tiragalo ye, naa hlogo ya sehlwa sa gago e tla ba eng? Naa o nagana gore Mahlangu o tla otlwa?

    Mafelelo