(Prince ke mosimane yo o filweng botlhale bo bo tseneletseng, nne a sa tlhoke go buisa gore a tshwarelele se a se rutiwang kwa sekolong ka gore fa a rutilwe kgotsa a boleletswe sengwe, nne a sa se lebale gape a itsi le dipuo tse robedi tsa naga ya Aforika borwa.
Hector ke tsala ya ga Prince ya tlhogo ya kgomo. Itsi gore bobedi bo bo ne bo dira mophato o le nosi ba farologanngwa fela ke dithuto tse ba di dirang kwa sekolong mme botlhe ke basweu)

Letsatsi la 1: Pele ga lekwalo
(Jaaka o itsi gore Hoërskool ke sekolo se se tletseng ka basweu, motho montsho o ka mo supa fale le fale. Dikolo nne e le gone di bulwang, ngwaga e simolola. Baithuti nne ba tswa ka fa ba tsena ka fa. Basimane ba itumeletse go bona difatlhego tse dintšhwa tsa basetsana mme ka nako eo Prince le Hector nne ba dutse kwa lebaleng la kgwele ya dinao ba tshwere dikgang)
Prince: (O bua a lebile basetsana) Ke bona ngwaga e e tshwana le e fetileng. Ga ke bone mosetsana yo a nkgatlhang.
Hector: Tota o opile kgomo lonaka, nna gongwe ke tla batla o ke tsamaisang nako ka ene ka gore tota nna dilo tse tsa marato ke go itsenya mo mathateng fela.
Prince: (O bua a tshega) Ke go itsenya mo mathateng kgotsa go tlhabiwa ke ditlhong tsa go ipala mabala a kgaka?
Hector: Nnyaa! Monna ga se go tlhabiwa ke ditlhong kgotsa go sa itsi go ipala mabala a kgaka. Lebaka ke gore fa o ipala mabala a kgaka mo mosetsaneng a ba go gana go utlwisa botlhoko.
(Itsi gore Hector o lekile go ipala mabala a kgaka makgetlho a le mmalwa a retelelwa mme ka go tlhoka lesego la bofela fa a ipala mabala a kgaka o rogakilwe ke mosetsana fa pele ga baithuti ka ene. E rile ntse ba tshwere dikgang mogokgo wa sekolo e bong rre Prinsloo a laela baithuti go tsena ka diphaposing go simolola dithuto)
(Mo phaposing ya ga Prince go tsena morutabana eo e bong Mme Khumalo. Ke ene fela morutabana wa motho montsho kwa sekolong sa Hoërskool)
Khumalo: Ke kopa tidimalo. (Gwaa didimala) E simolotse nako ya go dira. Ke nagana gore lotlhe fa le itsi leina laka kgotsa fa go le baithuti ba ba ntšhwa ba eme ka dinao ke ba bone.
(Gwa ema mosetsana wa motho montsho le basimane ba babedi ba basweu)
Leina laka ke Morutabana Khumalo. Ke nagana gore nna le lona re tlile go dirisana mmogo.
(Prince o ne a rotoletse mosetsana wa motho montsho o mo ntšhwa matlho go supa fa a mo kgotlhile maikutlo. Fa ntse Khumalo a ruta, Prince a gadima a bona mosetsana o le ene a mo tlhomile matlho. Mosimane a tsholetsa seatla a dumedisa mosetsana mme mosetsana a tshega a le nosi. Fa sekolo se tswa Prince a tabogela mosetsana pele a tswa ka phaposi)
Prince: Hi, ke nna Prince.
Molly: Oh, ke itumelela go itsi. Ke nna Molly.
Prince: A o dula teng mo Harristown?
Molly: (O bua le ene a tsamaya) Ke goletse mo Harristown. Lesika laka le dula teng mo.
Prince: (O bua a mo tshwara letsogo go mo emisa) Ke kopa motsotso mo nako ya gago.
Molly: O tlhotse motshegare otlhe o mpona o sa bui le nna. E ke nako ya gore ke lebe gae. (Prince wa mo tlogela) O sa tshwenyega, ngwaga e telele. (Molly o ne a bua jalo a tsamaya)

Letsatsi la bo 2
(Hector le Prince ba tshwere dikgang phakela jaaka metlha)
Hector: (O bua a itumetse) Tau go mosetsana mongwe o ke mmoneng maobane a apere diaparo tsa sekolo sa rona. Ke nagana gore ke ngwana wa rre Owen.
