Molefe le Shoki nne setse ba dira sebaka sa dikgwedi tse tharo ba kgaogane ebile ka nako eo Shoki nne setse a tshotse ngwana wa mosetsana e bong Ntswaki. Glen le Shoki dilo tsa bone nne di phela di tlhakatlhakane morago ga gore Molefe a iponatse kwa Mbewu organic products ebile nako dingwe, Glen nne a sa robale kwa lapeng.

Batsadi ba ga Shoki nne ba tlhapile diatla ba sa batle go utlwa sepe se setswang mo molomung wa gagwe, gape ba ntshitse lefoko la gore a ka nna a dira sengwe le sengwe ka botshelo ba gagwe morago ga gore Molefe a ba itsisi ka ditiro tsa ngwana wa bone. Shoki nne a bona gore lefatshe le mo tlhanogetse a godisa Ntswaki a le nosi. Se se utlwisang botlhoko ke gore nne a sa itsi sepe ka kgodiso ya ngwana ka gore nako dingwe nne e re fa Ntswaki a lela, le ene a dira se ngwana a se dirago. Itsi gore kgodiso ya ngwana ga e bonolo jaaka go bonya leitlho. Nako dingwe o lela fela fa o sena tlhaloganyo e tiileng ya motsadi. O ka fela pelo mme o lele le wena.

Glen nne a dira sebaka sa beke a robala nageng. Shoki a bona gore tota fa o emetse ditshotswane mo marigeng. Mosetsana nne a phuphuta dilonyana tsa gagwe a bapa le tsela. Erile ntse a le motseleng, maru a thibana go supa gore pele la gompieno le phirima go tla nna le pula e matla. O nne a iphaphata jalo le tsela go fithla a tsena kwa lefelong lengwe le le rekisang leokwane. A kopana le morutabana yo nneng a mo ruta kwa unibesiting mme a mo kopa sengwe sa goja. Morutabana yo leina la gagwe nne e le rre Moloi. Rre Moloi o ne a rekela Shoki sengwe sa go ja, ga a fetsa a mmotsa gore ke goreng a lebega ka tsela ye a lebegang ka yone mme Shoki a bua tsotlhe. Moragonyana pula ya na ka matla mme rre Moloi a tsaya Shoki a dula le ene mo sejanageng sa gagwe. O ne a bolelela Shoki gore a ka mo direla sengwe le sengwe fela ga Shoki a ka dumela go robala le ene. Shoki a dumellana le kakanyo ya ga Moloi. Sejanaga sa tsena mo tseleng sa wela wela.

Morago ga matsatsinyana, Shoki a bona gore se a se dirang ga sa siama. A tsaya madinyana ao Moloi a mo fileng one a pepa Ntswaki, a tlhanola direthe. O nne a leba kwa dipalangweng tsa botlhe a batla se se mo romelang gae.

Molefe nne e se motho le basetsana. Itsi gore morago ga gore a kgaogane le Shoki nne a phela a bua ka pelo. O nne a sa batle lekgarebe. O ne a tsaya tshoetso ya gore ene le batsadi ba gagwe ba tshwanetse go fudugela kwa lefelong le lengwe, lebaka e le gore ga a batle go tlhole a bona Shoki gotlhelele. O ne a agetse batsadi ba gagwe ntlo ya maemo a kwa godimo thata. Fa o sa itsi nne o ka nagana gore gongwe ke ntlo ya moporesidente.

Shoki fa a tsena kwa lapeng a fitlhela dilo di fetogile. Molefe o ne a agetse le batsadi ba gagwe ntlo ebile Shoki nne a nagana gore gongwe o latlhegile. Batsadi ba gagwe nne ba mo tlhoma matlho jaaka ekete batho ba bona sepoko. Moragonyana ba batla go bona ngwana. Ba ne ba mo itumelela ebile seo sa tlisa boitumelo mo go Shoki. Mme wa ga Shoki o ne a bua le rre wa teng gore motho o dira diphoso bile o ithuta go tswa mo diphosong tsa gagwe. Fa go le jalo o nagana gore Shoki ko atswang teng o ithutile go le gontsi jaanong a ba mo amogele mo lapeng ba lebale ka tsotlhe. Mme gwa nna fela jalo, ba bowa ba itsisi Shoki gore bo Molefe ba fudugile ebile pele ba tsamaya Molefe o ba agetse ntlo.

