Ndivuswe ngentseni imvula isitsho ngamandla
Ziingqaqambo zeentsiko ndipenapena
Iintuthumbo zanditsho ndankenenkene
Ifikil’ inimba kway’ ize ngamandla
Ndiphaphanyiswe ndaphuthunyiswa esibhedlela
Kungekudala ndafika ndingabalisanga
Izingqi zomnt’ omntsha zingandiphumlisanga
Ndifikile nozala kwangathi utsho ozayo
Kwiyure ndifikile gqi qhaphu nankumnt’ omtsha
Ngesikhalo esikrakra sikrazul’ elo gumbi
Ngumntana mni mongikazi ndabuza
Ndakhwaza ndakumbona “ndinonyana ndinendlalifa”
Itumtumana lenkwenkwana ebutubut’ umzimba
Etsho ngamahlontlo ngathi kad’ ikho
Ebunzi liqine ngathi yinkonde ekad’ idla’ amazimba
Yimincili noncumo kweyam intliziyo
Yanga lungahlala umlibe esifubeni olu sana
Ndilwange ndiluphuze ndilubuk’ ol’ usana
Kalok’ emva kwamalinge aliqela
Namhla ndinonyana ndinendlalifa