Prince: Rre Owen wa moagisane wa ko ga lona?
Hector: Ee, ke teng ko mosetsana o a dulang teng. Mosetsana ole o montle thata. Bothata ke gore ke motho montsho jaanong gore ke bue le ene ka namana go nna bokete.
Prince: Ga ke dumele ka gore go le gantsi batho bantsho keletso ya bone ke go ipona a dula le motho wa motlhobo wa rona, jaanong ipete pelo o bue le ene mme o mmontshe tlhompho le boikokobetso gore a bue le wena a phuthologile.
Hector: (O bua a kgwa mowa) Ke tla leka ka gore le ene fa a ntlhoma matlho o senya sefatlhego go supa fa a sa nthata. Mme fa ke bona gore ka palelwa ke tla mo kwalela lekwalo. Santlha re tshwanetse go itsi gore re tla kopana le ene ka tsela efeng.
Prince: Ga gona molato wena ga o ka mmona o mo mpontshe gore ke leke go bua bontle mo go ene.
(Mongwe le mongwe o leba kwa phaposing ya gagwe. Prince fa a tsena ka phaposi Sofia le Chantelle, ditsala tsa ga Molly ga mmogo le ene Molly, ba mo tlhoma matlho go supa fa ba bua sengwe ka ene. Mosimane a se nagane thata ka yone a tsena a dula fatshe)
Molly: (O bua ntse a mo rotoletse matlho) Goreng gompieno a sa bui le nna?
Sofia: Chantelle o go boleletse gore Prince dilo tsa marato ga a nagane thata ka tsone. Ke raya gore lerato le dibuka mo go ene ga di tsamaye tsela e nosi. Itsi gore mosimane o ke naledi mo dithutong.
Molly: (A gogwa mowa) Jaanong ke tshwanetse go dirang gore a kgone go bona fa ke morata?
Chantelle: O itsi jang gore wa morata?
Molly: (O tshega a le nosi) Ga ka kgona go robala bosigo. Nne e le la ntlha ke ikutlwa ka tsela e letseng ke ikutlwa ka yone maobane. Ga ke nagana ka mosimane o, ke mo lora ke butse matlho. Le ditoro tsa botshelo baka ga di phale toro e ke e lorang ka ga Prince. Fa ke robala ke motho wa bofelo go nagana ka ene mme phakela fa ke tsoga ke motho wa ntlha mo tlhaloganyong yaka.
Chantelle: Go supa fa o mo rata thata mme a ke gofe botlhale. Ga o batla selo kgotsa sengwe se e seng o tsamaye o nne le sone, o tshwanetse go dira dimakatso tse e seng o tsamaye o di dira.
Sofia: Chantelle o opile kgomo lonaka. Dira ka bojotlhe gore o gokele Prince mo go wena. Jaaka maobane a kgonne go bua le wena, le gompieno dira se o se dirileng maobane gore a kgone go bua le wena, mme o foo supa gore wa mo rata ka nnete.
(Dithuto tsa tswelela pele go fitlha ka nako ya dijo. Prince le Hector ba tsamaya phaposi engwe le engwe ba batla mosetsana o gapileng maikutlo a ga Hector. Morago ga sebaka Hector a bona Molly le ditsala tsa gagwe)
Hector: (Ka boitumelo) A o bona mosetsana ole wa motho montsho? (O bua a supa Molly)
Prince: Ke mmona sentle. Leina la gagwe ke Molly.
Hector: (Ka go makala) Jaanong o tsaya kae leina la gagwe?
Prince: Re tsena phaposi e nosi nna le ene. A ke ene mosetsana o buang ka ene?
Hector: (Ka lentswe le le tlhapileng) Ke lone lenyoloi la pelo yaka, e bile ke nagana gore ba re lemogile gore re bua ka mongwe wa bone.
(Molly le ditsala tsa gagwe ba ba rotoletse matlho)
Prince: Ke nagana gore ke nako ya gore o mmitse o mo bolelele gore o ikutlwa jang ka ene santse ba re lebile.
