Sekobo e be e le letseka la go ratwa ke batho. Ba be ba mo tshepa kudu ba re o fediša bonokwane motseng ebile ba ikwa ba šireletšegile ka lebaka la gagwe.

Seo ba bego ba sa se tsebe ke gore o be a šomišana, le monna tsoko wa senokwane yo leina la gagwe e lego Mashiyankane. O be a mo sepeletša diokobatši ka sefatanaga sa gagwe sa maphodisa. Bobedi bo be bo neelana diokobatši tšeo kua nokeng moo ba sa bonwego ke batho ka ge noka e be e le kgojana le motse ebile e bapile le polasa.

Erile ka le lengwe la matšatši ge ba le gare ba le moo nokeng ba dira tša kgwebo, Rapolasa a ba bona. Sekobo le Mashiyankane bona ba be ba sa lemoge gore gona le motho yo a ba bonago.

Rapolasa di ile tša mo tšhoša gobane le yena a tseba Sekobo e le monna wa molao. O be a tloga a tseba le Mashiyankane gabotse. Gape batho ka moka ba be ba tseba gore Mashiyankane ke radiokobatši yo mogolo moo motseng ebile ba rapela gore ka le lengwe la matšatši Sekobo a mo sware gore a tle a hlomole naga mootlwa.
Rapolase o ile a botša bašomedi ka seo a se bonego. A tloga a ba laya tsebe go kwa gore ba hlokomele Sekobo gobane ke phiri ka gare ga letlalo la nku.

Bašomedi ba Rapolase ba ile ba leba motseng. Ba bitša kgothekgothe go tlo hlalosa seo Rapolase a ba boditšego.
“Setšhaba sa gešo,” yo mongwe wa bašomedi a thoma. “Re biditše kgothekgothe ye gore le re thuše go kwa tšeo rena re di kwelego mola mošomong,” o ile a homola gannyane e le ge a metša mare ka ge seo a bego a le kgauswi le go se tshwa se mo imela mafahla.
“Bolela monna!” Setšhaba sa goa.
“O reng ebile o tomoletše Morena Sekobo mahlo bjalo?” Yo mongwe wa badudi o ile a botšiša.
“Setšhaba, gape Rapolase o re motho yo rena re mo tshepilego gore o tla re tšhireletšo, o šomišana le senokwane se segolo mo motseng.”
“Eng!” Setšhaba sa makala. Go ile wa tsoga lešata le legolo batho ba sa kwešiše gore o bolela ka eng.
“Monna yo wa gešo o bolela therešo bagešo. Gape Rapolase o re Morena Sekobo o šomišana le yona Mashiyankane. O re o ba bone ba neeletšana diokobatši,” yo mongwe wa bašomi o ile a tlaleletša.
“Eng! Sekobo ka moka? Gape seo e ka se be therešo. Monna yo o somela setšhaba se ka boikgafo kudu. Nna ke a gana!” Yo mongwe wa badudi o ile a realo ka bogale.
Taba yeo e ile ya ahlwaahlwa gomme ya hloka bohlatse. Sekobo le yena o ile a itatola a ba a bontšha gore Rapolase yoo go bolelwago ka yena ke senokwane sa go utswa dikgomo tša batho ebile ba mohlaleng wa gagwe. O ile a re mohlomongwe ke ka moo a nyakago go mo senya leina.
Setšhaba se ile sa ferekana kudu, ba kwana gore Rapolase a hlaselwe.
“Aowa magagešo! Se direng bjalo, hle. Gape le tla swarwa. Mo tlogeleng ka maaka a gagwe.”
Setšhaba se ile sa theeletša Sekobo gomme kopano ya phatlalala.
Sekobo o rile ge a etšwa moo kopanong a leba gae gore a yo fihla diokobatši tšeo a bego a na le tšona ka sefong. E rile ge leswiswana le swere, a thoma go epa molete gore a kgone go di fihla ka gare. Ge a fetša a leletša Mashiyankane go mo hlalosetša ka seo Rapolase a se dirilego.
“Monna wa gešo, gape go senyegile,” Sekobo o ile a botša mogwera wa gagwe mogaleng.
Ke eng! Se ntšhoše hle, monna. Tia di lle.”
“Gape Rapolasa o re bone maloba kua nokeng.”
“Eng! Re swanetše go mmolaya! Ke tla fetša ka yena,” Mashiyankane o be a betše.
“Dira bjalo monna. Efela o kgonthišiše gore setšhaba se se ke sa re belaela,” Sekobo o ile a realo a retologela ngwakong wa gagwe.

O ile a lemoga gore mosadi o mo lebeletše ka lefasetere gomme o bone tšohle. Letšhogo le ile la mo wela, a napa a leba ka moo ngwakong.

Mosadi wa gagwe o ile a itshwariša boroko ge a ekwa monna wa gagwe a tsena ka phapošing. Sekobo o ile a lemoga le semeetseng gore mosadi wa gagwe o bone le go kwa tšohle. O rile mola mosadi wa gagwe a swarwe ke boroko, a tsoga a ya a tšea seokobatši gomme a se tšhela ka gare ga meetse ao mosadi a bego a a beilego dihlogong tša bolao gore a kgone go a nwa bošego ge a swerwe ke lenyora.

Re botše: Naa o nagana gore maikemišetšo a Sekobo ke eng ka seokobatši seo a se tšheletšego mosadi wa gagwe?