Make, Bella naNoodle baphutfuma behla ngemgwaco babuye bajika likhona bacondza endlini yaGogo. Batfola Gogo asekhishini aphuphutsa tandla takhe.

“Eshuwi! Ngishise sandla sami nganali lipuleti lelilibele lelishisako!” kwakhala Gogo.

“Sifake emantini labandzako loku ngisahamba ngiyolandza libhokisi lelusito lwekucala,“ kwasho Make, nanguya agijima abuyela emuva endlini yakhe – papa, papa, papa.

Masinyane nje Make bekasabuyile, aphetse libhokisana lelinesiphambano lesibovu lapha esivalweni salo. Wagcobisa sandla saGogo ngemutsi wabese uyasibhandisha.

“Gogo awukwati kupheka ngesandla lesibuhlungu,” kwasho Make. “Wena kanye nemndeni wakho nifanele kutsi nite nitodla kanye natsi kudla kwakusihlwa lamuhla.”

“Ngiyabonga,” kwasho Gogo. “Ngicela kutsi utsatse lelibhodo lemabhontjisi lelilibele utowengeta ekudleni kwetfu.”

Ngesikhatsi sekudla kwantsambama, Gogo wefika nemndeni wakhe.

Mhhuu, mhhuu! – loyo-ke ngumsindvo labawenta ngesikhatsi banuka ikhari lemnandzi lebeyiphekwe nguMake waBella ngelibhodo laGogo lemabhontjisi. Noodle naye waphakelwa lokuncane nje esitjeni.

Nchafu, nchamfu! Wakudla konkhe. Hlaphu, hlaphu, wanatsa onkhe emanti esitjeni! “Ngiyajabula kutsi nikuvile kukhala kwami,” kwasho Gogo kuBella. “Bengimatasatasa ngibala imisindvo lengitungeletile,” kwasho Bella.