Le nkondlo ayiwona umbono
Kodwa isekelwe emazwini eqiniso,
Azokhulula izingqondo nezinhliziyo,
Zalabo abafuna iqiniso hhayi amanga,
Iqinise ukholo, ichay’ amanga enkolo,
Ngokucaphuna amazwi angcwele.
Ngabe akunjena…ukube balalela
Owawucaculile umthetho ukuze baphile!
Bakhetha ukuweqa umthetho benza isono.
Isono siwukwephula umuthetho obekiwe,
Ukufa kwangena ngesono yiwo umvuzo!
Badla isithelo bavuleka amehlo,
Bazibona behamba-ze behlakaniphile,
Ngaphandle koMdali bona bangaziphilela,
Nezinqumo bangazithethela bezithethela.
Ngabe akunjena…! ukube baguqa ngedolo baxolisa baxolisela isono nesiphambeko sabo kuMdali wabo,
Ngoba uMdali unothando uyathethela.
Ukuzisola nonembeza kwafa kanjalo,
Ekugcineni bafa njengoba babetsheliwe.
Bona bazi ukuthi ngokungalaleli bazofa babetsheliwe!
Isono sabangela uMdali wasifihlela ubuso
Ngenxa yokuthi sonke sonile ngo-Adamu noEva
Isono sisenyameni yethu sihlaba njengeva
Bebecabanga ukuthi kuyoba kuhle ukuzibusa
Ekuqaleni kwabonakala kuhamba kahle
Bazala amadodana amabili uKhayini no-Abela
“Ngezinhlungu zemhelo”u-Eva waqelikiswa
“Uyodla isinkwa ngezithukuthuku” no-Adamu waqelekiswa
“Ekugcineni uyobuyela othulini lomhlabathi ngoba uluthuli uyobuyela othulini”
Adamu watshelwa uzoya othulini uma ufa hhayi ezulwini
Ukufa kwakungeke kube khona ukube balalela
Bakubona mhla uKhayini ebulala u-Abela
Nabo kodwa bakhohliswa bakhohliseka
Ngobuqili uSathane wasebenzisa inyoka
Ku-Eva wakhuluma amanga ngoMdali wamnyundela
Betsheliwe “ningadli ukuze ningafi” balalela?
“Ngokuqinisekile ngeke nife”uSathane wabatshela
Ngubani owayeneqiniso uMdali noma uSathane?
Ngabe akunjena…!ukube balalela uMdali kunoSathane
UMdali wayengeke angabajezisi sebephule umthetho
Inkokhelo yesono ngukufa obuhlungu umvuzo lo
Siyasilela enkazimulweni yoMdali ngenxa yesono
Thina nzalo ka-Adamu asenzile lutho
Thina sesifela ezika-Adamu no-Eva izono
Yingakho uMdali asifihlela ubuso
Watshela uMose “abunakubonwa obami ubuso”
Yingakho athumela iNdodana ezelwe yodwa
Yeka umusa! Ukuze izosifundisa ngombuso
Nasekuphendulweni kwezinsolo nemibuzo
Ukuthi ngubani umbulali wabantu kwasekuqaleni
Phakathi kukaMdali noSathane sifuna ukwazi
Bebuza abafarisi bezenza abangazi
INdodana yafundisa iqiniso icaphuna emqulwini
Ukuthi uSathane “ungumbulali wabantu kwasekuqaleni”
Leli qiniso labaphutha ngenxa yobulukhuni bezinhliziyo
Leli qiniso lisabaphutha namanje abaningi
Balokhu bamsole njalo uMdali ngokufa kwabo
Ababenezindlebe zokulalela bayizwa baba nokholo kuyo
Abenezindlebe namanje bayayizwa bakholwe yiyo
INdodana yadela ukuphila kwayo ngenxa yethu
Ukuze izosikhulula esonweni nasekufeni