Hector: O opile kgomo lonaka.
(Hector a atumela bikinyana fa go bone a emisa seatla go supa fa a bitsa mongwe mme basetsana ba kopana ditlhogo ba sa itsi gore mosimane o bitsa ofeng. Ba supa Chantelle, mosimane a thikitha tlhogo. Fa ba supa Molly mosimane a dumela ka tlhogo)
Sofia: Ke nako tsala.
Molly: (O bua a emelela) Jaanong goreng a roma tsala ya gagwe ene a sa itlisi ka namana?
Chantelle: Mofe nako ke nagana gore ke mosimane o ditlhong.
(Molly o latela Hector)
Molly: (Ka boitumelo bo bo tseneletseng) Hi.
Hector: (O tshogile) Hi, ke nna Hector wena o mang?
Molly: Molly.
Hector: Ohoo, Molly ngwana wa ga Owen?
Molly: Ee rre Owen. Iketle pele. O itsi jang gore ke ngwana wa gagwe?
Hector: Ke moagisane wa kwa gae.
Molly: Ooh! Ke wena letseng ke go bona o tlhatswa sejanaga?
Hector: Ee.
Molly: Ke itumelela go o itsi moagisane.
Hector: Maobane ga ke go bona ke utlwile ke tlelwa ke boitumelo le lerato fa …
(Molly o mo tsena mo ganong)
Molly: (O bua a tshega e bile a sulafalelwa) Iketle pele. Kgang ya gago e lebile kae?
Hector: (Ka boikokobetso) Ka go rata Molly.
Molly: (O itshwara sefatlhego) Ooh Modimo waka! Hector ka itsi go rata motho go utlwalega jang, mme go bua nnete fela, nna ga ke na kgatlhego mo dilong tsa marato. Ke maswabi.
Hector: (Go supa fa a feletswe ke mafoko)
Molly: (Ka go tlhomoga pelo) Re ka nna ditsala ga o batla.
Hector: (Ka go kgobega marapo) Ga gona molato.
(Ba kgaogana mongwe le mongwe o boela morago. Hector o tsena fa go Prince)
Hector: (Ka go robega pelo) Ke nagana gore ga ketla ka fa tshetshanyaneng ke tlhoka lesego.
Prince: Monna ga a fele pelo tsala. Sengwe le sengwe ga o se simolola se thata, mme fa go le jalo wena o tshwanetse go loga leano la go dira gore se nne bonolo, gape itsi gore dilo tse dintle di tsaya nako e telele.
Hector: (Ka go kgothala) Leano la ntlha ga la tsamaya sentle mme la bobedi ke solofela le ya go ntirela.
Prince: Leano la bobedi?
Hector: Ke mo kwalela lekwalo.
(Matsatsi le dikgwedi nne tsa feta Hector a kwala lekwalo a iketlile, botsala ba gagwe le Molly nne bo mo kgoba marapo ka gore pelo e batla lerato e seng botsala. Ka fa letlhakoreng le lengwe Molly le ene a leka ka bojotlhe go gokela Prince mo go ene. Prince le ene ga re bua nnete o ne a rata Molly. O kgobilwe marapo ke gore tsala ya gagwe le ene o bone se a se boneng mo mosetsaneng o)

Letsatsi la bo 81
(Ka letsatsi la tshipi fa Kereke e fetsa go tswa, Hector a kopana le Prince mme a monela lekwalo gore a tsoge a le nela mosetsana wa ditoro tsa gagwe kwa sekolong)
Hector: (Ka boitumelo) O itsi gore ga go mosetsana ope o ka ganang mosimane fa a fetsa go monela lekwalo le.
(O bua jalo a monela lone)
Prince: Tota le nna nka dumela ka gore setse letswa mo ntlong ya Modimo. Fa e le gore a ka akanya go gana itsi gore Modimo wa go tsena mo pelong ya gagwe a dira gore a go rate jaaka o mo rata.
Hector: (Wa tshega) Ke setse ke boleletse le bagolo ka mosetsana o mme ba re ke iphe nako. Ke solofela gore sebaka se ke se dutseng se lekane.
