Se mpone bosehlana ke motswadi wa gago,

Se re ge ke tšwelela o na le dithaka wa tšhaba,

Se re ge ke go bolediša pele ga batho wa itira nke ga o ntsebe,

Bohlaki bjo ke lego ka gare ga bjona ga se ka ikgethela

Modimo ga a fe ka go lekana ngwanaka,

Go hlaka gaka go se go dire gore o seke wa ntlhompha, gomme o hlomphe ba go ba le sa bona fela,

Tšatši le lengwe legokobu le tla nnyela,

Tšatši le lengwe ke tla tšwa maswi,

Wa mpona bjalo ka motswadi wa gago

Wa mpha hlompho go swana le ba go ba le sa bona

O nkweša bohloko, ke phela ka meokgo,

Ke wa ke tsoga ka lebaka la gago,

Ka dira bonnete bja gore o robala o jele,

Ka loga maano a gore o kgone goba le mo o fihlago hlogo,

Ka ja mafadi a bogobe ka go fa bogobe,

Se je ke dihlong ge ke kopana le wena,

Nthabele o nkgoeletše ke etla kgole,

O ntšhupe gare ga batho o re “motswadi waka”

Bophelo ge nkabe re e kgethela be ke tla kgetha bjo o bo nyakago

Tšhelete nkabe e bopiwa be nka e bopa ,

Amogela ka mokgwa wo Modimo a mphilego ka gona

Ke re matšatši ga a hlabe ka go swana

Nkamogele o nthate o boe o nthekge

Hlompho le lerato la gago di tla ntiiša.