Agaa!! Ngwana kgeswa la borare, fera seseka ke go nyetlele kgodu yeo e tšwago lerotseng mabapi le mogwera Montshepetša bošego yoo ke tla mo lebogago bo sele. Ka gona ke re thlokwana la tsela ntshebele motho o sebelwa ke wabo.

Ka dinako tše dingwe mo bophelong go bohlokwa go ba le bagwera ba mmakgonthe bao le ntšhanago sa inong. Mo bophelong re fela re kopana le mathata, dikgogakgogano mola le mola, moo o ka feleletšago o kgopela thušo goba dikeletšo go bagwera ba gago ba mmakgonthe.

Kgalekgale kua motsaneng wa Makweng gola Zebediela go be go na le Mošemanyana yo mongwe yo bohlale yo a bitšwago Madimetša. Madimetša e be e le mogwera wa mosetsana yo a bitšwago Mmakobote. Bobedi e be e le bagwera ba mmakgonthe, ba ntšhana sa inong.

Ka madimabe batswadi ba Mmakobote ba ile ba humana mošomo toropong. Seo se ile sa dira gore Mmakobote a hloke motho yoo a bego a ka šalago le yena ge batswadi ba gagwe ba be ba ile moo mošomong. Ka fao, batswadi ba Mmakobote ba ile ba tšea sephetho sa go hudugela toropong le morwedi wa bona.

Go be go se bonolo go Madimetša go thoma segwera se sefsa. Ka morago ga dikgwedi kgwedi o ile a thoma go lebala ga nnyane le ga nnyane ka segwera sa gagwe le Mmakobote. O ile a thoma go setša mešomo ya gagwe ya sekolo kudu.

Erile ka ngwaga wa bone, batswadi ba Madimetša ba amega kotsing ya sefatanaga gomme ba mo tlogela ka mo lefaseng le la ka keno. Madimetša o ile a kwa bohloko kudu moo a ilego a nyaka go itšeela bophelo. Sekolong o be a se sa tsefelwa ke selo.

Ka morago ga dikgwedi tše tharo morago ga poloko ya batswadi ba Madimetša wele ya batswadi ba gagwe e ile ya tšwa, gomme Madimetša a hwetša lefa la gagwe. Madimetša o ile a thoma go se bone bohlokwa ba sekolo ka ge a be a na le tšhelete.

Madimetša o ile a tlogela sekolo ka ge a be a sa bone bohlokwa bja sona. O ile a thoma go sasanka le mafase, a enwa mabjala o be a kgoga diokobatši tša mehutahuta tša maina a go thakgatša tsebe. O be a na le bagwera ba ba ntšhi bao a bego a sa tsebe gore ba tsweletše kae. O be a eja a lahla, a ikwa eke lefase le swerwe ke yena. O be a tšeela batho fase.

Tšhelete o ile a e fofora bjalo ka lefela gomme ya thoma go fela. Bagwera bale ba ba ntšhi a se hlwele a ba bona. O ile a thoma go hloka pudi ya leleme le letala, a robala ka tlase ga maporogo, a sena le ka sesepe sa go hlapa meno. O ile a thoma go bona gore lefase ke eng.

Madimetša o ile a thoma go itshola ka nako yeo a e sentšego ge a be a sasanka le mafase, a duma eke nkabe a tsene sekolo a se fetša gomme a kgona a sasanka le mafase ka morago. O be a dira nkabe, eupša nkabe e le ngwana wa morago.

Ka le lengwe la matšatši Madimetša o ile a kopana le mogwera wa gagwe yo elego kgale a sa mmone. E be e le Mmakobote a sepela ka sefatanaga sa gagwe se sebotse, e le senoinoi. Madimetša o ile a thoma go tlala megokgo ka mahlong, le gona a lewa ke dihlong ka seemo sa bophelo bja gagwe.
Mmakobote o ile a thabela Madimetša ka ge e be e le kgale ba sa bonane, eupša a lemoga gore Madimetša o na le mathata le gona o hloka thušo le dikeletšo. Madimetša o ile a hlalošetša Mmakobote mathata a gagwe. Mmakobote o ile a se mo ahlole. O ile a eletša Madimetša gore a ikopantše le badirelaleago.

Madimetša o ile a thoma go ikopantšha le badirelaleago. Morago ga dikgwedi tše mmalwa o ile a thoma go ikwa a imologile. Mmakobote o ile a eletša Madimetša gore a boele sekolong gobane sekolo se bohlokwa. Madimetša o ile a kwa dikeletšo tša mogwera wa gagwe gomme o ile a boela sekolong a ithuta.

Madimetša o ile a makatša batho ba ba ntšhi ge a hwetša dihlora mphatong wa Marematlou. Diyunibesithi di ile tša mmaka gomme a fiwa le dipasari. O ile a thoma go latela ditoro tša gagwe gomme a ba lesogana la seriti setšhabeng.

***

Re botše: Naa o nagana gore Madimetša o ithutile se sengwe ka seo se mo hlagetšego goba o tla boela mekgweng ya gagwe gape mohlang a šomago?