Amampunge awo Amampunge

Yonk’into ngamampunge

Buyintoni na obubomi

Litshonile ilang’emini

Besisathi thembamqal’uzoginya

Lasuka lweqithi iceph’emlonyeni

Besisambuka njengentyantyambo enqabileyo

Ewe lona izembe besilibolekiwe ibingelolethu

Oh! ihambile inzwakazi

Ulele ukuphumla uMandal’omhle

Sivakele isithonga sikabham

Uwil’umthomkhulu

Isibhakabhaka sicwengile

Ntomb’ebuchopho buhluziweyo

Umlisela nomthinjana ukhongozela kuwe

Ububele imvuzemvuze

Intlonipho nothand’olungenamkhethe

Isibanesakho sikhanyisel’ihlabathi jikelele

Ubususil’ ubumnyama kwabaninzi nakum

Kodwa kufa ulisela

Uyingonyam’egqumayo elinde ban’engamqwengayo

Sitshingitshan’esigquthezayo

Sitshayela namalingisa

Wehlule wehlul’okhokho

Ubhid’ubhidabadala

Kodwa soze ubhid’umdal’odalekonke

Uyaxhel’ude uxhele neyam’intliziyo

Umphefumlo wam udandathekile

Siph’isazela sakho?

Ziph’intloni noba njengambulali wabulala konke?

Luphi ulwamvila lakho kufa?

Umfula wenyembezi awugcwali kwisini na?

Intliziyo ziyaxiza ligazi

Akusenani! Le yekaNdikhoyo

Makayibonde sel’iseziko kakade

Kwezethu Intliziyo makulal’iziphunzi

Kwatsho wena Mandala “icebo likaThixo lingevinjwe mntu”

Lilo ke neli

Kwivangeli ubuliqothoqikili

Intamo yakho ebinamafutha

Itshantliziyo

Umzil’owukrwelileyo uyandithuthuzela

Luphelil’olwam’usiba kuba kaloku nombeng’omde uyawucik’umlilo

Lalangoxolo Magxarha