Egazini layo elachitheka zabalelwa kulo zonke izono zethu ngoba “wonke umuntu obonisa ukholo endodaneni unokuphila, kodwa lowo ongalubonisi ulaka lukaNkulunkulu luphezu kwakhe”
Ngabe akunjena…!ukube siphila ngemiyalo kaMdali
Kodwa siqhubeka sona ngenxa yokungapheleli
Amazwi angcwele siwashaya indiva asawalaleli
Ukukhonza uMdali kuyisidala nento engasebenzi
Basho ngesibindi “asiyikholelwa into esingayiboni”
Lokhu ukwedelela nokuthuka uMdali isidanisi
Ubukhona bakhe bubonakala ngendalo ayidalile
Amandla ukuhlakanipha ubukhulu ukuphakama kwakhe
“Ongibonile mina umbonile nobaba futhi” yasho INdodana yakhe
Ngabe akunjena…! ukube silalela iNdodana kunabafundisi nabaprofethi bamanga
Abafundisa okungelona iqiniso
Bazifunela ezabo izinzuzo ngokuqola abantu
Ngokukhokhisa abantu okweshumi
Baze babatshele ngokuthi bazoya ezulwini
Kwabona leli zulu abangalazi nakulazi
Befunda amavesi avumelana nabo
Lawa angavumelani nabo ngamabomu bayaweqa
Bayazi ukuthi abakwenzayo akulungile
Phambi kwamehlo abantu bazenza abalungile
Bayazithanda izindawo eziphambili
Nasezigcawini bathanda ukubuzwa ngabafundisi
Kuyilapho INdodana yayala yathi ” aningabizwa ngokuthi mfundisi ngoba munye kuphela umfundiso wenu uJesu Kristu”
“Qaphelani izimpisi ezembethe izikhumba zezimvu”
Lezi zimpisi zithi zikhipha amademoni
Zithi amandla ziwathatha eNdodaneni
Yona le ethi “ngiyoniphika nina enenza okungemthetho” ngoba basazoke bathi Nkosi Nkosi ngosuku lokugcina
Abantu nibafundisa ukuthi uNkulunkulu, uJesu uMoya ongcwele into eyodwa niphinde nithi uJesu uNkulunkulu futhi mkhulu kunoNkulunkulu
Kaze niyithathaphi le mfundiso mbumbulu
“Baholi abayizimpumputhe” abahola ezinye izimpumputhe
Nina baholi nimphikile uNkulunkulu animazi
Nina baholi niyiphikile iNdodana yakhe aniyazi
Nina baholi niwuphikele umoya ongcwele aniwazi
Ngokufundisa okungelona iqiniso
Aniwuthinti kwawuwuthinta umbuso ngoba nawo aniwazi
Ngabe akunjena…!ukube sifuna uMbuso kaNkulunkulu kunowabantu
Iyathembisa ingenzi igcwele inkohlakalo
Iphinde ivukelane yodwa injalo nje
Iyehluleka ukuqeda ukuhlupheka kwabantu
Yingakho okaNkulunkulu “umbuso uzoyiqeda Nya yonke le mibuso yabantu wona ubuse kuze Kube phakade”
Leli qiniso abaningi liyabaphunyuka
Ngoba bathanda amanga kuneqiniso
Emhlabeni akwenzeki intando yoMdali
Njengoba yenzeka ezulwini
Kodwa kwenzeka ekaSathane namademoni akhe
Ngoba uSathane “ungumbusi waleli zwe”
“Lonke izwe lisemandleni akhe njengomubi”
“Waxoshwa ezulwini waphonswa la emhlabeni Kanye namademoni akhe”
Naleli qiniso liyaphunyuka abaningi
Ngabe akunjena ukube uMbuso kaNkulunkulu yiwo obusayo emhlabeni
Ngabe akunjena…!ukube u-Adamu no-Eva balalela uMdali wabo kwasekuqaleni.
UMbuso wakho mawuze!
ibhalwe ngu:
Sthembiso Sydney Msezane.