(Ba kgaogana)

Letsatsi la bo 82
(Prince le Hector ba phakelela kwa sekolong gore ba kgone go dira dilo nako santse e le teng. Ka go tlhoka lesego fa ba tsena koo ba fitlhela mosetsana a seyo. Letsatsi leo nne a sa tla sekolong mme Prince fa sekolo se tswa a kopa Sofia le Chantelle ba mo fetisetse lekwalo le kwa go Molly. Bosigo ba letsatsi leo Chantelle a kopana le Molly)
Chantelle: Ke maswabi gotla bosigo bo fa galona. Prince o kopile gore ke gofe lekwalo le.
(O bua jalo a monela lone)
Molly: (O supa Boitumelo) Ka ipotsa gore le bua ka ga eng, o mo itsise gore ka lwala ke tshwere ke dikodu gongwe ka go tla sekolo beke e latelang.
(Ba kgaogana, Molly o tsena ka phaposing ya gagwe ya borobalo. A bula lekwalo a ba a dula fa godimo ga bolao a le buisa)
Molly: (A buisa lekwalo) Lerato la pelo yaka, ke badile dibuka tse di fetang lekgolo tsa lerato, ke batlana le mafoko a monate a ketla go bolelelang o ne ga o ka mpha monyetla gape wa gore ke kopane le wena. Itsi gore mo dibukeng tse go lefoko le le nosi fela le le tlhaditseng buka. Ke bua ka lerato. Itsi le nna pelo yaka e tlala ka lerato fa ke go bona. Fa ke ntsha dimmepe tse ke di tshepileng ke batlana le mosetsana o ke moratang ga ke bone mmepe ke bona sefatlhego sa gago fela. Pelo yaka e bitsa leina la gago bosigo le motshegare. Itsi gore o utswitse pelo yaka e bile fa nkabe gotwe o kgona go tshwarisa motho fa a dirile jalo, nna nne ke ya go moma molomu fela, godimo ga foo e be ke go rotloetsa gore o sa ema o dira tiro e siameng.
Ga se ke tsamaye ke rata motho ka tsela e ke go ratang ka yone. Letsatsi la ntlha fa ke go bona ke ge ke simolola go bona lesedi mo botshelong baka teng foo ka itsi gore Modimo o ntlisitse mo lefatsheng le gore ke kgone go kopana le wena, fa nkabe pelo ya gago e le kgolegelo nne ko nna mmolai gore ba ntatlhele kwa kgolegelong. Fa nne gatwe lerato la gago ke metsi a tsamayang ka molapo go leba kwa lewatleng, itsi gore nne ke ya go batla go nna lewatle gore ke kgone go o amogela ka ditsela tse di farologaneng. Ga se phoso yaka gore ka rata, ke phoso ya gago o batlang mo lefatsheng le?
Ke eletsa gore nkabe ke na le senotlolo sa pelo ya gago gore ke e bule ke tsene mo go yone. Go rata go tshwana le go hema, ga go le jalo ka go emisa go hema ka tsela efeng?
Molly mosetsana yo o tshwanang le wena wa tlhokwa. Ga ke go ratele bontle ba gago, ke rata sengwe le sengwe ka ga wena.
Nka se dire gore o nthate ga ke mo pelong ya gago. Se ke se kopang ke gore nteke o bone gore lerato le ke go ratang ka lone ke le le ntseng jang ka gore fa o sa nteke o ka se itsi.
Ke eletsa gore nako e re kopanang e be o le lekgarebe laka. Ka go rata lenyoloi laka.
(Molly fa a fetsa go buisa lekwalo le o nagana gotswa ka letlhabaphefo a latele Prince. Phoso e nosi fela mo lekwalong le ga gwa kwadiwa gore letswa kae mo go mang, mme Molly ene ka gore o rata Prince a nagana gore Prince ke ene a mo kwaletseng lone. Mosetsana o ne a lala a lela bosigo botlhe ga a gopola mantswe a monate a atswang mo lekwalong le. Hector o ne a gakgamala thata gore beke e wela fela e se a fetolwe gore a wa ratiwa kgotsa jang. Prince le ene o ne a ipotsa gore a Molly o tlogetse sekolo kgotsa jang)

Letsatsi la bo 88
(Prince le Hector ba phakelela gape kwa sekolong mme letsatsi le o nne ba dutsi kwa lebaleng la kgwele ya dinao ka gore ba itsi gore fa o dutse foo o bona mongwe le mongwe. Fa ntse ba dutsi, Molly a tlhagelela a lebile ko ba iketlileng teng. Fa ntse atla kwa go bone Hector a tlelwa ke boitumelo)
Prince: (Ka boitumelo) Go supa fa leano le tsamaile sentle.
