Toro
Ka lora motsheare ke shebile
Ke tonne mahlo
Ke a tsweretse sa sephooko
Se lalletse ho phamola tadi ka hara mofero.
Kapa se habile ho hlotha tsuonyana.
Ka ipona hantle ke rwetse naledi ya tlholo
Ya kgauta phatleng ebile e phatsima
Ha ntse ke tlolatlola ke thabo
E bonwang ke nna ke le mong
Ke ha ke bokanelwa ke batho
Jwaloka dintsi di bitswa ke seputa sa sebodu
Ba leka ho nthiba bare hei o lahlehetswe ke kelello.
Bang ba re o ya lora ha le mmone.
Le hona motsheare tjee tadi e antsha.
Ka nka pene le buka ya eba metswalle
Ka dula fatshe ka ntsha mabinebine a pelo.
Basomi bare hei le mmone o hlantshwa ke pampiri le buka eo a dulang a e kokositse.
Athe ha ba tsebe sephiri se ipatetse bona
La fihla tsatsi la tlhodisano le sa hae
Pelo yaka e otla sa lenaka la watjhe mothekenyane
E potlaketse sephetho sa moshwelella sa dithotokiso
Ya bokolla selefono ka araba metsotswana.
Ka hweletsa ka tlolatlola sa lesea sa monene.
Kgetlong lena ba nthusa bohlanyeng bona.
Ba nketsa sa mpokanela ka diselefono
Ka tlala marangrang a thekinoloji
Kgau ya tlholo ke e phahamise ka boitshepo le thabo.
Ba sala ba maketse basomi
Ba re la hopola o ile a qala ka bohlanya.
Kajeno ke mohlodi wa kgau.