“Ri khou ya mavhengeleni! Ri khou ya mavhengeleni!” Afrika o fhufha a tshi dovha phanḓa ha Dintle. Mme awe, Mme wa Afrika, vha mwemwela vho mu lavhelesa, na Dintle a vhanda zwanḓa.

“Ee,” hu amba Mme wa Afrika, “ambarani zwienda zwaṋu zwino. Ri tea u ṱavhanya. Ri kha ḓi tea u tshimbila ra ya vhuimabisi.”

Vhuimabisi ho vha hu na vhathu vhanzhi vho lindela bisi. Musi vhoṱhe vho no dzhena bisini, vho vha vho manyana. Mme wa Afrika vha takula Dintle vha mu vhea kha tshirumbi. Vhaṅwe mufumakadzi vha mbo dzula tsini navho. Afrika a dzule nga luṅwe lurumbu lwa mme awe, o manyiwa thungo ya fasiṱereni. Fhedzi a sa vhilaele sa afha zwo vha zwi tshi amba uri u ḓo kona u lavhelesa nnḓa nga fasiṱere.

Mureili o vhidzelela, “Vhuimabisi ha u fhedzisela!”

“Iḓani, Afrika. Hafha ndi hune ra tsa hone,” hu amba mme awe.

Musi vho no tsa bisini, Mme wa Afrika vha beba Dintle. “Tshimbilani tsini na nṋe,” vha vhudza Afrika. “Hafha fhethu ho tsitsikana nga maanḓa.”

Ho vha ho tsitsikana. Ho vha hu na vhathu vho faraho dzibege na vha sukumedzaho dziṱiroḽi dzo ḓala nga zwe vha renga. Ho dovha hafhu ha vha na mufumakadzi we a vha o halwa zwe a renga ṱhohoni.