***

Morago ga ngwaga, rre wa ga Shoki o ne a ikopanya le batsadi ba ga Molefe a ba kopa gore ba tle kopanong engwe ntleng le kitso ya ga Shoki le Molefe, go tla go buisana ka sengwe gape a ba kopa gore Molefe le ene a iponatse koo. Kgang kgolo e ne e le go bua ka Molefe le Shoki gore ba lomagantse dilo gape. Erile fa letsatsi la kopano le fitlha, Molefe a tsaya sejanaga sa gagwe ba leba kwa ga bo Shoki. Fa ba fitlha koo, ntlo ya kwa ga bo Shoki nne e kgabisitswe ka malomo a mantle. Le wena nne o ka a rata. Batsadi ba kopana ba bua dikgang tsa bone, fa Molefe ene go supa e kete motho a batla go tlhatsa. O ne a emetse kwa a le nosi a kgotlakgotla mogala wa letheka a sa fetse. Moragonyana batsadi botlhe ba ema ka dinao ba bolelela Molefe gore gona le ko ba tshwanetseng go tabogela teng, ba tla bowa mo nakong e sa fedising pelo. Ba ne ba tlogela Molefe a le nosi, a dula sebaka sa ura a rotoletse thelebishene matlho. Erile fa a re gadi, a bona Shoki, mme a ema ka dinao a fetoga semumu. Shoki le ene nne a sa solofela gore o tla kopana le Molefe. O ne a mo tlhoma matlho botlhe ba fetoga dimumu. Morago ga motsotso Shoki a dumedisa Molefe mme lekau le lone la dira fela jalo. Mosetsana a botsa gore batsadi ba gagwe ba kae. Molefe a mmolelela gore ba rile ba batla go tlhabiwa ke phefo. Botlhe ba dula fatshe, Molefe a botsa gore palamonwana ya gagwe e kae.

“A o batla go nyala lekgarebe le lengwe?” Shoki a mo fetola mme seo sa kgakgamatsa Molefe thata. 

Shoki nne a bua tsotlhe tse di mo mafatlheng a gagwe. A bolela Molefe gore tsotlhe tse a di dirileng nne e se ka go rata ga gagwe, lebaka legolo gore a feleletse a ratana le Glen, ke gore nne a fela pelo gore o phela leng bophelo ba ditiro tsa gagwe. Fa go le jalo a batla tiro gore a kgone go thusa Molefe ka madi gore dilo di sa tsaya sebaka. Ka go tlhoka lesego, seo sa fetola dilo tsotlhe. Shoki nne a kopa maitshwarelo a lela go fitlha Molefe a mo didimatsa. Ga a fetsa a digela ka gore, “ga ke itsi gore ke direng. Bophelo ba nkimela. Ga ke itsi gore le wena o nagana eng ka nna fa o mpona. Ga ke kopa tshwarelo ga kere nna le wena re boelane. Ke kopa tshwarelo gore le nna ke phutuloge mo moyeng.”

Molefe nne a mo itsisi gore o itshwaretswe, a se tshwenyege. Ga a fetsa Shoki a mo tlhoma matlho a mo suna. Molefe a kuka lekgarebe ba tsena ka phaposing ya ga Shoki ba dira dilo tsa bone. Morago ga metsotso Shoki a fetsa go tlhapa a boela kwa thelebisheneng a dula fatshe le Molefe, a kopa gore ga e le gore ba ka se kgone go boelana botoka e nne ditsala ka gore ene santse a tlhoka Molefe mo botshelong ba gagwe. Mosimane a mo fetola ka gore botsala ke kakanyo e tlhapileng. Bobedi ba neelana dinomoro tsa mogala gore ba kgone go nna ba buisana.

Botsala jwa bone nne e le bo bo tseneletseng, ebile batsadi ba bone nne ba nagana gore gongwe ba boelane. Molefe o ne a thusa Shoki ka sengwe le sengwe se a se tlhokang, a kgona go rekela le Ntswaki dilo tsotlhe.

Shoki nne a simolola go tsena le kereke a kopa baruti go mo rapelela gore Modimo a mo tshwarele mo dilong tsotlhe tse di maswe tse a di dirileng.

Shoki o tlhoka lekau, Molefe le ene o tlhoka lekgarebe le a ka agang motse le lone. Botlhe ke batlhoki.

Bobedi jo nne bo simolola go phela jaaka bana ba motho, dilo tsotlhe di tsamaya sentle. Gape nako dingwe ba kgona go ikutswa fa batsadi ba seyo ba thusana ebile Ntswaki nne a bitsa Molefe papa. Itsi gore Ntswaki o tlhalefa a bona batho ba e le monwana le lenala.

Fa tlhakole a tlhola matsatsi a le thatharo go setse letsatsi fela gore Shoki a gole, a kopa Molefe go tsamaya le ene kwa teropong gore a kgone go reka dilo tsa letsatsi la gagwe la matsalo. Fa ba fitlha kwa teropong Molefe a sala mo sejanageng. Shoki ene a tsena ka lebentlele. Morago ga sebaka sa metsotso Molefe a fela pelo a fologa sejanaga mme a tsena ka lebentlele a batla Shoki. Fa a re gadi o bona lekau lengwe le tshega le Shoki ebile ba neelana dinomoro tsa mogala wa lethaka. Molefe a tenega a latela Shoki. Fa a fitlha fo go bone a tshwara mosetsana ka letsogo, a botsa lekau gore a ka le thusa ka eng. Shoki a makala a botsa Molefe gore go diragala eng ka ene. Lekau la botsa Shoki gore a motho o ke monna wa gagwe. Shoki a fetola lekau le ka gore, “nnya, nna ga ka nyalwa.”

