Kwathi ngoluny’ usuku ngizizulela,

Phela nami ngangishaywa ngumzwangedwa nekhana lizizulela,

Ngabe sengihlangana nenhl’ intokazi ngazishelela,

Kwazise ngiyibhungu lakwethu nesisoka ngiyazicuphela.

Ngawabek’ amabil’ amathathu kwazinhlanga zimuka nomoya,

Ngagadla ngamagam’ engiwathembil’ ukuthi kayiphunyuki kwazifanela,

Ngabe sengiphoqeka nokuthi ngiyidedele

Bese ngeliny’ ilanga sengiyoyibuyela.

Kuyashiw’ okubik’ amadoda kuyabikwa,

Ngibe sengiya ku Vikiconsi- umngani wam’ azongizwisa,

Sabe sesilubhunga loludaba lungenamkhawulo,

Sabe sesihlanganis’ amakhand’ ekutheni lengane kwamel’ ihlawule,

Ngayihlukumez’ ingqondo yam’ ukuz’ ingihlunge,

Ngoba kakukwaz’ ukuthi ngingavum’ ukuthi lentomb’ ingehlule.

Yimina Loya dadewethu kababa ngifikelwa ngusathane,

Nokuthe ngimuphebeza wathi mina naye masakhane,

Ngehlela ngezansi ngadons’ indlebe ngananela,

Wab’ eseqala phans’ enginabela,

Wathi mfan’ ukuz’ uthole lentombi ngilalele,

Nempela lavel’ iqhinga njengedidi leselesele.

Ngathol’ ukuth’ uyise waya kwagoqanyawo,

Ngabona vel’ umawayo ngumfelokazi ngisengayithol’ indawo,

Ngagaqel’ isibaya nesitsha sokudlel’ uyise,

Ngoba yona lentombi kumele ngiyinyise,

Ngagadla kunina wanqaba kodwa kway’ isikhathi wathamba,

Ngagadla ngokuphindelela lehl’ uphondo ngalubamba.

Waqom’ unina wentombi ngathokoz’ ezibilini,

Phela sekusobala yimin’ ozoshay’ umthetho layindlini,

Ngoba manje sengiwuyise wayo lentokazi,

Okumnandi nonina wayo wangazisa kuyo- nay’ iyazi,

Ngisazoyidelisa Yona futhi kangingabazi.

Kwahamb’ isikhath’ unina wathi ngizohlala nabo,

Phel’ imin’ indoda futhi umsebenzi wam’ ukuvikela bona,

Ngicel’ umhlangano kusihlwa nabo,

Ngiphinde ngezwa nezimfuno zabo,

Ngoba engizokwenza ngiyobe ngenzela bona.

Ngayibek’ intahantaha yemithetho Yami,

Phela layindlini sekukhal’ isiginci sami,

Futhi nentombi len’ isiyindodakazi yami,

Kahle Kahle lelikhaya sekungelami,

Angifune ngan’ ehamb’ ebusuku kwami.

Kwala nom’ ecel’ ukuvakashel’ umngani ngithi cha!

Wafonelwa ngithath’ ifoni ngiyicime,

Acel’ ukuy’ edolobheni ngithi cha!

Sengangamane ngikuyele ngiphuthume,

Akhulume nomuntu phandle ngithi cha!

Eyam’ ingane kwamel’ ihlal’ endlini,

Ngenz’ isiqiniseko sokuthi lemitheth’ uyayigcina,

Kangidlali nje ngithi cha!