UThemba ukhuluma ngomaliledininakhe, ukhuluma nesokanela abanjwa nguKarisa amangana nalo.
“Themba sizokubonana ebumnyameni kufikela nini, awa sthandwa sami le akusiyo akhuzi…usangithanda?” kutjho lona isokanelo uHlelo.
“Sthandwa sami uyazi ngigandelekile begodu angazi ngingathoma kuphi ukuthi ngitjele abantu ngokuthandana nobulili obufana nebami, uyazi ukuthi abantu abafana nathi bayabulawa begodu abathandwa, bayanyefulwa zoke izinto ezimbi zenziwa kibo kibo…ungangifaki ngaphasi kwegandelelo ngiyakubawa sthandwa sami, ngibekezelela, koke ngesikhathi esifaneleko kuzokuvela. Kutjho uThemba.
“Ngiyakuzwa sthandwa sami siphila kabuhlungu akhuzi…kodwana kuzolunga noma ngingazi ukuthi nini nje, kodwana bayatjho ukuthi njengebizo lakho…ithemba alibulali” Kutjho uHlelo.
“Kungakho ngikuthanda kangaka unehloko akhuzi…” kutjho uThemba ahleke…bahleke bobabili.
(underneath is another scene, and it happens in another location and it nolonger part of the above conversation)
KukwaMsiza ekuseni, uNoBadanile bano SoBadanile, balungiselela ukuya emsebenzini…
“Baba isikhathi sikhambile ukudla kwakho kungapho nge-ovenini, phela ngiyokulungiselela umhlangano nabantu abaphethe indawo zokuzithabisa, siyokukhuluma ngendaba yobulelesobu” kutjho uNoBadanile.
“Wenza umsebenzi okarisako mkami…khamba ngizolungisa lapha fanele ngilungise khona” kutjho uSoBadanile, bamangane.
“Ngiyathokoza baba” kutjho uNoBadanile, aphuma atjhinga ngekoloyini, akhambe.
Nakusenjalo ngaphambi kobana uSoBadanile akhambe, nangu uBadanile ungena arhuwelela.
“Zami zona azifani nezabanye abantu, kwenzakalani ke kwanje, kanti yini Badanile?!” kubuza uSoBadanile.
“Baba! Ngimenyiwe ku-interview esikolweni lesi samabanga aphasi eKhuphukani” kutjho uBadanile.
“Ngiyakuthokozisa ntazi, khamba wena sikuqalile…ngikufisela itjhudu elihle lodwa mntwanami, nakumsebenzi lo ngewakho.” Kutjho uSoBadanile athabile.
“Ngiyathokoza baba ngithi ngeLesihlanu lo ngizabe ngimuhle khulu dani, ngikarisa…sengiyazibona ngifundisa abantwana…” kutjho uBadanile
“’Sipho uphi umsebenzi wakho wekhaya, ngithi boke abangakatloli abeze ngehlangothini leli…’ kutjho uBadanile azicabanga anguTitjhere…bafe ngeenhleko banoyise.
*******************************************************************************************************************
Kusendaweni yokudla uKarisa bano Tjhudu bayadla…
“Mntwami kufanele khesiphume sobabili , sibethwe mmoya, nganele ngommoya wePhumula lo” kutjho uKarisa.
“Uqinisilemntwami, nezinto ezinengi ezenzeka endaweni le, ilanga nelanga kunendaba zalo” kutjho uTjhudu.
“Khulu mntwami, indaba ngemva kwendaba…” kutjho uKarisa.
Nakusenjalo babone uBoniwe alila…
“Mntwami akusinguBoniwe loya…ngathi akasimnandi nje?” kubuza uKarisa.
“Muphi mntwami….nguye akhuzi noma bangathi abantu bayafana, alo kubangelwa uliliswa yini…phela uyalila umuntu lo” kutjho uTjhudu.
“Uyayibona into engiyitjhoko ngendawo le nabantu bakhona, nangasimiraro ngezinye ezingakajwayeleki.” Kutjho uKarisa.
“Mntwami yiPhumula lapho ikhamba khona…ithi ngiye kuye mntwami” kutjho uTjhudu.
“Kulungile mntwami” kuvuma uKarisa.
Nango uTjhudu asikima atjhinga kuye uBoniwe…
“Boniwe! Boniwe mnganami! Ngimi uTjhudu ngijamela!” kurhwelela uTjhudu…ngendlela angayo akezwa nomuntu ombizako…ngitjho nekoloyi ingamtjhayisa ngoba akezwa litho.
“Umuntu lo akezwa begodu angiboni ukuthi angangizwa ebujameni akikobu, ithi ngigijime mhlawumbe ngizamthola” kutjho uTjhudu ngehliziyo…nangembala uTjhudu wathoma ukugijima bewamthola.
“Mnganami wangigijimisa kangaka? awuzwa mara nangikubiza kangaka?” kubuza uTjhudu sele afikile kuBoniwe…nakungu Boniwe yena umqala nje kwaphela akaphenduli.
“Boniwe mnganami kanti kwenzakalani? Uyangithusa kwanje.” Kutjho uTjhudu…asikhihle isililo uBoniwe…uTjhudu amubambe bekamusingathe.
