Zilala uyaca emuva kokuvuna
Ziba mhlophe isivande esinye eceleni kwesinye
Akuzona zonke eziyongena empushini
Ezinye ziphehliwe kanti ezinye zidliwe inhlava
Noma kunjalo zonke ziphelela ekhaya lomlimi
Nomlini akenami ngezonakele
Ebe ahlanyela inhlanyelo ephilayo
Kulele uyaca

Akwemukeleki akujwayeleki futhi akwedluliseki
Namuhla kukhalwa ngapha kusasa laphaya
Laphaya kuthukuswa ubumba othuthwini
Othuthwini umkhumiso usulingene izintondolo ezintuthwaneni
Ezintuthwaneni indlala ishabalele okwamazolo ebona ilanga
Ilanga lishona nezimtoti emndenini wakwantuthwane
Nganeno sikhihla esikaNandi kuphakama ugejambazo kusithele ithambo
Kulele uyaca

Kukhona abacebile ngazo izinhlaka zethambo
Isililo samakhelwane silumisa isandla sika makhelwane
Ukuhlukana komuphefumulo nesidumbu ukwanda komcebo kwabanye
Kwabanye akusehli kahle uma bengachithanga igazi
Luyizinkumbi uluntu olucambalele kobandayo
Kobandayo kukhona abahamba kwakungafanele
Umcebo unoxha lwamaliba ngesandla somudlwembe
Nobani nobani uyakukhanukela ukuba ngumudlwembe
Kulele uyaca

Ukwanda kwaliwa ngumkhunkuli
Sekwajayela isandla kumthakathi
Kumthakathi osematholeni nosezinkomen’ izithupha ziyogwayini,
Kubhubha isalukazi kubhubhe kwaxhegu
Impumelelo umqhathi womakhelwane
Bayibumba likasimende abasweleyo
Uqhekeko ludabuka lapho omunye eqala ukunotha
Kuze kuyophetha ngomunye esethwele uthuli ngesifuba
Kulele uyaca

Sesikhalile saze saphathwa isibibithwane kasifundi lutho
Sekugujwe kwaze kwagudluka izihlakala asizwa lutho
Sesishiywe ngosonhliziyo nezethenjwa asethuki
Sesihlabile senza nokhamba akekho nobuyayo ukuzolothisa leli dimoni
Leli dimoni kazi liyophela mhla kwenzenjani
Kulele uyaca

Nolungile ugubazelisiwe wesaba nokuphumela eshashalazini
Wembozwe izinkabi ezondla ngegazi loluntu
Ufihlwe ngabagqobhi bamakhathakhatha
Abaqotha imbokodo nesisekelo
Kusala kume uphahla kukhala ibhungezi
Uze aphethe ngokuyihosha imfe bevume ngoma yinye
Inani lamaliba livusa isilokozane kumenziwa kaNkulunkulu
Umona kanye nobudlwembe kuyimfanayo akubancedanga
Kulele uyaca