Ngiphila ngokuthukwa
Ngiphila ngokuhlaziswa
Ngiphila ngilahlelwa izandla
Ngiphila ipilo yamanga
Iimphoso sezaba kukudla kwami
Iimphoso sezadlala indima kimi
Ngingu somphoso ebantwini
Ngibadanisile ababelethi bami
Ukuthatha izinto zabantu lithando kimi
Ukuhleba lithando enginalo kimi
Ukudula siviko sami
La kudlule mina khona,
abantu bayanyenya
La kudlule mina khona,
abanye bayalila
La kudlule mina khona,
abanye batjhugulula ebeze ngayo
Maye kwangenza ukutlhoga indlebe!
Hliziyo engakalungi wavelaphi?
Wangithola ngilungile
Wangitjhugulula wangenza isilwana
Wenza nesitjhaba bona singihloye
Singibize nge sela
Usathana omduna
Namhlanje ngimumbi
Koke kungebanga lakho
Nezenzo owangenzisa zona
Okuhle nje nangisadla amabele
Ukhambise ithando lami ebantwini
Ukhambise ihlonipho yami ebantwini
Wehlisa nesithunzi sami
Namhlanje angisabalwa kwabasadla amabele
Ngihlobokwa ngiphila nabangibonako
Vuka hliziyo yami
Tjhuguluka hliziyo yami
Ngibawa ukulitjalelwa kongaphezulu
Ukuze nami ngitjhuguluke
Ngilibalela baba
Ngiguqa ngawo womabili amadolo
Bekungasiyo intando yami
Nami ngenziwa kulingeka
Liphandlwa liqalile