(Itlolelwe umNyango wezeenThuthi, endleleni yangeMoloto R573)

Ngamalanga utjhitjhirizisa itayere.
Qobe veke urhuthula bekhethu.
Iingazi zeenini zethu, zidabula umoya wethu.
Ubagaye njengelitje lokusila naligaya amabele.
Wena ugaya imbewu yekhethu kaMusi kaMhlanga.
Ilunya lakho lihlahlathisa imzimba,
Isililo esiraramba endleleni yeMloto asikukghwathi na?
Iingazi eziphalaka qobe mnyaka azikukghabhudlhi na?
Iintandani zabongazimbi azikubangeli amatlhuwo na?
Amarubhi azele kwaNdebele ukhe wawabuza amavuko na?
Ngombana ngathi ngiyawabuza bathi solo baye ngePitori.
Kwangipha ithemba lokobana mhlazana babuya umlomo uzakuphazima ifutha.
Kwangidanisa lokha nangizwa kuthiwa sizakubonana kwelizako.
Ngasirarambisa nabathi elimbonako angeze lisambona.
Ngafuthelwa, ngatshega iinyembezi ngezenzo zakho.
Ngafa ihliziyo nangibona bawola iintokana zemizimba yabo.
Ngabuza kobana kanti Ndebele wonani, kabani?
Ngoba nagadesi ngibabonile batjhinga basiqubuthu.
Babetha isilala emangweni, balinde ipendulo kuwe.
Bavuma iingoma ukutjengisa iinghonghoyilo zabo kuwe.
Kanti thina sonani kabani enarheni?
Kanti thina sikhethululelwa ini enarheni.

Ipilo izakuba ngcono nini kweyekhethu nathi?
Nathi siyazitlhoga iinthuthi ezingcono.
Ngizwile ngabo “Rea Vaya”, abo “A Re Yeng” ne “Gautrain”
Sabathokozisa kwaba kuhle kibo.
Zoke elawulweni lenu zikhambela hlanye njengelanga lebusika.
Njengoba nasibonisa ubuhle bomdlalo webhigiri yephasi ngalendlela.
Makhosi wekhethu ngisalila ngani bonyana nibuyise iphasi lenu kwabazepolotiki.