Usizi kumuntu omnyama lugobile
Usizi kumuntu omnyama lumembethe
Umzimba wami usuwaphenduka isizinda sezinsizi
Ngenxa yesihluku sendoda ebiligolide kweyami inhliziyo
Usizi phela lolu!
Nhliziyo yami usuwaphefumula ngamanxeba
Nhliziyo yami usuwaphefumula imizwa yosizi
Hawu yeka nini ngosizi olungigubazile oselwaba isinkwa semihla ngemihla
Hlezi singcono nesinkwa ngoba siyashebeka sigwinyeke
Hhayi okwami kunzima

Ngiyoyixoxela amagwababa echobana
Mhlawumbe nawo angeke ayimela lena
Kuleyo mithambo yemizwa yothando sengaphefumula imizwa yezinhlungu
Umzimba wami ubuyisibutubutu
Namhlanje usuphenduke isibutubutu sezinhlungu
Ngenxa yomlisa obeligolide kweyami inhliziyo
Igolide ebelingumduduzi wenhliziyo yami namhlanje lingiphuca le nhliziyo
Usizi phela lolu!

Usizi selwabuzwa kowami umzimba
Ukuhleka angisakwazi sekwaqedwa izinhlungu
Amehlo ami izinyembezi awazikhali
Seziyaziphumela kuhle kwempophoma
Umqamelo wami usuwaba inkongozela yezinyembezi
Kuhle kwembenge yomnikelo esontweni
Ngiqinisile ngiqinisile
Amehlo ami uyophunyuzwa ukuphela kwamanzi egazini
Usizi phela lolu!