Yini na inkan’ engaka na mzontsundu
Ubuqil’ obungaka ulumkiswa
Yini na Ndlambe ukungev’ ulungiswa
Ukukholelwa kuNxele ekuxokisa

Namhl’ umkhumb’ ubhembesile
Oondlebe zikhanyilanga bayazenzela
Baphixanis’ uluntu ngolwimi pwabo belugungqisa
Baphixanis’ umzi kaNtu bewubhubhisa

Wathini na uNtsikana ukuprofeta
Ngab’ oondlebe zikhany’ilanga enicebisa
Kodwa nakheth’ ukungev’
Kothunyiwey’ enivundlisa

Siphazamephi na Mzi kaPhalo
Ukulahl’ imbo nje ngophoyiyana
Nas’ isizwe somthanyama sichitheka
Siqhekek’ okwengceba zebhotile

Hlobo luni lomlingo abawusebenzisayo
Lona mzi kaNtu unihexisayo
Nude niyiminxadanxada nigwexana
Endaweni yokolulekana

Bayaphi na ubulumko na mz’ontsundu
Lento savumel’ udungwa dungwa butywala
Yayaph’ ingqiqo emqingqwa
Lento saxabis’ imali kunobuntu

Ana beze kuthu nezixhobo zokusonakalisa
Khon’ ukuze sizonzakalise
Silibale ngekamva lethu
Silibale ngobuntu, nobutyebi ababuhluth’ ezweni lethu

Khumbulan’ iqhinga
Kukusigcina singenalwazi lwanto
Sihlale mzi kaRharhabe silambile
Sisoloko silinde kubo sikhongozile

Vukani mzi kaNtu kobuthongo
Thungululan’ intongo emehlwen’ enu
Asibantu bothenjw’ ana
Basoloko bekholosile