Lekau la digela ka gore, “yo o tshwanang le wena wa tlhokwa. Ke tla go leletsa pele la gompieno le phirima.”

Erile fa ba leba gae Molefe a tsamaya a tsupulotse molomu tsela yotlhe a sa bui sepe le Shoki. Fa ba tsena kwa ga bo Shoki ba folosa dilo. Fa Molefe a pagama sejanaga a re wa tsamaya, Shoki a mmotsa gore a ke phoso go ipatlela monna? Molefe a se mo arabe a tsamaya fela.

Ka letsatsi la kgolo Molefe ga a iponatsa ko moletlong. O ne a bona ka mafaratlhatlha gore nne go le monate ebile a bona setshwantso sa ga Shoki le lekau le a kopaneng le lone kwa lebentleleng mme seo sa mo kgotlha maikutlo. A tsaya mogala wa lethaka a leletsa Shoki. A mmotsa gore go diragalang ka magareng ga gagwe le lekau le. Mosetsana a mo fetola ka gore leina la gagwe ke Junior ebile ga e se lekau fela ka gore mo nakong e sa fedising pelo ene le Junior ba go nyalana kwa nageng ya Fora (Paris). Ga a fetsa a romelela Molefe setshwantso se se supang gore Junior nne a mo tsenya palamonwana mme Molefe a rothisa keledi a tsaya mogala wa letheka a latlhela kgakala.

***

Morago ga kgwedi Molefe a lebetse ka Shoki, a simolola botsala le Natasha. Mosetsana yo nne a santse a le kwa unibesiti. Itsi gore le ene nne a le montle thata jaaka Shoki. Nne a bopegile sentle ka letheka le le sesane jaaka la mofu, matlho a makima a botala ba legodimo, moriri o tsamayang ko lethekeng ka mmala yo mosweu. Itsi gore ene le Molefe ba kopanetse kwa phakeng ya Newtown.

Botsala jwa bone nne bo tseneletse jaaka botsala ba gagwe le Shoki ba pele. Natasha nne a le monnye mo go Molefe.

Mosetsana yo nne a rata Molefe ka mmele, pelo le moya mme Molefe nne a tshaba go bua le ene ka tsa marato. Nne e re fa a tshwanetse go bua le ene a ba tlelwa ke letshogo. Bontle ba ga Natasha nne bo tshosa, fa o batla go ipala mabala a kgaka ka gore fa o iteba e be o mo tlhoma matlho nne o inyatsa le wena.

Jaaka o itsi gore basetsana ke batho thata le mafaratlhatlha, Natasha a tsenya ditshwantso tsa gagwe le Molefe ba le kwa phakeng, kwa lewatleng, kwa sinema, kwa Table Mountain gape ba pagame sefofane, a di latlhela mo mafaratlhatlheng gore mang le mang a di bone. Erile Shoki a fetsa go di bona a se senye nako a tsaya mogala wa letheka a leletsa Molefe go mmotsa ka ene le mosetsana o, mme a seke a tsena kafa atswa kafa. O nne a bua puo phaa gore mosetsana yo a botsang ka ene ke Natasha mme ga e se mosetsana fela ke mosadi wa ditoro tsa gagwe. Shoki a kgaola mogala a sulafalelwa jaaka motho ba mo tsetse monna. Ga a fetsa a bolelela Junior gore o batla go pagama sefofane mme Junior a mo fetola ka gore ga ana madi. Sa gore ba ka pagama sefofane gape ke goreng a nagana dilo tse? Shoki a mo fetola ka gore ke kakanyo fela e e tlileng mo tlhaloganyong ya gagwe. Ga a fetsa a leba ditshwantso gape ka pelo e botlhoko.

Morago ga beke Natasha a kopane tlhogo kwa unibesiti morago ga go tlhatsa a tsaya mogala wa letheka a leletsa Molefe. A mmolelela gore o nagana fa a le mo mmeleng ka gore ga a ikutlwi sentle. Tseo tsa nna dikgang tse di monate mo ditsebeng tsa Molefe mme teng foo mosimane a se senye nako a kopa Natasha gore a mo nyale. Mosetsana ka gore le ene nne a rata Molefe a dumela. Potso ke gore a Shoki otla e kgona papadi e a batlang go e tshameka.

Tshwarelo e teng e beilwe. Fa o kopa tshwarelo ga go reye gore wa nyatsega. Kopa tshwarelo mo bathong ba o ba diretseng bosula, kgotsa o ba robileng dipelo go sa kgatalesege gore a o monnye mo go wena kgotsa jang, ka gore fa o sa dire jalo o tsoga o tlhoka thuso mo mothong oo mme a ka se go thusi ka sepe.

Bokhutlo.