Hector: Didimala pele a go utlwa.
(Botlhe ba didimala. Molly ga a tsena foo a tshwara Prince ka matsogo a mo suna, mang le mang a lebile)
Hector: (Ka tenego le kgakgamalo) Go diragalang Prince?
Molly: (Ka boitumelo) Ooh! Hi Hector … Ke kopa go bua le lekau laka pele dithuto di simolola.
(Hector le Prince ba tlhomana matlho, Prince a maketse a sa itsi gore go diragalang fa Hector ene a robegile pelo e bile a batla le go lela)
Hector: (O bua a baya dibuka fatshe go supa fa a batla go betsa Prince ka mabole) Tau tlhalosa gore go diragalang fa!
Molly: (O bua a tshwara Hector gape a maketse) Heee motho! Keng se se phoso se se diragetseng fa ke suna motho waka? Kgotsa ga o batle ke nna le ene ka gore wa mpatla? Ke go boleletse gore nna le wena re ditsala fela e bile fa o batla go lwantsha lerato la pelo yaka, itsi gore botsala ba rona bo felela teng fa.
Prince: (Ka kutlobotlholo) Ke maswabi, He …
(Hector o mo tsena mo ganong)
Hector: (O bua a lela) Go simololeng bonnyaneng nne ke nagana gore o tsala ya tlhogo ya kgomo. O ntšwa!
Ka nna le wena go fedile.
(Wa tsamaya o ba tlogela ba le babedi. baithuti ba bangwe ba lebile tiragalo e e bile ba bangwe ba tsaya ditshwantsho ka megala ya letheka)
Molly: Go diragalang ka tsala ya gago?
Prince: (O wele mowa) Molly a ditsala tsa gago di go file lekwalo?
Molly: Ee ke lone le dirileng gore ketle fa go wena jaaka re bua gore ke kgone go bolelela ka namana gore le nna ka go rata.
Prince: (Ka go makala) Lekwalo lele ga letswe mo go nna. Ke la ga Hector.
Molly: (O bua a itshwara sefatlhego) Iketle pele. Jaanong o batla gore wena ga o nthate?
Prince: Ga kere ga ke go rate.
Molly: Kgang ya gago eya kae? Tlhalosa.
Prince: Le nna ka go rata Molly. Ee, itsi gore Hector ke ene motho wa ntlha go batla lerato e seng nna.
Molly: (O bua a itshekile dikeledi) Ga o kgone go bona sepe ne? Go simolola letsatsi la ntlha ke go bona nne ke ipona ke le mo maratong le wena le fa wena nne o sena sepe le nna. Ke leka ka bojotlhe go ngokela mo go nna o sa bone sepe. Ditsala tsaka di mpoleletse gore o rata dibuka. Fa go le jalo ke leka ka thata gore ke kgone go tsena mo tlhaloganyong ya gago mme ka dira jaaka ba buile. Prince ga ke botlhale jaaka o mpona ke le botlhale ko phaposing. O ka se mpone ke tshegatshega fela. Ga ke mosetsana o ratang dilo tsa sejwalejwale. Ke rata dijo. Prince itsi gore ke itima dilo tse ke di ratang. Ke rata tse wena o di ratang gore ke kgone go dula ke bapile le wena ka nako tsotlhe. (O bua a lela) O mosimane wa ntlha o ke simololang go tsena le ene mo maratong, mme go utlwisa botlhoko fa o rata motho ene a sa go rate. Ga ka dumela go nna lekgarebe la tsala ya gago ka gore nne ke itsi se pelo yaka e se batlang. A tota wa nthata Prince?