“Thula Mnganami kuzokulunga…ayikho into engekhe yalunga…ngitjho nalokhu engingakwaziko ukuthi yini, kuzok’dlula ngathi khange khekwaba khona” kutjho uTjhudu aduduzela uBoniwe…
“Asikhambe siye kwethu mnganami, ngiyokwenzela ikofi enebisana ngendlela uyithanda ngayo” kusaraga uTjhudu.
Nangembala bakhamba baya kwaMahlangu ekhabo Tjhudu, kulapho iindaba zaphuma khona.
“Nasi ikofakho mnganami ngendlela uyithanda ngayo” kutjho uTjhudu.
“Ngiyathokoza mnganami” kuphendula uBoniwe ngommoya ophasi
“Uyazi mnganami angazi ukuthi bengizokubayini ngaphandle kwakho, umngani ebanganini…nabakhuluma ngembokodo, batjho wena…uyingilozi yala ephasini…nakungimi yena nginetjhudu elikhulu ukuba nawe, ngiyakuthanda mnganami, ungibona nginje sengizizwa ngingcono khulu…ngenziwe kukuba khona kwakho namazwi wakho. Emoyeni ngizizwa ngimuhle.” Kutjho uBoniwe atshega iinyembezi.
“Ungasalili mnganami, phola mnganami phola” kutjho uTjhudu amsula iinyembezi.
Ngemva kwama awara amabili…uBoniwe azama ukukhuluma into emphethe kab’hlungu le.
“Mnganami uyazi ipilo ifuna ukuhlonitjhwa, nawungahloniphi ipilo, uzozithola usemlonyeni weempisi…” kuraga uBoniwe.
“Ungibona nginje mnganami ngine ngogwana yentumbantonga” kutjho uBoniwe, iinyembezi zehle.
“Ncancabe mnganami, iphoso yenziwa mumuntu, siyafunda emphosweni bese senza kuhle ngokulandelako. Tjhhhh!” kutjho uTjhudu amutjhutjhuzela.
“Ngiyobatjela ngithini ababelethi bami? Ngiyothoma kuphi? Njani? Ukuthi umntazinyana wabo oyedwa unengogwana…wangenza uMandla…awa ngiyamulisa uMandla ngiyazihloya ngokungaziphathi kuhle” kutjho uBoniwe asikhihla isililo…
“Thula Mnganami unami angithi…awusiwedwa esehlakalweni lesi, nginawe ngiyakwembatha…ungadlali umdlalo wokuzisola lapha…ungasoli uMandla, ungazisoli nawe Nebabelethini bakho ngizokuba nawe nawungathatha isiquntu sokuthi ufuna ukubatjela ngobujamo bakho, uyangizwa Mnganami, ayikho into engekhe yalunga begodu yadlula, koke kuzolunga njewena ibanomkhumbulo omuhle, uqale ngelihlo lokukhanya kungasi lihlo lobumyama.” Kutjho uTjhudu akhuthaza umnganakhe ngendlela angakgona ngayo.
“Begodu mnganami ingogwana le ye ntumbantonga ayisafani nakadokha, kulula yanje ukuyenza ingaphumi elawulweni.” Kuraga uTjhudu.
****************************************************************************************************************
KwaMsiza, umndeni wakwaMsiza uhlezi etafuleni kudegiwe, kuyadliwa.
“Karisa, kukhamba njani emfundweni zakho” kubuza uSoBadanile.
“Kukhamba kuhle khulu baba, nakumnyaka ozako ngiphuma neziqu, kumnyama kubovu ngiyayiguga baba” kuphendula uKarisa ngokuzithemba.
“Awa ngiyakubona ngendlela uzithembe ngayo kuyakarisa” kutjho uSoBadanile.
“Indaba ezimnandi kukuthi umnyango wenu baba wezothuthukisa ihlalakuhle bangithethe, kodwana nangingathola iziqu zami, ngiyokufunda ukwenzaumsebenzi, ngithokoza wena ngokungifakela isibawo somsebenzi lo.” Kutjho uKarisa.
“Kuthokoza mina mntanami, utjho uligugu kimi…ngiyazikhakhazisa ukuba nesokana elinjengawe.” Kutjho uSoBadanile
“Awa itafula le ayipheli ukudegwa nize ngapha sizokudla, ngilambe khulu ngingadla nekomo yoke iphila.”
“ Ha ha ha amahlayakho baba, sekuphelile ukulungisa itafula le sino Ntazi, asidleni” kutjho uNoBadanile.
“Injalo asidleni” kutjho uSoBadanile.
“Yenilalele nizwe…KwaMsiza ngiqeda ukuthola umlayezo ovela esikolweni…umlayezo lo uthi mina, uBadanile ngingumfundisi omutjha wabo. Ezandleni!” kutjho uBadanile, babethe izandla boke…huuureee!
“Kumnandi ngakwethu, kuhle ngakwethu…fanele senze umnyanya omncani wokuthokoza uzimu nabezimu” kutjho uSoBadanile.
“Kunjalo baba kubalulekile ukuthi sithokoze, uZimu nabezimu basithandile kla KwaMsiza.” Kufakaza uNoBadanile.