Ziqale bonyana umuhle kangangani,

Uyakarisa.

Uyameruza njenge kwekwezana.

Uyaphazima kuyazitjho bona umraro awukho,

Udla uzitjhebise.

Kanti wena wenza ngani?

Siyalila sithi kuncani,

Kodwana wena awulili ubona kukunengi,

Kwanela woke umuntu.

Sithi ipilo le inzima, siyanghonghoyila.

Kodwana wena uthi ilula khulu begodu uthabile,

Uthokozela lokhu okuncani onakho.

Sithi abasenzeli lutho,

Wena uthi unezandla zokwenza.

Yoke imiraro, wena uyibona kulithuba elingenza bona uvelele.

Kanti wena uphila kiliphi iphasi leli elinentozoke?

Nangibuyisa umkhumbulwami lo,

Musi mina nawe siphila ephasini linye,

Alo kubayini wena ukghona, kodwana mina ngingakghoni?

Kanti wena ubona ngaliphi ilihlo?

Ufumbathisile na?

Namkha uthwele?

Kanti wena wenza ngani?

Wenza ngasiphi isihlahla?

Iza usidembele, ngombana intatha oyisebenzisako le ngiyayifuna nami.

Sirarekile ngombana wena uyasirara.

Wena kanti wenza ngani?