Go be go na le monna yo mongwe yo a bego a bitšwa Sekobo. Sekobo e be e le monna wa letseka yoo a bonalago a dira mošomo wa gagwe ka bothakga. O be a bile a hlomphega setšhabeng. E be e re ge a tšwelela, batho ka moka ba tšhoga ba ipotšiša gore ekaba o tlile go swara mang.

O be a tloga a olela mahodu a motsana wa gabo le e mengwe ye meraro ya mabapi le wa gabo yeo e welago ka fase ga seteišene sa gagwe sa maphodisa. Ge e le ba dihlophana tša diokobatši bona o be a ba swara mehla ye.

Ka lapeng o be a šegofaditšwe ka basetsana ba babedi le mošemane o tee. Mošemane yoo wa gagwe o be a šomela Gauteng. Ge e le basetsana bona ba be ba e tsena sekolo. Yo mogolo o be a le mphatong wa Marematlou mola wa mafelelo a be a dira Kgerata ya Lesome.

Erile ka le lengwe la matšatši mosetsana wa gagwe yo monnyane a hwetša sefe ya tatagwe e butšwe. O ile a hlolela ka gare gomme a hwetša diokobatši. Seo se ile sa mo tšhoša kudu gomme a tšwa ka lebelo. O be a sa tshepe gore tatagwe a ka swara diokobatši.
“Tate wa ka le diokobatši? Ijoo!” O be a tšhogile ebile a thuthumela. Sebotse o ile a ipotšiša gore a direng ka se a se bonego. A ye maphodiseng goba a botše mmagwe?

Sekobo o rile ge a boa, a tšhoga kudu ge a hwetša sefe ya gagwe e butšwe. O ile a tlalelwa kudu. Sekobo o ile a bitša ba lapa la gagwe ka o tee ka o tee. O thomile ka mosadi wa gagwe
“Mahlako, ekaba o ile wa ya ka kua phapošing ya rena ya borobalo?”
Mahlako o ile a fetola ka gore, “aowa … e sa le ke eya mašemong mesong. Ke gona ke boa. Na ekaba go na le bothata mogatšaka?”

Sekobo o ile a fetola ka pela a re, “aowa, aowa … ga gona bothata le gatee.”

Go tloga moo a leba go kgarebjana ya gagwe e nnyane yeo ba bego ba re ke Sebotse.
“Botse ngwanaka. na o kile wa tsena ka kua phapošing ya ka lehono?”
Sebotse o ile a fetola ka letšhogo a re, “aowa tate. Kganthe go diregile eng?”
“Ke lahlegetšwe ke selo tsoko se sengwe.”
“Ke eng selo sa gona tate?”
“Tlogela. Ga e tshwenye.”

Erile mola e le bošego ba robetše, Sebotse a botša sesi wa gagwe ka seo a se bonego.
“Gape tate o tlogetše sefe ya gagwe e butšwe lehono. Ke bone diokobatši ka gare ga yona. Nna ke nagana gore re tsebiše ba molao.”
“Gape wena ke a o tseba. O rata maaka kudu. Tate ke letseka, mos. Le gona ge ekaba o bolela nnete go ra gore o di tšeetše dinokwane.”
Go tloga moo, Sekobo o ile a kgonthišiša gore o dula a notletše sefe ya gagwe. O be a netefatša gore mosadi wa gagwe ga a bone moo a beilego senotlelo.
Ka madimabe, o ile a itebala tšatši le lengwe e le ge ba mmiditše ka pela mošomong. Go be go na le lehodu leo e lego kgale ba le nyaka gomme ba sa le hwetše. Sekobo ka ge e le yena a swerego molato woo a gapeletšega go tšwa ka lebelo pelo senokwane seo se timelela gape.

Mosadi wa gagwe o ile a šala a hlwekiša phapoši ya bona a ipotšiša gore ebego lehodu leo monna wa gagwe a le kitimelago ke le šoro bjang. O rile ge a re mahlo moo sefe e lego, a tlabja ke go bona senotlelo se lekeletše go yona. Pelo ya re bula o bone gore ka gare ke eng. Mosadi o ile a bula gomme a gahlanetšwa ke matsebetsebe a dipampiri le diphuthelwana.
O ile a bula se tee sa diphuthelwana a ipotšiša gore ke eng ka gare. Lerole le lešweu la mo hlakanetša. “Ijoo! Le ge ba reng … gape tše tšona ke diokobatši. Ke gore monna yo o gweba ka diokobatši? Monna wa go hlomphega setšhabeng ka tsela e?”

Mosadi o rile a sa kgotsa bjale, monna wa gagwe a tšwelela a garihla go bontšha gore o be a lebetše se sengwe.
“Hei! O dirang moo?” Sekobo a goa ka pefelo.
“Ke… ke bone sefe ya gago e bulegile. Ke be ke re ke a e tswalela,” o be a tšhogile.
“Bjale o ahlametše eng seo o sa se tsebego ka moo?” Sekobo a bolela ebile a mo kgaphela thokwana.
“Ntshwarele hle, mogatšaka. Ke phošo,” mosadi o be a bile a thuthumela ka letšhogo.
Sekobo o ile a lemoga gore ge a ka befelelwa mosadi wa gagwe kudu, go be go tla itaetša gore go na le seo a se fihlago. O be a ipotša gore mosadi wa gagwe ga a tsebe selo ka diokobatši.

Re botše: Naa o nagana gore ba lapa la sekobo ba swanetše go tsebiša ba molao ka se ba se bonego?