“Vha nga kona u ita zwiḽa naa, Mmawe?” Afrika u vhudzisa mme awe.

“U ita mini?” hu vhudzisa Mme wa Afrika.

“U hwala zwithu ṱhohoni yavho u fana na hezwiḽa,” hu amba Afrika.

“Zwi tou vha khagala uri ndi a kona. Zwo leluwa,” hu amba mme awe.

Afrika a sedza mufumakadzi vha tshi ṱuwa u swika vha si tshi fhelela vhathuni vho imaho vhukati ha mavhengele.

“Ndi a ni vhudza na nṋe ndi a kona u hwala zwithu ṱhohoni yanga!” Afrika u a ḓivhudza. A vhona puḽasiṱiki ḽa boḓelo ḽa nyamunaithi ḽi si na tshithu. A ḽi doba a ḽi vhea ṱhohoni, fhedzi a tea u dzulela u ḽi fara ngauri ḽo vha ḽi tshi khou sokou wela fhasi.

“Tshukhwi!” hu amba musidzana a re tsini nae. “Ndi ḓo ni sumbedza uri zwi itiswa hani!” A dzhia boḓelo ḽa nyamunaithi, a ḽi vhea nṱha ha ṱhoho yawe, zwenezwi ningo yawe yo imiselwa nṱha, a tshimbila a tshi mona na Afrika sa voḓa ḽi ḓihudzaho.

“Evho!” hu amba Afrika, ndi zwavhuḓisa. “Ni pfi nnyi?”

“Ndi nṋe Asanda,” u ralo.

“Ndi nṋe Afrika. No guda hani u ita izwo?” Afrika u a vhudzisa.

“Ndo thoma nga u lingedza u tshimbila na bugu ṱhohoni yanga,” u ralo. “Ni tea u dzudza ṱhoho yaṋu i sa dzinginyei musi ni tshi khou tshimbila.” A vhuedzedza boḓelo ḽa nyamunaithi ṱhohoni ya Afrika. “Tshimbilani nga u ongolowa zwino, no imisela ningo yaṋu nṱha sa mukololo.”

Afrika a tshimbila nga u ongolowa a tshi mona na Asanda, ṱhoho yawe i sa dzinginyei ngeno o imisela ningo yawe nṱha. Boḓelo ḽa sa we!

“Mmawe, kha vha vhone! Kha vha ntsedze …” hu amba Afrika, fhedzi a kundelwa u vhona mme awe! Muṅwe muthu a kuḓa Afrika boḓelo ḽa nyamunaithi ḽa wa. Fhedzi a vha o no hangwa nga boḓelo – a vha a tshi vho ṱoḓa u ḓivha hune mme awe vha vha hone!

“Vhangafhi, Mmawe?” u a vhidzelela. Ho vha hu si na phindulo. “Mmawe!” a vhidzelela a tshi gonyisa ipfi. Phindulo ye ndi bva vhubvo.

“Mme anga vho xela!” hu amba Afrika a tshi vhudza Asanda. “Ro vha ri tshi khou ya vhengeleni ḽa dzibugu nga fhaḽa khonani, fhedzi a vha vhonali zwino!”

“Na nṋe-vho ndi khou ya vhengeleni ḽa dzibugu! Ndi khou ya u renga bugu ya zwiṱori nga tshelede ye nda vhulunga. Huṅwe mme aṋu vha vhengeleni ḽa dzibugu. Kha ri ye ri yo vha sedza!” hu eletshedza Asanda.

Vhe vhoṱhe, Asanda na Afrika vha tshimbila vhukati ha vhathu vhanzhi. Nga khathihi fhedzi Afrika a pfa dzina ḽawe! “Afrika! Afrika! Ni ngafhi?”