“O bolela nnete.” Nolitha o ile a swara lentšu la gagwe le lekanetše gape le sa phagame. “Bjale a re netefatše gore ga a rwale maikarabelo a gore wena o gobale. Areyeng ka jarateng, ka go nanya, re homotše.”

Nolitha o be a le ka morago ga lešaba, gomme ka nako yeo a fihlilego ka jarateng, sekolo ka moka se be se phuthegile fao, ba eme ka ntle ga lefasetere la hlogo ya sekolo.

“Buša tšhelete ya rena!” Cebo a goeletša gomme ka morago gwa kwagala mantšu a latela seo se bolwetšwego.

“Buyis’imali yethu. Buša tšhelete ya rena.”

“Re nyaka Mahlangu!” Cebo a bitša.

“Etšwa re bolele. Re nyaka Mahlangu. Re nyaka Mahlangu. Buša tšhelete ya rena.”

“Mah-lan-gu. Buyis’imali yethu. Re fe tšhelete ya rena.”

“Mah-lan-gu. Re fe tšhelete ya rena.”

“Mah-lan-gu. Re fe tšhelete ya rena.”

Gabjale Mna Ncane o hweditše tsela ya go ya ka pele. “Go lekane!” a goeletša. “Bjale theeletšang. Se ke mokgobokano wo o sego molaong. WO SEGO MOLAONG! Ga le na tumelelo, ga go mangwalo a tumelelo, ga go selo.”

Feela ke nnete, Nolitha a nagana. Efela seo ga se ba se beakanyetša.

“Mahlangu ga a molaong,” Cebo a realo. “Ga a na tumelelo ya go re hlakola.”

“Re nyaka Mahlangu.”

“Mkhuphe? Mo ntšhe.”

“O swanetše go lefa.” Boipiletšo bo be bo tšwelela mahlakoreng ka moka a jarata.

Mna Ncane o ile emiša diatla tša gagwe gape. “Mna Mahlangu ga a gona fa. O ile gae.”

Nolitha o ile a lebelela mafelelong a jarata kua kgojana. Mna Ncane o be a bolela nnete. Go be go se na sešupo sa Evogue ya Mahlangu.

“Lefšega gape ke lehodu,” Cebo a realo. “Re tseba mo a dulago. Re tla ya go mmitša fao. Yizani. Areyeng, bohle. A re eteleng hlogo ya sekolo sa rena. Ka maoto ke seripagare sa iri, gomme ka moka re tlwaetše go sepela. E sego Mna Sefatanaga sa Mabaibai-Mahlangu-Katse-ya-go-Nona.”

“Emang!” Lentšu la Mna Ncane la ba bogale ka pejana, modumo wa go se tlwaelege o etšwa go monna yo mogolo, wa mobrithane. “Ke a le lemoša. Ka ditaelo tša hlogo ya lena ya sekolo, ke biditše maphodisa.”

“Moeki!” lentšu la bitša go tšwa ka morago ga lešaba gomme lentsu la kabja gomme la goeletšwa ka lešata.

“Ncane ke moeki.”

“UNcane yi-puppet.”

“Ncane ke setlotlwane sa Mahlangu.”

“Ba tla netefatša gore lena bana ba mašilo, mašilo. mašilo le a phatlalala, boelang morago diphapošing tša lena tša borutelo gomme le ye ka morago ga diteseke tša lena mo le swanetšego go ba gona.” Ncane o be hlabile lešata gabjale, a šupašupa ka monwana wo mogolo, wo mokoto moyeng, mehlagare ya gagwe e thuthumela kholorong ya gagwe ye tšhweu.

“Ntshepeng ge ke re go tla ba le ditlamorago. “Baetapele!” A ntšha lentšu a lebeletše Cebo. “Le gape go morutiši yo mongwe. Dikeiti tša sekolo di tswaletšwe go wena, Solani. Tšea dilo tša gago o sepele. Kotlo ye boima ya go tshela molao. Kotlo ye boima.”

“Aowa! Aowa! Aowa!” Baithuti ba goeletša.

“Mohumagatšana Solani ga a ye felo.”

“Mahlangu le Ncane ba ka tloga!”

“Mabahambe. Etšwang. Etšwang. ETŠWANG!”

Ba šutela pele, ba batamela kgauswi le mo Mna Ncane a bego a eme gona.

“Gona bjale!” a goeletša ka mogaleng wa gagwe, gomme gwa kwagala medumo ya dientšine. Dibene tše hlano tša maphodisa tša tsena ka jarateng ya sekolo, gomme ka morago ga tšona go na le maphodisa a go ka lekana a 40, ba apere diaparo tša mpherefere. Ba ile ba bopa lepheko, Mna Ncane le barutiši ka moka ka lehlakoreng le tee, baithuti ka go le lengwe. Yo mongwe wa maphodisam sefahlego sa gagwe se phadima ka phišo ya mesong, a emiša mekafoune.

“Se ke mokgobokano wo sego molaong,” a goeletša. “Le na le metsotso ye mebedi ya gore le phatlalale goba re tla dira se sengwe.”

Cebo a lebelela go ba dikologa ka bogale. “Mohumagatšana?”

Nolitha a gopola mantšu a Jama. “Mo theeletše, Cebo,” a realo. “Ba dira seo ba se bolelago.”

“Efela Mna Mahlangu—”

Seo Cebo a bego a nyaka go se bolela sa metšwa ke ge baithuti ba ka morago ga lešaba ba kgoromeletša pele. Gabjale Nolitha le Cebo le ba Kreiti ya 12 ka moka ba be ba lebane leihlo ka leihlo, nko ka nko le maphodisa.

“Tlogelang go kgorometša!” Nolitha a goeletša. “Boelang morago. Buy’umva. Boelang morago.”

Gomme ka morago, gwa tsoga tlhakatlhakano yeo e bego e mpefala motsotso ka motsotso, o mmone, sefahlego sa gagwe se nepišitše le go tia ka tlase ga sekoko sa gagwe, mahlo a gagwe a sesefie.

“Vuyani? O dira eng mo?”

“Mošomo wa ka, Noli,” buti wa gagwe a goeletša. “Ke dira mošomo wa ka. O dira eng? Naa o a gafa? Mma o tlile go reng?”

“Nna … rena… Seo re bego re se nyaka ke lekase la dipuku feela, Vuyi!” Nolitha o ile a goeletša ka godimo ga lešata. “Lekase la dipuku feela le dipuku tše mmalwa.”

***

Re botše gore o nagana eng: Go na le melato ye mentši mo mabaka a aroganyago malapa. O be o tla ikwa bjang ge nkabe o le Vuyani gomme wa bona Nolitha?