Batho ba bone motho bo botse
Ba tsentšha diatla potleng
Ba bone lengeloi la go phela
Motho wa leina la gotšwa Pukukgethweng

Sekgwari sa go ithata
Taamane ya Bakone
Gauta ya kua ga Kgoši Malebogo
Motho wa go thabiša mahlo
Mo a bonwego gona a go lakalelwe go boelwa

Ke setlogolo sa Bakone
Ke mmina tlhantlhagane
Ka leina ke Morongwa
Gae ke kua ga Monyebodi

Išang mahlo le mmone
Gobane mahlo ke diala
Ipotšišeng dipotšišo
Le ipotšiše gore o bopilwe ke mang
Gona ka le bjang letsopa?

Le ge le ka ipopa dihlophana
Go ya go yena ga se thaloko
O apere palamonwana ya gauta
Ke mosadi’mogolo wa thuto
Tsela o swere ya ditoro tša gagwe thwii
Efela lekang banna bešo
Gobane go leka noka ga se go wela