Prince: (O kgwa mowa) Molly letsatsi la ntlha fa nne kere ke bua le wena o ganne go mpha nako gore ke go bolelele ka tsela e ke ikutlwang ka yone fa ke go bona. Ee, ka go rata e bile se nkabe o se itsitse letsatsi la ntlha fa nne ke go bolelela leina laka.
Molly: (O tsenya tlhogo ya gagwe mo sefubeng sa mosimane o a lela) Nna ka go rata Prince. Ka pelo yaka yotlhe.
(Molly le Prince nne ba tsena mo leratong morago ga matsatsi a le 88. Bobedi jo nne bo ratana ka nnete e bile le baithuti bangwe nne ba eletsa fa nkabe e le bone ba le mo leratong leo.
Ba ne ba itsisi bagolo gore ke baratani mme Owen ene a se itumelele seo. O ne a bolelela Molly gore a tlogele mosimane o fa a sa dire jalo a tswe mo lapeng la gagwe. Mosetsana ka gore lerato nne le tuka, a tsamaya a dula le Prince kwa gabone. Morago ga beke tse pedi Prince a roba mosetsana lepara mme seo sa dira gore Molly a tlogele sekolo)

Letsatsi la bo 181
(Molly nne setse a dira dikgwedi tse thare le beke tse pedi a le mo mmeleng, mme ka nako eo ditsala tsa gagwe nne di tlile go mo tlhola)
Chantelle: (Ka boitumelo)
Tota ke fela pelo go bona Prince Junior.
Sofia: A setse le naganne ka leina la ngwana?
Molly: Ee, Prince a re leina la gagwe ke Austin.
Chantelle: Ke leina le le monate.
(Fa ntse ba tshwere dikgang Prince a tsena go supa fa utlwile botlhoko mme Molly a mo sala morago)
Molly: (Ka go tshwenyega) O supa o sa itumela.
Prince: (Ka mowa o ko tlase) Gompieno ke lekile go kopana le Hector mabapi le se se diragetseng magareng ga rona. Ke ne ke batla go kopa tshwarelo mme a nkgoba pelo ka mafoko.
Molly: (Ka go makala) Mafoko?
Prince: Ee nne go setse monwana le lenala fela gore a ntlhapaole.
Molly: Ke nagana gore nna le wena re tshwanetse go kopa maitshwarelo re le babedi, ka nako e nosi ka gore ga se wena fela o mo utlwisitseng botlhoko.
Prince: Seo ke kakanyo e botoka ka gore motho ole ke tsala yaka ya tlhogo ya kgomo mme fa a ka re itshwarela le rona re tla phela ka boitumelo.

Letsatsi la bo 182
(Ka letsatsi la tshipi kwa kerekeng fa moruti a fetsa go buisa lekwalo Prince a ema ka dinao a tshwara Molly ka seatla ba ema fa pele ga phuthego. Bagolo ba ga Prince le Owen, rre wa ga Molly botlhe nne ba maketse)
Prince: Moruti ga mmogo le phuthego re kopa le re inele matsogo mo metsing go ema fa ka nako e. Re eme fa go kopa maitshwarelo mo tsaleng yaka e bong Hector. (O bua a gogela mowa ko teng) Tsala, re kopa o re itshwarele mabapi le tiro e diragetseng kwa sekolong. Ra itsi gore re go robile pelo mme se o tshwanetseng go se itsi ke gore le nna pelo yaka e robegile morago ga go latlhegelwa ke tsala e ke e ratang e se ka maikaelelo. Ke a leboga.
(Fa kereke etswa, Hector a kopana le Prince le Molly)
Hector: Romeo and Juliet, le ditsala tsaka. Le fa nna le lona re ka lwana, seo se ka se fetoge.
Molly: (Ka boitumelo) A seo se raya gore o re itshwaretse?
Hector: (O bua a tshega) Ke tla le itshwarela fa fela le ka bitsa ngwana wa lona Hector.
(Botlhe ba swa ka ditshego mme e rile fa Molly a fetsa go tshola ngwana ba mmitsa Hector. Ka nako eo Owen nne setse a amogetse gore Molly wa ratana gape a itumetse thata go bona setlogolo sa gagwe.
BOKHUTLO.