Bontši bja rena batho re phedišana le meloko, metswalle le baagišani ba rena ka lerato le botho mola ka go le lengwe re phela ka megabaru setšhabeng. Re a hlomphana ebile go rena kgotso maphelong a rena. Motho ke motho ka batho.

Tabakgolo ya go ntula mo sehubeng, ya go ntshetla pelo nna Moroka wa meetse ‘a pula ke gore gobaneng eke phedišano yela ya botho re godišitšwego ka yona ke bagolo ba rena e tsena ka monga wa seloko.

Batšofe ba tlaišwa ke boramaminana. Ba ya utswetšwa ba ba ba dirwa tša phaku. Ka nako ye nngwe ba dirwa tše ka moka mahlong a batho eupša ka go hloka botho, batho bao ba no phutha matsogo ba lebelela kgakala e le ge bare bona ga ba di tsene gobane ga ba amane le mohlokofatšwa.

Gobaneng matšatšing a lehono re thuša motho go ya ka gore re a mo tseba goba aowa? Thuša motho ka mokgwa wo o ka kgonago. Motšofadi yo mongwe le yo mongwe ke koko wa mang le mang. Polelo yela ya gore ngwana ke wa setšhaba re se e tlogele. Godiša ngwana ka matsogo a borutho le ge e se wa gago ka madi. Se mo lese a wela melabeng ye mebe. Se lahle borotho wa bo raga ka maoto mola lapa le lengwe le ripitla ka tlala.

Motho ke motho ka batho. A re rataneng Maafrika!