Labobedi, 9 Febereware 2016
10.10 a.m.

“Go lokile, go lokile.” Nolitha a emiša letsogo la gagwe.

Ke ba bakae gabjale, Nols?

Ba ka lekana 300, mohlomongwe 350.

Go lokile, ga go sa na nako ya go latela molao. Re ka se tsebiše maphodisa. Ba botše gore se ke seo ka mehla re se dirago ge go na le boipelaetšo. Re romela diforomo, ra boledišana le ba taolo.

“Ga re nyake go bolela le motho,” Andisiwe a bolelela tlase, ge Nolitha a fetiša molaetša. “Re nyaka tšhelete ya rena.”

“Ee, ee, efela re swanetše go netefatša gore le a bolokega kotsing.”

“Re a ya, Mohumagatšana,” Cebo a ba bitša. “Ke nako ya go etela Mahlangu.”

“Yima! Emanyana!” Nolitha a goeletša, “Mpheng motsotso o mongwe o tee.” A lebelela mogala wa gagwe gape. “Mogwera wa ka, o tseba ka mo dilo tše di sepelago ka gona.”

Ga ba swanela go dira eng goba eng ya go senya, Nols. Go se be ntwa. Bea seo molaleng.

“Mongwe le mongwe, a theeletše hle. Seo se bohlokwa.” Nolitha o be a metša mantšu. “Go sa kgathalege gore go hlaga eng, le se ke la hlola ntwa. Le se ke la senya selo. Ke a tseba le befetšwe, ke befetšwe le nna. Efela le se dire selo se sengwe seo se tla dirago gore le bonale le ba babe. Le se ba fe sebaka sa go le šupa ka monwana. Le šupe bona ka monwana. Le na le tokelo ya go befelwa. Le na le tokelo ya go dira gore mantšu a lena a kwewe. Efela le se gobatše motho. Le se senye dithoto. Gomme sengwe le sengwe seo le se dirago,” Nolitha o be a bala thwii go tšwa go mogala wa gagwe gabjale,” bolokegang. Ge maphodisa a ka tla –“

“Maphodisa?” Baithuti ba bangwe ba bannyane ba lebelela go ba dikologa ka letšhogo.

“Cebo?” O be a eme fao, magetla a lekaneditšwe, sefahlego se tiišeditšwe gomme Nolitha a kwa a tlala boikgantšho. O tla ba moetapele wa maleba. “Cebo, ntheeletše. Ge maphodisa a ka tla, o swanetše go ba dira gore ba homole. Gomme wena, Andi, Dubula, Faniswa. Ba Kreiti ya 12 ya ka ka moka. Go bonala eke se se tlile go ba nngalaba ya taba. Ba hlokomele, kudu ba Kreiti ya 8.

“Re swanetše go potlaka.” Kua kgojana Nolitha o be a kgona go bona Mna Ncane, mogala wa gagwe o mometše tsebe. “Go lokile. Go sa kgathalege gore molao o reng ka ditokelo tša lena, gape le na le ditokelo, le tloga le na le tokelo ya go ipelaetša go tše ka moka, sengwe le sengwe, efela ge maphodisa a ka tla gomme a le tšhošetša ka gore ba tla le golega, ka Modimo, dirang seo ba se bolelago.”

Go be go hlomotše tse ka ge tlhalošo ya nnete ya seo Nolitha a se bolelago e tsenelela dikgopolong.

“Seo se swanetše go ba boipelatšo bja go hloka manganga, bja khutšo. Cebo,” Nolitha a khunama gomme a mo swara legetleng la gagwe. Le be le tiile gape le ngangegile, “ge maphodisa a ka go tšhošetša ka go go golega, goba a go betha, dira seo ba go botšago. Ka kgopelo! O ipoloke. Nka se bušeletše se gantši. Ke bomang bao ba nago le megala?”

Baithuti ba mmalwa ba emiša diatla tša bona.

“Go lokile,”a realo, a nyakana le melaetša ya Jama ka pela ka mo go kgonegago. “Le tšeye diswantšho. Le tšeye dibiteyo tša maitshwaro ao a sego molaong a barutiši goba maphodisa; ga ba na tokelo ya go le gobatša. Le gatee! Gomme le lena le se ba gobatše.”

Lentšu la gagwe le be le na le makgwakgwa. Gomme ka morago a gopola se sengwe seo Nombeka a mmoditšego sona. “Ba ka le golega,” a realo. “Ka fao netefatšago gore megala ya lena e se hloke mollo. Bolokang dibeteri. Go lokile?”

Go sa na le se sengwe?

O ile a ngwalela Jama molaetša. E sego gabjale.

Go lokile, o ntsebiše. Ke tla kgoboketša dihlopha fa. O se tshwenyege, Nols, re tla go boloka.

“Nna le baithuti ba ka ba 400,” Nolitha a botša seširo sa go hloka selo.

“Mohumagatšana Solani! Lentšu la Mna Ncane le be le kwagala ka godimo ga dihlogo tša baithuti. “Go direga eng mo? Le dira eng?”

Labobedi, 9 Febereware 2016
10.40 a.m.

Mopopodumo wa go befelwa o ile wa selaganya lešabeng la baithuti.

“Ditaba di fihlile magoletšeng fa,” Nolitha a bolela ka phegelelo. “Ba tloše, Cebo. Ba iše ka ntle, ba ye ka jarateng.”

“Mohumagatšana Solani! Fologa o tle mo ka pela. Ke nyaka go boledišana le wena ka potlako.” Nolitha a fologa setulo sa gagwe, efela e sego ka gore o ile go boledišana le Mna Ncane. Ga go ka tsela yeo a ka tsogago a tlogetše baithuti ba gagwe gabjale.

“Go lokile, mas’ambeni, a re sepeleng.” O ile a thoma go hlapetša baithuti bao ba lego ka pele ga gagwe. “Iketleng gabjale. A re sepeleng ntle le lešata. Ba bontšheng gore le tseba go itshwara.”

“Le ge bona ba sa dire bjalo!” mošemane a goeletša. Wa Kreiti ya 10. Nolitha o be a sa tsebe leina la gagwe. “O utswa tšhelete ya rena, Mohumagatšana. O utšwitše sekolo sa rena.”

***

Re botše gore o nagana eng: Naa o nagana gore Mna Mcane o tla thuša Nolitha le baithuti?