Nngwe ya dintlha  tsa botlhokwa tse di amang bokamoso  jwa basha ba maAforika, ebile di tshwarelelang lefatshegadi (kontinente) la Aforika morago mo maitekong a lone a go bona kgololosego ya tota ke gore batho ba lefatshegadi leno ke bangwe ba batho mo lefatsheng ba ba sa diriseng dipuo tsa  bone mo ikgolololong le itlhabololo ya bone. Dinaga tse di etsang Englane, Fora, Nederelante, Tjhaena, Japane, Malashia, Vietnamo, le kwa sekasetlhakeng sa maArabeya jalojalo, tsotlhe tsone di dirisa dipuo tsa  tsone mo tsamaisong ya sengwe le sengwe sa botlhokwa jaaka; mmuso, thulaganyo ya thuto, moruo, tlhamo- bonetetshi, botaki, tumelo jj, fa dinaga tsa  lefatshegadi tsone (ntle le tse go busang maArabeya) tsotlhe di dirisa dipuo tsa  dinaga tsa seYuropa tse di neng di re gatelela pele ka go re kwatlafatsa (colonize) ebile di santse di re tlamile kana di re kgobafaditse le janong ka tsela ya semoruo. Goreng tota gonne seno ga se supe kgololosego?

DINTLHA DINGWE TSE BATSADI LE BASHA BA TSHWANETSENG GO ITHUTA KA TSONE GORE SEEMO SE TOKAFALE

Botlhokwa ba difetisetsi tsa thuto bo tshwanetse go tsewa tsia go feta fa e le gore bana le basha ba maAforika ka kakretso ba tlile go bulelwa ditjhono tsa  nnete tsa  go godisa le go tlhabolola lefatshegadi la bone mo isagong, mmogo le go emelana le dithaka tsa bone mo dinageng tsotlhe khadia le lefatshe. Dipatlisiso ka UNESCO, LOITASA jj mo lekaleng leno di senotse gore baithuti ba bantsi ba amiwa ka tsela e e maswe mo dithutong tsa bone ka lebaka la go sa tlhaloganyo seEsimane jalojalo sentle. Ga ese gore bana le basha bana ke dimatla, ke fela gore puo e e dirisiwang jaaka sefetisetsi sa thuto ke puo e ba se e tlhaloganyeg sentle go ka ba kgontsha go tsaya karolo e e feletseng mo dithutong tsa bone. Kajalo ga ba kgone go falola mo dithutong tse ba ka be ba bangwe ba bantsi ba di kgona ebile ba gatela kwa pele mo go tsone fa fela ba ne ba rutiwa ka puo e ba e tlhaloganyang sentle go feta dipuo tsotlhe.

Puo e kgona go dira jaaka letshwao la  sengwao gape le jaaka sediriswa sa tlhaletsano mo loagong ka kakaretso, jaaka mo thulaganyong ya thuto, le kwa madirelong a a farologaneng jaaka dikgwebo tsa methalethale tse di tshamekang seabe se se tona mo moruong wa naga, le wa lefatshe ka boleka. Ke puo e e letlelelang batho ba dinaga tsotlhe mo lefatsheng gore ba kgone go tsaya karolo  e e tletseng go ya ka bokgoni jwa bone mo moruong mme ba seke ba tswalega kwa ntle ka lebaka la yone.

A RE BUA GORE SEESIMANE LE DIPUO TSE DINGWE TSA SEYUROPA DI TLOGELWE?

 Le fa go le botlhokwa go ithuta seEsimane, seFora, sePotokesi jj, go botlhokwa le go feta gore re kgone go godisa dipuo tsa seafrika go fitlhela di kgona go dirisega ka mokgwa oo di tla letlelang basha ba maAforika go tsaya karolo e e tletseng mo moruong ka gone.

Ntlhakgolo fano ke gore bopuontsi bo na le seabe se se tona bo bo ka se tshamekamg, mme bothata ke gore jaaka dilo di ntse mo Aforika-Borwa, ke dipuo tse pedi fela tse di nang le thata ya tota, ebong seAforikanse le seEsimane. Tse dingwe dipuo tse 11, le ga go kwadilwe mo molaotheong gore ke tsa semolao, ga di na maatla jaaka seEsimane/seAforikanse gobane di sa abelwe matlole  le ditjhono tse di lekanang le tsa  dipuo tse pedi tse di maatla mo Aforika-Borwa, jaaka go godisetswa go ka dirisiwa ka botlalo kwa diyunivesithing jj.

Dipuo tsa  seAforika di tshwanetse go godisiwa ka gore ke tsone tse basha na di tlhaloganyang thata go feta seEsimane, ebile go ya ka moithutedi o mo golo Kwesi Kwa Prah, ke 15-20 bolekgolong ya batho ka palo, ba ba kgonang go dirisa seEsimane le seAforikanse ka botlalo go ka emelana le beng ba tsone.

Seno se raya gore ga re bone seEsimane le seAforikanse di tshwanetse go tlogelwa go ithutiwa sentle ke bana le basha ba maAforika, mme se raya gape gore re bona gore dipuo tsa bone le tsone di tshwanetse go ba tswela mosola, ka ese batho botlhe ba ba tlhaloganyang seEsimane jj  sentle go ka tsaya karolo e e feletseng mo thutong e e kwa godimo, le mo moruong/madirelong jalojalo.

La bofelo, bothata bo bongwe gape ke gore go na le dipuo tse di mmalwa tse di leng teng, mme  di gateletswe go tloga ka 1994, fa tsone di ne di tswalelwa kwa ntle, tsa se bonwe jaaka dipuo tsa semmuso , ke gore tsa  amogwa botlhokwa ba tsone le tsone.

****

At Fundza, we value a positive, respectful, and inclusive community where everyone feels safe to share their thoughts. Please remember to keep your comments friendly, constructive, and free from any form of hate speech, bullying, or discrimination. Any comments containing offensive language, personal attacks, or harmful content will be removed, and repeat offenders may be banned. Additionally, do not share personal information about yourself or others. This includes but is not limited to, phone numbers, addresses, or any other private information. Let’s keep the conversation welcoming, safe, and supportive for all!