Misava yi yime swa mati ya xidziva.
Ku lo tititi!
Ko hunga moya wa vuhemuhemu.
Un’wana na un’wana u tixingele bya yena vutomi.
Phela swibihile.
Xinghunghumani xo vutla vutomi xikwala.
A hi xilondza u nga ta xivona.
A hi xitlhavi u nga ta xi twa.
Xo titiva xi ri xoxe.
I vuyima-yima a ti “laboratory”
Misava hinkwayo yi lava ku tiva.
Ku pandza tinhloko ta varhangeri va misava.
Phela swi tikile.
Lavo tirha hi swarihanyu matiko hikwawo ya tshembele eka vona.
A ku na loyi a nga ta xi vona hi mahlo ya nyama.
Swibihile hi mpela.
Hinkwaswo swilo swa vutomi swilo ntswii!
Vanhu e ka man’wani matiko vambumburheka bya ntshava ya ridaka.
Mafu ya hundzuke xirila mani.
Lava ripfumelo rohisa vafi, matshanga ya xiheselo ya tlhemuka.
U ta rila mani u siya mani.
Swibihile.
Matimu ya ndzi tsundzuxa lembe ra “Polio”.
Swo fana twiii!
Phela a ku ri xirila-mani hi lembe rakona.
Vutomi byi ncince swaxitshuketa.
Milawu yo ringeta ku hunguta ntungu gii!
Un’wana na un’wana eka yena.
Mintirho yi yimile.
Vanhu varisiwa bya swifuwo.
Valaveka amatshangeni ya vona.
Lavo pfuka hi mihloti ya “Queen” I vuhalahala.
Phela na vuswa bya nghena masiku lawa.
Ntungu wo titiva wu ri woxe.
Wu fike bya noyi.
Wuxwele a xikarhi ka misava.
Ku lo hwii!
A ku na loyi a tivaku ku ri swita helela kwini.
Ko va vu kumbe-kumbe.
Swo tiva hi muvumbi.
Vuvhumbha-vumbha byi herile.
Na va n’watinhlolo va lo hwii!
Intungu hi mpela.
Vandzindza-khombo swikhwama swahandzuka.
Phela a ku na loyi a tlulaku ku hakela.
Va ri ngoma yi tshama yi vambiwile.
Phela swibihile.
N’wa-munhu xi tshama xi rindzile.
Lebyi vuvabyi a byi na hosi.
A byi hlawuli.
A byi na xikhumukani.
A byi na xisiwana.
A byi na ku ri u mani.
Byo titiva byi ri byoxe.
Xinghezi xihumaka a Nghilandi,
Hi twa va ku I Khorona.
A hi tshembeleni a hosini.
Swita tikomba.