Bella o ne a jelwe ke bodutu mme Mama o ne a tshwanetse go phepafatsa ntlo.

“Tsaya Noodle mme le iphokise phefo,” ga rialo Mme.

Noodle o ne a sala Bella morago go ya kwa ntle mme o ne a dula go bapa le ene mo tselanathokong ya dinao. Bella o ne a kgwa mowa mme a dupelela mo moweng. O ne a sa nkge bontšhwa. O ne o nkga pharakano.

Koloi e ne e feta e re Haaam! Pipipi! ga feta e nngwe. Tututurrr, tututurrr, tututurrr! go ne ga feta sethuuthuu. Tlakg, tlakg! go ne ga feta bene ya bogologolo ka mataere a yone a a onetseng le mmele wa yone o o tsofaditsweng ke ruse.

Bella o ne a simolola go bala medumo e e mo dikologileng. E ne e setse e le mene! Drrr, drrr, drrr! go ne go utlwala boro. Grrrrrrrrrrr! Noodle o ne a bogola boro. Duff, duff, duff! go ne go utlwala mmino o o kwa godimo go tswa mo thekesing.

Hanna, hanna, hanna! go ne go feta lekgarebe le buela kwa godimo mo selefounung ya gagwe. Kwa, kwa, kwa! go ne go utlwala dikwaekwae tsa gagwe mo tselanathokong ya dinao fa a kgabaganya. Tshe, tshe, tshe, tshe! go ne ga feta motho yo neng a tshematshema fa thoko ga Bella.

Hau, hau, hau! Noodle o ne a bogola motho yo o tshematshemang. Tswii, tswii, tswii! mosimane yo o mo baesekeleng o ne a letsa molodi.

“Medumo e le SOMEPEDI!” ga rialo Bella.

Mme fela medumo yotlhe e ne e simolola go dira gore tlhogo ya ga Bella e tsewe ke madiopo, ka jalo o ne a emisa go bala mme a re, “A re tsamaye, Noodle, a re boele kwa segotlong koo go leng monate e bile go sisibetse.”